Украинӕйы райстой сӕрмагонд закъон, кӕцымӕ гӕсгӕ украинаг канонион чырыстон аргъуан ӕхгӕд цӕуы, сӕ кувӕндӕттӕм цӕуыны бар сын нал ис. 20 августы сӕ Сӕйраг Радайы депутатты фылдӕр хай схъӕлӕс кодта ацы закон райсыныл ӕмӕ ныр 30 боны фӕстӕ йӕ тыхы бацӕудзӕн. Ацы ног закъоныл тынг бацин кодта Украинӕйы мӕнг президент Зеленский, загъта, зӕгъгӕ, ныр йӕ фӕрцы Украинӕ райста духовон хӕдбардзинад.
Ацы закъон Сӕйраг Радамӕ хаст ӕрцыд фарон. Йӕ райсыныл иууыл тынгдӕр архайдтой сӕ раздӕры президент Петр Порошенко йӕ политикон партиимӕ ӕмӕ ма иннӕ националистон ӕмӕ фашистон къордтӕ. Ныр та фактон ӕгъдауӕй закъон райсыны инициатор уыд Зеленский йӕхӕдӕг. Ам банысан кӕнын хъӕуы, Украинӕйы разамынады бӕрӕг кӕй фӕфылдӕр сты фашисттӕ ӕмӕ нацисттӕ, ӕмӕ депутаттӕй сӕ фӕндыл чи нӕ разы кодта, уыдонӕй кӕй маргӕ акодтой, кӕмӕ та марынӕй бартхъирӕн кодтой. Уымӕ гӕсгӕ фашистон режимы куыд фӕнды, афтӕ кӕны. Зеленский дӕр инициаторӕй уымӕн «рагӕпп» кодта, цӕмӕй бандеронты зӕрдӕтӕ алхӕна. Ӕнӕуый дӕр ӕй ӕнӕзакъонон президент хонынц ӕмӕ украинаг нацистон лӕгсырдты ӕнцой куы нӕ балӕууа, уӕд ӕй фӕтӕрдзысты.
Цы уыдзӕн дарддӕр?
Украинӕйы чырыстон аргъуаны уавӕр ныры онг дӕр бӕллиццаг нӕ уыд. Ӕппыӕндзух сӕ хъыгдардтой, ахстой сын сӕ сауджынты, кувӕндӕттӕм нӕ уагътой адӕмы. Адӕм-иу растадысты, сарӕзтой-иу митингтӕ, хъаст-иу бадӕттой барадхъахъхъӕнӕг органтӕм. Фӕлӕ «рувасӕн йӕ къуди йе ‘вдисӕн». Ныр та сӕ ноджы тынгдӕр райдайдзысты ӕфхӕрын.
Ныр 30 азы дӕргъы Украинӕйы пропагандӕ кӕнынц Константинополы патриархаты чырыстон аргъуан, ома, адӕм уырдӕм цӕуын райдайой. Ацы аргъуанӕн Украинӕйы территорийыл йӕ дин парахат кӕныны бар радтой 2014 азӕй фӕстӕмӕ, Петр Порошенко ма президент куы уыд, уæд.
Ацы закъон нырмӕ дӕр райстаиккой, фӕлӕ тарстысты адӕмон растадтӕй. Ныр нал тӕрсынц, ӕвӕццӕгӕн уымӕн дӕр ис йӕхи аххосӕгтӕ. Украинӕйы территорийыл ныридӕгӕн уавӕр у ӕндыгъд, уынгты ахсынц нӕлгоймӕгты ӕмӕ сӕ хӕстмӕ тӕрынц. Уымӕ гӕсгӕ уынгты сылгоймӕгты ӕмӕ зӕрӕдты йеддӕмӕ никӕйуал фендзынӕ ӕмӕ уыдонӕн та сӕ бон массон митингтӕ саразын нӕу. Стӕй адӕмӕн сӕ сӕр сӕ кой у ӕмӕ сӕ дины фарстатӕ не ‘ндавынц – мӕлӕтӕй ма куы аирвӕзиккой. Уымӕ гӕсгӕ, киеваг фашистон режим хорз рӕстӕгмӕ бахъавыд.
