25 августы Кады Аллеяйы уагъд æрцыд цытджын церемони – Ард бахордтой курсанттæ, Уæрæсейы уæлдæр ахуыргæнæндæттæм Мидхъуыддæгты министрады хаххыл чи хъуамæ ацæуа, уыдон. Цытджын мадзалы хайад райстой ведомствойы разамынад Гуыцмæзты Аланы сæргълæудæй, РХИ-йы Æдасдзинады советы секретарь Плиты Анатоли, тыхон структурæты минæвæрттæ, ведомствойы ветерантæ, курсантты ныййарджытæ. Курсанттæ сæ Ардбахæрды ныхас радтой, кæй уыдзысты æууæнкджын, цæсгомджын, сæ Райгуырæн бæстæйыл та – иузæрдион.
Курсанттæ æдæппæт уыдысты 23 æрыгон лæппуйы. Развæлгъау ахуыртæ рацыдысты Мидхъуыддæгты министрады профессионалон цæттæгæнæн центры. Цытджын церемонийы фæстæ æрæмбырдуæвджытæ иу уысм æдзæмæй алæугæйæ, ссардтой, йæ службæйон хæстæ æххæстгæнгæйæ, милицийы кусджытæй чи фæмард, уыдоны рухс нæмттæ.
Нæ бæстæйы Президенты номæй Плиты Анатоли арфæйы ныхæстæ загъта курсанттæн, йæ цæст сын бауарзта иттæг хорз æнæниздзинад æмæ æнтыстытæ сæ царды фæндагыл.
Раарфæ сын кодта Мидхъуыддæгты министр дæр.
«Мæн фидарæй уырны, сымах кæй нæ фæхудинаг кæндзыстут уæ ныййарджыты, Ирыстоны кадыл бæрзонд кæй хæцдзыстут æмæ уæ намысы хæс сæрбæрзондæй кæй æххæст кæндзыстут. Уæ алы фезмæлды дæр, уе сныхасы дæр æппынæдзух хъуамӕ хæссат ирон адæмы традицитæ, хистæртæн кад кæнын, уæздандзинад, лæгдзинад. Уадз æмæ уæ æгас Ирыстоны адæм буц уæт!», – банысан кодта Гуыцмæзты Алан.
Ард бахордтой курсанттæ
Курсанттæн ма арфæйы ныхæстæ загътой милицийы ветерантæ æмæ ныййарджытæ дæр. Сæхирдыгæй курсанттæ дæр раарфæ кодтой Мидхъуыддæгты министрады къухдариуæгадæн, Уæрæсейы хуыздæр уæлдæр ахуыргæнæндæтты сахуыр кæныны фадат сын кæй радтой, уый тыххæй.
ДЖИОТЫ Алыксандр
