– Хуссар Ирыстон размæ цæуы Уæрæсеимæ алыварсон ахастыты рæзты руаджы, – «Рес»-æн йæ комментарийы банысан кодта политолог Михаил Чернов УФ æрдыгæй республикæйы банымадыл 16 азы сæххæсты боны хæдразмæ.
«2008 азы 26 августы Уæрæсейы Федераци банымадта Хуссар Ирыстоны паддзахадон хæдбардзинад. Мæ царды уый уыдис иууыл хуыздæр бон, – загъта уый. – Ныры цауты глобалон масштабы гуылфæнты мах не ‘ппæт дæр нæ зæрдыл хъуамæ дарæм, Фæскавказы чысыл Хуссар Ирыстоны уыцы практикон къахдзæфæй стыр Уæрæсе бахызт ног дугмæ, дунеон аренæмæ кæй баздæхт, уый банысан кодта стыр тыхы хуызы», – загъта Чернов.
Банысан кодта, зæгъгæ, Хуссар Ирыстонæн йæхи мидæг, республикæйы хæдбардзинады азты сырæзт, бинонты æмæ сывæллæтты хицау баисты ног фæлтæр, кæцытæн сæ паддзахад Уæрæсеимæ цæдисы – сабидугæй фæстæмæ у иунæг зонгæ реалондзинад. Уыцы фæлтæр, йæ ныхæстæм гæсгæ, ныртæккæ тох кæны специалон æфсæддон операцийы зонæйы.
«Хæдбардзинады банымадæй фæстæмæ Цхинвал ссис диссаджы, сыгъдæг, рæсугъд, хæрзæфснайд горæт. Республикæйы сырæзтысты тынг хорз фæндæгтæ, регион æнтыстджынæй размæ цæуы, – бахахх кодта Чернов. – Æппæт уыдæттæ къухы бафтыдысты Уæрæсеимæ алыварсон ахастыты рæзты æмæ æнгом æмгуыстады руаджы».
Политологмæ гæсгæ, дыууæ бæстæйы уæрæх æмахастытæ æрмæстдæр фидар кæндзысты.
«Хуссар Ирыстоны æмбæстæгтæн æмæ мæ хæлæрттæн зæрдиагæй арфæ кæнын æрбалæугæ бæрæгбон – 26 августы боны цытæн», – йæ ныхасы кæрон банысан кодта Чернов.
ИА «Рес»