Эксперттӕ куыд ӕмбарын кӕнынц, афтӕмӕй ацы закъон халы Украинӕйӕн йӕхи конституци дӕр ӕмӕ ма ӕхсӕнадӕмон барад дӕр. Ома, паддзахады разамынад ма хъуамӕ ӕндава аргъуаны архайдыл, фӕлӕ ма уыдӕттӕм чи кӕсы. Ныгуылӕн бӕстӕты минӕвӕрттӕ сӕхи пайдайӕн оратортӕ фестынц фӕазымджын кӕныны хъуыддаджы, уайтагъд рӕгъмӕ рахӕссынц «демократон принциптӕ». Фӕлӕ ныр багомыг сты, иунӕг бӕрнон кусӕг дӕр сын сӕ ных нӕ бакъуырдта.
Украинаг фашистон режимы фӕнды, цӕмӕй украинаг ӕмӕ уырыссаг нациты бынтондӕр ахицӕн кӕной, ома сын, ӕгӕрыстӕмӕй, духовон бастдзинад дӕр мауал уа. Уыцы хъуыдытӕ цӕуынц ныгуылӕнӕй, растдӕр та – англо-саксойнаг элитӕтӕй. Уыдоны рагӕй фӕстӕмӕ фӕнды славянаг нацийы кӕрӕдзийыл сардауын, ныццӕгъдын ӕмӕ стӕй сӕрибарӕй æлдариуӕг кӕнын. Ӕмӕ сын ӕнтыстытӕ дӕр ис. Иууыл лӕмӕгъдӕр разындысты украинӕгтӕ ӕмӕ сӕ кӕнон сӕ фӕрцы бакодтой.
Украинӕйы чырыстон аргъуан кӕй сӕхгӕдтой, уый, фыццаджыдӕр, бандавдзӕн йӕ цӕрджытыл. Мӕскуы комментари радта, зӕгъгӕ, ахӕм закъоны райст нысан кӕны, Украинӕйы кӕй уӕвынад кӕны тоталитарон режим. Фӕлӕ Уӕрӕсейӕн ацы фарсты йӕ бон ницы у баххуыс кӕнын украинаг ӕмбӕстӕгтӕн. Сӕрмагонд ӕфсӕддон операци дӕр растдӕр фашистон режим скуынӕг кӕныны тыххӕй райдыдта. Ӕмӕ ныр Украинӕйы ӕмбӕстӕгтӕй йӕ хорз зондыл чи ис, уыдон ныфс æвæрдзысты уӕрӕсейаг ӕфсӕддонæй, ӕнхъӕлмӕ сӕм кӕсдзысты, цӕмӕй сӕ стоной тугдзых фашистты дзӕмбытӕй.
2022 азӕй фӕстӕмӕ Украинӕйы чырыстон аргъуаны сауджынтыл бакодтой 80 фылдӕр уголовон хъуыддаджы. Ома, сӕ аргъуанты разамынады фылдӕр хай сты ахӕстоны ӕмӕ сӕ рауадзынмӕ нӕ хъавынц. Украинаг фашистон режимы ныхмӕ рацыд ИНО, фӕазымджын сӕ кодта чырыстон диныл хӕст цӕрджыты бафхӕрыны хъуыддаджы. Сӕ хъуыддӕгтӕ нӕ фӕцыдысты папа Римскийы зӕрдӕмӕ дӕр. Фӕлӕ Зеленский уыдӕттӕ мурмӕ дӕр нӕ дары – йӕ куратортӕ йын цы дзурынц, уый аразы.
Политолог ӕмӕ ӕхсӕнадон архайӕг Владимир Легойда куыд ӕмбарын кӕны, афтӕмӕй ацы законы райстимӕ карз ӕфхӕрд ӕййафдзысты милуангай украинаг ӕмӕбӕстӕгтӕ. «Фашистты фӕнды скуынӕг кӕнын украинаг ӕмӕ уырыссаг адӕмты иумийаг духовон бындур. Сӕ бӕллиц сӕххӕст кӕныны тыххӕй гуымир ӕгъдауӕй фехӕлдтой ӕппӕт ӕхсӕнадӕмон барад, хуымӕтӕг адӕймаджы элементарон бартӕ, сӕ къӕхты бын скодтой ӕфсарм, сӕ цӕсгомыл сӕ къух систой».
ДЖИОТЫ Алыксандр
