Уæрæсейы Федерацийы Хуссар Ирыстоны минæварад æмæ Æхсæнадæмон литературон преми «Булæмæргъ»-ы совет радон хатт расидтысты Ирон æмæ уырыссаг æвзагыл чи фыссынц, уыцы авторты ‘хсæн конкурс æмæ хъусын кæнынц 2024 азы премийы 8-æм афонмæ кандидатты æвзарыны тыххæй.
Литературон преми «Булæмæргъ» фидар æрцыд цалдæр азы размæ Уæрæсейы Федерацийы Хуссар Ирыстоны Æххæстбарджын минæвар Гасситы Знауыры æмархайды руаджы æмæ ныр уыцы кадджын премийæ æрвылаз дæр хорзæхджын æрцæуынц, ирон æмæ уырыссаг æвзæгтыл цымыдисондæр уацмыстæ кæмæн вæййы, уыцы автортæ.
Æхсæнадæмон литературон преми, афтæ зæгъæн ис, æмæ канд фысджыты æнгомгæнæг нæу, фæлæ ма национ литературæйы фыццаг къахдзæфтæ чи кæнынц, ахæм æрыгон курдиатджын адæймæгты æмæ сын нæ цæст уарзы æнтыстытæ.
Преми райсыны тыххæй раразмæгонд цæуынц ирон æмæ уырыссаг æвзагыл фыст уацмыстæ æмæ авторон тæлмацтæ.
Литературон преми райсыны тыххæй автортæн сæ бон у раразмæ кæнын романтæ, радзырдтæ, уацаутæ, кæнæ уацауты æмбырдгæндтæ, æмдзæвгæты æмбырдгæндтæ, документалон прозæ æмæ мемуартæ.
Дипломатон ведомствойы пресс-службæ куыд хъусын кæны, уымæ гæсгæ уацмысты автортæ кæм цæрынц æмæ сæ уацмыстæ мыхуыры кæм рацыдысты, уымæн ницы арæнтæ æвæры премийы совет.
Преми райсыны тыххæй раразмæгæнæн ис литературон уацмысты фыццаг рауагъдтæ (чингуыты хуызы, дзыллон информацийы фæрæзты ныммыхуыргонд, афтæ электронон хуызы æмæ литературон журналты æмæ альманахты ныммыхуыргонд), кæцытæ мыхуырмæ лæвæрд æрцыдысты 2022 азы1-æм январæй. Конкурсы хайад райсыны бар ис, 14-41азы онг кæуыл цæуы, уыцы кары адæймæгтæн.
Автор йæ уацмысы хъуамæ бавдиса электрон хуызы. Æнæмæнг хъуамæ бавдиса йæ контакттæ, телефон æмæ адрес, афтæ ма цыбыртæй йе сфæлдыстадон биографи, уацмысы æххæст ном, сæйраг зонæнтæ уацмысы тыххæй, йæ раразмæ кæныны мотиваци.
Преми райсыны тыххæй уацмыстæ ист цæудзысты 2024 азы 30-æм октябрмæ.
Преми лæвæрд цæудзæн ахæм бæрцтæй:
фыццаг преми – 90 мин сомы;
дыккаг преми – 60 мин сомы;
æртыккаг преми – 50 мин сомы.
Уацмысты æрвитын хъæуы ахæм адресыл: minavarad@mail.ru.
