Июны æмбисы Мæскуыйы уагъд æрцыд Национ костюм, культурæ æмæ традициты æппæтуæрæсейон фестиваль «Моя Родина», зæгъгæ. Фестиваль æрбаиу кодта иу мин адæймаджы бæрц Уæрæсейы 50 регионтæй фылдæрæй. Уыдон равдыстой Уæрæсейы адæмты национ культурæ куыд алыгъуызон æмæ алывæрсыг у, традицитæ фæлтæрæй фæлтæрмæ куыд лæвæрд цæуынц, уый. Кæй зæгъын æй хъæуы, ныр дæр та фæстæ нæ фæлæууыдысты ирон адæмы минæвæрттæ æмæ аккагæй равдыстой сæ радтæг Ирыстоны.
Финалисттæн аргъ кодта профессионалон жюри. Йе сконды уыдысты артисттæ, хореографтæ, дизайнертæ, адæмон дæснытæ æмæ музыканттæ. Жюрийы сæргъ лæууыд Уæрæсейы адæмон артисткæ Наталья Баннова, жюрийы æмсæрдар уыд адæмон костюмты зынгæ иртасæг Сергей Глебушкин, афтæ ма жюрийы скондмæ бацыдысты Мæскуыйы ирон общинæйы Советы уæнг – РЦИ-Алани æмæ Хуссар Ирыстоны сгуыхт артисткæ Амага Готти (Готойты Иринæ) æмæ Цæцæны Республикæйы сгуыхт артист Тимур Мурашев. Жюрийы куыст райдыдта ацы аз февралы мæйы хайадисджыты фæсаууонмæ равзæрстæй.
Фестивалы программæ уыд хъæздыг æмæ алыгъуызон. Культурон-патриотон проект Национ костюм, культурæ æмæ традициты æппæтуæрæсейон фестиваль «Моя Родина»-йы фæлгæтты уагъд æрцыд тымбыл фынг: «Уæрæсейы бирæнацион адæмты ‘хсæн æхсæннацион æмгуыстад æмæ хæлардзинады рæзт», зæгъгæ. Афтæ ма жюрийы сæрдар æмæ æмсæрдары мастер-къластæ, Гран-прийы хицæутты сбæрæг кæныны фæдыл конкурс-концерт.
Фестиваль фæцис Мæскуыйы национ театр «Золотое кольцо»-йы стыр гала-концертæй æмæ цытджын æгъдауæй йæ хайадисджыты схорзæхджын кæныны церемонийæ. Концерты хайад райстой фестивалы финалисттæ, жюрийы уæнгтæ æмæ артисттæ Уæрæсейы алы регионтæй. Амага Готти сæххæст кодта ирон зарæг «Куыд рæсугъд у сæрдыгон изæр», зæгъгæ.
Конкурсы «Уæрæсейы национ сценикон костюм»-ы здæхты, «Во-кал»-ы номинацийы хайад райста Цæгат Ирыстон-Аланийы Эльхоты хъæуы цæрæг Бететы Альбинæ. Чызг рамбылдта сценæмæкæсджыты зæрдæмхиц приз. Гала-концерты Альбинæ сæххæст кодта ирон зарæг «Ирон чызг».
Фестиваль «Моя Родина» здæхт у уæрæсейаг традицион монон-хæрзæгъдаудзинады æргъадтæ сфидар кæнынмæ æмæ сфæлдыстадон адæймæгты фарсмæ балæууынмæ, кæцытæ ахуыр кæнынц æмæ хъахъхъæнынц, популярон кæнынц культурæ, национ костюм, хæдбындурдзинад æмæ Уæрæсейы бирæнацион адæмты æвзæгтæ æмæ азæй азмæ уæрæхдæр кæнынц сæ географи.
Фестивалы организатор уыд автономон æнæкоммерцион организаци æмбæстагон инициативæты центр «Право на жизнь». 2024 азы фестиваль уагъд цæуы культурон инициативæты президентон фонды æххуысы фæрцы.
Нæ уацх.
