Нырыккон Информацион фæрæзты æхсæн иууыл рагондæр у периодикон прессæ.
Хуссар Ирыстоны дзыллон информацийы фæрæзты кусджыты боны цытæн, газетты нысаниуæг, æмæ бынаты тыххæй нын дзырдтой бæрæгбонгæнджытæ.
Джиоты Аленæ – газет «Южная Осетия»-йы редакторы хæдивæг:
– Скъолайы фæстæ фæнд кодтон физикон-математикон факультетмæ бацæуын, цалдæр хатты фæлварæнты фæстæ, фырмæстæй журналистикæйы факультетмæ (уым документтæ исыны æмгъуыд адарддæр кодтой) бадæттон мæ документтæ. Журналистикæйы факультеты фæуыны фæстæ кусынмæ бацыдтæн газет «Южная Осетия»-йы æхсæнадон-политикон хайады уацхæссæгæй. Уæд газеты куыстой ахæм номдзыд журналисттæ, куыд Джиоты Ульянæ, Гобозты Валери, Туаты Шота, Габаты Миша æмæ Цхуырбаты Залинæ. Мæ фыццаг уацтæ уыдысты фæсивæды проблемæты фæдыл, уый фæстæ сабыргай фыссын райдыдтон республикæйы æндыгъд политикон уавæримæ баст информацитæ. Мæ бон æй нæу зæгъын, цæмæн баззадтæн редакцийы кусгæйæ. Æвæццæгæн, мæ професси йæхимæ æрбалвæста. Уыцы рæстæджы нæ газеты бирæ æвзонг журналисттæ уыд: Абон уыдон нымад сты нæ республикæйы номдзыд журналисттыл: Джергаты Аллæ, Чилæхсаты Алыксандр, Уазæгты Юри æмæ Тыджыты Сослан. Уыдыстæм тынг æнгом, куыд иу бинонтæ, афтæ.
Къæбулты Маринæ – газет «Хурзæрин»-ы æхсæнадон-политикон хайады уацхæссæг:
– Ныртæккæйы дуджы интернеты тыгъдады алыгъуызон фæрæзтæ цасдæрбæрцæй баивтой мыхуыры фæрæзты куыст æмæ архайд. Фæлæ уæддæр мыхуыры фæрæзтæн ис сæхи ахадгæ æмæ егъау нысаниуæг æхсæнадон цардарæзтады.
Мыхуыры фæрæзтæ, историйы уæззау цалх куыд тулы, афтæ æмæ уыдон алы цауы æвдисæг дæр сты. Периодикон мыхуыры фæрæзтæ рæстæггай ивылынц архивтæм æмæ бахъуаджы рæстæджы къух аразынц, бæрæг рæстæджы цаутæ сахуыр кæнынæн.
Ивгъуыд аз Ирыстоны геноцидыл 100 азы сæххæсты цытæн мыхуыры фæрæзты руаджы уæрæх фадæттæ уыд архивты 1920 азы ирон адæмы ныхмæ геноцидыл дзурæг цаутæ ноджы лæмбынæгдæр сахуыр кæнынæн.
Фæлæ бæрæгбоны нæ дзырды сæр фылдæр нæ уарзон иунæг ирон æвзагыл мыхуырæй чи цæуы, ууыл у. Рæстæгæй рæстæгмæ нæ интеллигенцийы бирæ минæвæрттæ нæ бахæлæг кæнынц сæ уæздан æмæ хъарм ныхæстæ нæ уарзон газеты номыл. Ацы газет арвы рухс цæмæй фена, ууыл æрвылбон чи фыдæбон кæны, уыцы зиууæттæй бирæтæ рæнхъон кусæгæй Сæйраг редактормæ алы рæстæджыты сæ хъазуатон куысты тыххæй хорзæхджын цæуынц паддзахадон хорзæхтæй. Уый æмрæнхъ ацы газеты фæллойгæнгæйæ систы Хуссар Ирыстоны сгуыхт журналисттæ æмæ сæрбæрзондæй хæссынц уыцы ном.
Нæ хъæздыг газеты историйыл бирæ дзурæн ис, уымæн æмæ дæргъвæтин азты, кæм уæззау, кæм раст фæндæгтыл рацыд. Мах, газеты кусджытæ æгæрон бузныг æмæ райгонд стæм, газеты радон номыр арвы рухс куы фены, уæд æй дарддæр посты руаджы газеткæсджытæм чи хæццæ кæны, газетуæйгæнæн киоскты йæ чи парахат кæны, æппæт уыдонæй. Бирæ куыст æмæ хъарутæ хардз цæуы газет рафыссыныл дæр. Уыцы хъуыддаджы стыр хайбавæрд ис æрмæст йæ кусджытæн нæ, фæлæ агентад «Союзпечать», горæт æмæ районты посты хайадтæн. Уымæ гæсгæ мах алкæмæйдæр райгонд стæм æмæ сын æгæрон бузныджы ныхæстæ зæгъæм ноджыдæр.
Джергаты Аллæ – газет «Южная Осетия»-йы культурæйы хайады гæс:
– Журналистикæйы дæсныйадмæ кусынмæ æрбацыдтæн бирæ азты размæ нырма уыдтæн нæ университеты 3-æм къурсы уырыссаг филологийы факультеты студенткæ, афтæмæй. Газет «Южная Осетия»-мæ культрурæйы хайадмæ кусынмæ фæхуыдта уæды культурæйы хайады гæс уыди дзæнæттаг Габаты Миша. Арæх иу хайад истон университеты культурон мадзæлтты. Уыдтæн студентон клуб «Аполон»-ы уæнг. Иу ахæм мадзалы рæстæджы доклад куы кæсгæйæ мæ федта журналист Габаты Миша. Мадзалы фæстæ мæм æрбацыд æмæ мын загъта, цæмæй ахъуыды кæнон газеты куысты тыххæй. Уыцы хъуыдымæ æз тынг уæлæнгай ахаст равдыстон. Фæлæ цасдæр рæстæджы фæстæ журналистикæйы дæсныйады хи бафæлварыны фæдыл мын йæ хъуыды загъта мæ мад, Гуыцмæзты Эвелинæ, уый бирæ азты дæргъы кусы газет «Хурзæрин»-ы.
ТАНДЕЛАТЫ Вилена
