«Ӕппæт дуне – театр» хоны фестивалы хайад райсынмæ

Республикӕ Хуссар Ирыстоны Культурӕйы министрады цур Адӕмон сфӕлдыстады республикон центр 24 ноябры 2019 азы ауадздзӕн хӕдархайгӕ театралон коллективты ӕхсӕн ӕртыккаг республикон фестиваль-конкурс «Ӕппӕт дуне – театр».

Фестивалы хайад райсыны бар ис скъолаты, клубты, уӕлдӕр ахуырадон уагдӕтты сфӕлдыстадон коллективтӕн кармӕ ӕнӕкӕсгӕйӕ.

Хайад райсыны тыххӕй 15 ноябрмӕ ӕрбацӕуын хъӕуы сфӕлдыстадон центрмӕ, кӕцы ис Харебаты Исахъы уынгыл сывӕллӕтты библиотекӕйы бӕстыхайы ӕмӕ бадӕттын хъӕуы куырдиат. Спектаклы сюжет ист хъуамӕ уа Нарты кадджытӕй кӕнӕ та Хетӕгкаты Къостайы уацмыстӕм гӕсгӕ, ахӕм жанрты: комеди, трагеди, драмӕ. Спектаклы дӕргъвӕтиндзинад иу сахатӕй фылдӕр ма хъуамӕ уа, хайадисджыты нымӕц та хъуамæ 10-12 адӕймаджы бæрц. Фестивалы ис ахӕм номинацитӕ: хуыздӕр спектакль, режиссеры хуыздӕр куыст ӕмӕ актеры хуыздӕр куыст.

Театралон коллективты арӕхстдзинадӕн аргъ кӕндзысты жюрийы уӕнгтӕ. Йе сконды уыдзысты куыд Культурӕйы министрадӕй, афтӕ паддзахадон театры артисттӕй. Уыдон аргъ кӕндзысты артистизм, актер йӕ фӕлгонц цасбæрцæй райхӕлдта, спектакль æвæрыны культурӕйӕн (декорацитӕ, костюмтӕ ӕмӕ ӕнд. ахӕмтӕ). Жюрийы тӕрхонмӕ гӕсгӕ фӕбӕрӕг уыдзысты 1-аг, 2-аг ӕмӕ 3-аг бынӕтты уӕлахиз-дзаутӕ, уыдон хорзӕхджын ӕрцӕудзысты грамотӕтӕ ӕмӕ призтӕй, ӕппӕт хайадисджытӕ та – дипломтӕй.

«Ӕппӕт дуне – театр» фыццаг хатт уагъд ӕрцыд 2014 азы, дыккаг хатт та 2017 азы. Уӕд фестивалы активон хайад райстой горӕты иумийагахуырадон скъолатӕ,  районты хъӕууон клубтӕ ӕмӕ культурӕйы хӕдзӕртты театралон коллективтӕ. Уыдон бацӕттӕ кодтой ӕмӕ сценӕмӕкӕсджыты рӕгъмӕ рахастой цымыдисон ӕмӕ арфхъуыдыджын спектакльтӕ ӕмӕ алыхуызон номинациты систы уӕлахиздзаутӕ.

Фестивалы хӕстӕ сты хӕдархайгӕ театралон аивад рапарахат кӕнын, театралон аивады сӕ курдиат ӕмӕ арӕхстдзинад чи ӕвдисы, уыдонӕн уавӕртӕ саразын, афтӕ ма Хетӕгкаты Къостайы сфӕлдыстад хуыздӕр базонын ӕмӕ Нарты кадджыты пропагандӕ кӕнын ӕмӕ сӕ бахъахъхъӕнын.

Зӕгъӕн ис, ахӕм фестивальты руаджы кӕй раргом вӕййынц ӕвзонг курдиаттӕ, театралон аивады ӕнтыстытӕ кӕмӕн ис, уыдонӕн та ноджыдӕр кӕй фӕзыны фадат сӕ фӕлтӕрддзинад фылдӕр кӕнынӕн.

Уӕдӕ чидӕриддӕр театралон аивадимӕ баст у, сомбоны йӕхи уыны театры артистӕй, уыдон иууылдӕр 15 ноябрмӕ сӕ куырдиӕттӕ ӕрбавдисӕд ӕмӕ 24 ноябры активон хайад райсӕд «Ӕппӕт дуне – театр»-ы.

КЪÆБЫСТЫ Зæринӕ