Æрæджы Республикæ Хуссар Ирыстон æмæ Луганскы Адæмон Республикæйы Базарадон-сæудæджерадон палатæты ‘хсæн цы сразыдзинад арæзт æрцыд, уый РХИ-йы Хицауады Сæрдар Пухаты Эрик схуыдта нæ республикæйы фадæтты ноджы иу рудзынг.
Ацы цаумæ сæхи куыд цæттæ кодтой æмæ дарддæр куыд рæздзысты республикæйы æддагонэкономикон бастдзинæдтæ, уый тыххæй радзырдта Хуссар Ирыстоны Экономикон рæзты министры хæдивæг Козаты Роин.
«Республикæйы къухдариуæгад тырны æддагон дунемæ рахизæнтæ рауæрæх кæнынмæ, Хуссар Ирыстоны адæмæн хæлар республикæтимæ æмкуысткæнынад рæзын кæнгæйæ. Уый тыххæй кусынц æрмæст Президент, министрадтæ æмæ ведомствоты къухдариуæггæнджытæ нæ, фæлæ æхсæнадон организацитæ дæр. Уыдонæй иу у Базарадон-сæудæджерадон палатæ, кæцыйæн йæ бон у йæхæдæг, йæхи сæрмагонд инициативæйæ, Фæсарæйнаг хъуыддæгты министрадты иувæрсты, æмкуысткæнынады ахастытæ араза æндæр бæстæты æнгæс организацитимæ.
Нæ Президент Бибылты Анатолийы бахæсмæ гæсгæ, Луганскы Адæмон Республикæимæ æмкуысткæнынад æнтыстджынæй рæзын райдыдта. Хуссар Ирыстоны Экономикон рæзты министр Кокойты Геннади æмæ мæхæдæг (уæд уыдтæн РХИ-йы Базарадон-сæудæджерадон палатайы къухдариуæггæнæг), ивгъуыд азы сентябры хайад райстам II Экономикон форумы Луганскы, кæцыйы фæзуатыл скъуыддзаг æрцыд Республикæ Хуссар Ирыстон æмæ Луганскы Адæмон Республикæйы Экономикон рæзты министрадты ‘хсæн сразыдзинады проект бацæттæ кæнын.
Луганскы Адæмон Республикæйы Экономикон рæзты министр Елена Костенко нын радзырдта сæ республикæйы Базарадон-сæудæджерадон палатæ саразыны плæнтты тыххæй æмæ Луганскы Адæмон Республикæйы къухдариуæгадимæ фембæлды рæстæджы уыцы фæндоны фарс рахæцыдыстæм. Мах иу рæстæджы цæттæ кодтам дыууæ Сразыдзинады проекттæ – министрадты æмæ палатæты ‘хсæн. Ацы азы февралы дыууæ республикæйы министрадтæ Луганскы сæ къухтæ æрфыстой Сразыдзинадыл.
Банысан кæнын хъæуы, нæ делегацийы нын куыд бæрзонд æмвæзадыл райстой, уый. Уыцы химæрайсты рæстæджы скъуыддзаг æрцыд дыууæ республикæйы Базарадон-сæудæджерадон палатæты ‘хсæн сразыдзинадыл къухтæ Хуссар Ирыстоны æрфыссын. Республикæ Хуссар Ирыстоны Базарадон-сæудæджерадон палатæйæн ног къухдариуæггæнæг æвзæрст куы æрцыд, уæд нысан æрцыд къухтæ æрфыссыны бон дæр. Æппæт цæттæгæнæн мадзæлттæ ауадзгæйæ, 6 июны Хуссар Ирыстон æмæ Луганскы Республикæйы Базарадон-сæудæджерадон палатæты къухдариуæггæнджытæ Æлборты Алан æмæ Анатоли Чех сæ къухтæ æрфыстой сразыдзинадыл.
Банысан кæнын мæ фæнды уый, æмæ РХИ-йы Базарадон-сæудæджерадон палатæйы архайдмæ раздæр йæ хъус нæ дардта республикæйы къухдариуæгад, фæлæ ацы организацийы фарсхæцынады æнæмæнгхъæуындзинады тыххæй абон хицауиуæгады æрдыгæй ис раст æмбарынад. Базарадон-сæудæджерадон палатæйы бæрны ис, продукци республикæйы уагъд кæй æрцыд, уый бафидар кæнын æмæ кæм арæзт æрцыд, уыцы бæстæйы æмбæлон сертификат ын радтын (СТ-1). Палатæйы фæрцы дунейы æппæт бæстæтимæ ис коммерцион архайд райдайæн. Зæгъæм, Цæгат Кипр йæ экономикæ аразы Базарадон палатæйы руаджы.
Ныртæккæ нæхи цæттæ кæнæм Уæрæсейы Федераци, Цæгат Ирыстон æмæ Абхазы ‘хсæн сразыдзинæдтæ сног кæнын æмæ Донецкы Адæмон Республикæйы Базарадон-сæудæджерадон палатæимæ сразыдзинадыл къухтæ æрфыссынмæ.
Æфсымæрон Цæгат Ирыстоны коллегæтимæ æмкуысткæнынады тыххæй сразыдзинады проект Хуссар Ирыстоны Экономикон рæзты министрад ныридæгæн арвыста РХИ-йы Фæсарæйнаг хъуыддæгты министрадмæ. Æнхъæлмæ кæсæм дзуаппмæ æмæ цæттæ стæм къухтæ йыл æрфыссынмæ.
Министрад йæхи цæттæ кæны фембæлдтытæм Донецкы Адæмон Республикæ æмæ Абхазимæ æмкуысткæнынады фадæттыл æруынаффæ кæныны тыххæй.
Президенты хæслæвæрд æххæст кæнгæйæ, мах æрмæст сразыдзинæдтыл нæ фыссæм нæ къухтæ, фæлæ ма цæттæ кæнæм реалон фæндæттæ дæр. Зæгъæм, фадат нын ис Луганскы Адæмон Республикæимæ иумиаг куыстуæттæ саразынæн, уый фæстиуæгæн фадат уыдзæн дыууæ фарсы иуæй-иу экономикон проблемæтæ аскъуыддзаг кæнынæн. Уымæй дарддæр ма нын Бибылты Анатоли банысан кодта къорд хæслæвæрды æмкуысткæнынады æндæр къабæзты. Уыдоныл мах ныридæгæн кусæм», – банысан кодта Козаты Роин.
РХИ-йы Хицауады официалон сайт
Comments are closed, but trackbacks and pingbacks are open.