2020 азы 15-æм июны æнæкоммерцион организаци «Фамильный фонд Джиоевых-Гиоевых-Дзиоевых» рацыд паддзахадон регистраци. Ацы аз фонды  сырæзтыл сæххæст цыппар азы æмæ  йæ банысан кодтам куыд æмбæлы афтæ – гуманитарон æххуыс арвыстам сæрмагонд æфсæддон операцийы хайадисæг ирон хæстонтæн. Æрæмбырд кодтам газджын æмæ æнæгаз дæттæ 400 бастæй фылдæр 1,5 литр кæм цæуы, ахæм æвгтæ æмæ 250 ирон уæливыхы. «Фæнды нæ бузныг  зæгъын Дзиоты мыггаджы минæвæрттæн – «Бухар Дон», ресторантæ «Регах» æмæ «Груша»-йæн, сæрмагондæй Джиоты Валери, Игорь æмæ Жаннæйæн, Гиоты Хетæг, Джиоты Руслан, Лев æмæ Плиты Георгийæн (Гога). Афтæ ма арфæ кæнæм, гуманитарон æххуыс чи æрæмбырд кодта, уыдонæн се ‘ппæтæн дæр», – загъта фонды сæрдар Джиоты Давид. – Стыр куыст бакод-там не ‘мхъуыдыгæнджытимæ иумæ, фæлæ  цыма нæ бон фылдæр саразын уыд, афтæ нæм кæсы.

Исæм кинонывтæ, уадзæм чингуытæ æмæ журналтæ. Фонд кæны активон хæрзаудæн æмæ рухстауæн куыст: æххуыс кæны уæззау цардуагон уавæрты бахауæг фæкæсынхъуаг адæймæгтæн, æппынæдзух æмбырд кæнынц  хосгæнæн фæрæзтæ. 1-æм сентябрмæ сифтонг кæнынц сывæллæтты канцелярон товартæй. Рауагъдонтæн фонд баххуыс кæны уæлдæр ахуырадон уагдæттæм бацæуынæн. Организаци цæуынц мыггаджы фембæлдтытæ æмæ культурон мадзæлттæ. Æрæмбырд кодтой уникалон æрмæг мыггаджы минæвæртты тыххæй – биографитæ æмæ къамтæ. Дарддæр дæр куыст цæуы Хъахъхъæнынады министрады архивты Стыр Фыдыбæстæйон хæсты Джиоты мыггаджы хайадисджыты бæрæг-гæнæнтæ ссарыны тыххæй. Æрæмбырд кодтой ветеранты 270 биографи æмæ къамæй фылдæр. Æрвылаз дæр 9-æм майы сæвæрынц ветеранты къамтимæ баннертæ.

Ныртæккæ та кусынц Джиоты Христофоры  (Пора) бюст сæвæрыныл, афтæ ма ист цæуы Джиоты Владикы (Басмачы) тыххæй фильм. Хъыгагæн, фондæн нæ фаг кæны финансон фæрæзтæ æмæ информаци æмæ бирæ хатт куыст  кæронмæ нæ сæххæст кæнæм. Фидæны  фæнд кæнынц бирæ цымыдисон æмæ пайдайы проекттæ ныббиноныг кæнын.

«Мыггаджы фонд арæзт æрцыд æнгомдзинад æмæ кæрæдзийæн баххуыс кæныны нысанæн. Иумæйаг куыст ахъаз кæны ног идеятæ æмæ сфæлдыстадон проектты рæзтæн, æппæт нысæнттæ æмæ хæстæ среализаци кæнынæн. Фонды нысан у нæ монон æмæ материалон исбон иннæ фæлтæртæм адæттын æмæ афтæмæй, мыггаджы кадджын истори бахъахъхъæнын. Истори та фыст цæуы уæ цæстыты раз æмæ дзы хайад райсут. Кæй фæнды, уыдонæн се ‘ппæтæн дæр сæ бон у хайбавæрд бахæссын иумæйаг хъуыддагмæ  мыггаджы хæрзиуæгæн. Фыдæлтæ ныссадзынц бæлæстæ æмæ сын сæ аууоны абадгæйæ та æхцондзинад фæисынц сæ фæстагæттæ», – банысан кодта Джиоты Давид.

Уый сиды Джиоты мыггагмæ, цæмæй сæ хайбавæрд бахæссой Цхинвалы Джиоты Порайы бюст сæвæрынмæ. Уæ алы сомæн дæр ис æххуысы стыр нысаниуæг.

Нæ уацх.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.