Махачкала, Каспийск, Грознæ, Ессентуки, Железноводск – ацы горæтты алкæцыйы дæр «Симд»-æн æмдзæгъд кодтой.
«29-æм июнæй 2-æм июлмæ «Симд» ралæууыд Махачкала æмæ Каспийскы. Уый фæстæ сæ фæндаг акодтой Грознæмæ, цыран 3-æм июлы концертон зал «Вайнах»-ы сценæйыл радтой концерт. Гастролон маршрут адарддæр кодтой Ставрополы крайы: 5-æм июлы сын уыдис дыууæ концерты: бонæй – Ессентукийы, изæры та – Железноводскы», – дзырдæуы «Росконцерт»-ы Telegram-каналы.
Сæ концертон программæ «Огни Кавказа: танцевальный мир горных вершин» кавказаг сценæмæкæсджыты зæрдæтæ балхæдта. Ныридæгæн ансамбль бирæ рæттæм хуынд у, фидæны сезоны концерттæ дæттынмæ.
Ахæм хъазуатон куысты фæстæ артисттæ хъуамæ баулæфой, цæмæй фæззæджы фыццаг бонтæй аивады бæрзæндтæм фæндæгтыл ног æнтыстытимæ цæуой! Уымæ гæсгæ паддзахадон ансамбль «Симд» ныртæккæ ис коллективон улæфты (отпусчы).
