Хуссар Ирыстон нæ ивы йæ позици – сæйраг документыл хъæуы къухтæ бафыссын

Ацы мæйы райдианы уагъд æрцыд Фæскавказы æдасдзинады фæдыл дунеон дискусситы радон раунд. Банысан кæнын хъæуы уый, æмæ Женевæйы дискусситæ уагъд цæуынц 2008 азæй фæстæмæ. Хуссар Ирыстон æмæ Абхазы æдасдзинад ифтонг кæныны фæдыл дунеон дискусситы фæлгæтты куыст цæуы Хуссар Ирыстон, Абхаз, Уæрæсе, Гуырдзыстон æмæ дунеон организациты минæвæртты хайадистæй.

Ацы аз фыццаг хатт цы раунд уагъд æрцыд, уым, традицимæ гæсгæ, хайад райстой уæлдæр ранымад бæстæты делегациты минæвæрттæ. Хуссар Ирыстонæй делегацийæн разамынд кодта РХИ-йы Президенты паддзахадон уынаффæгæнæг Коцты Константин. Банысан кæнын хъæуы уый, æмæ фембæлд уагъд кæй цыд дыууæ кусæгон къордты – æдасдзинады фæдыл æмæ гуманитарон фарстаты фæдыл.

Фæсконфликтон бæстонкæнынады фæдыл РХИ-йы Президенты Æххæстбарджын минæварады аппараты пресс-службæйæ нын куыд хъусын кæнынц, уымæ гæсгæ Хуссар Ирыстоны делегаци фæндон бахаста, цæмæй гуырдзиаг фарсимæ иумæ æрæвналой дыууæ республикæты æхсæн паддзахадон арæнты делимитаци æмæ демаркацийы фæдыл дыууæфарсон куыстмæ.

Консультациты рæстæджы нысан æрцыд, Женевæйы уагъдцæуæг дискусситæ кæй сты ахæм иунæг фæзуат, цыран уынаффæ фæцæуы, регионы стабилондзинад æмæ æдасдзинадыл негативонæй чи бандавдзæн, æмæ хъусдард цы фарстатæм æмæ тæссагдзинæдтæм хъæуы аздахын, уыдæттыл.

Куыд банысанчындæуыд, уымæ гæсгæ фыццаг кусæгон къорды сæйраг хъусдард здæхт æрцыд Хуссар Ирыстон æмæ Гуырдзыстоны паддзахадон арæнтыл регионы æдасдзинад æмæ стабилон уавæр ифтонг кæныны уæвæг фарстатæм.

Хуссар Ирыстонæй делегацийы хайадисджытæ уæлдай хъусдард аздæхтой Гуырдзыстоны ‘рдыгæй æдзухон провокацитæ кæй дарддæр кæнынц, паддзахадон арæнты режим нысанмæздæхтæй халыны факттæм æмæ паддзахадон арæнтæ сбæлвырд кæныны нысанæн инженерон арæзтæдты æнæмæнгхъæуындзинадмæ.

Женевæйы дискусситы хуссарирыстойнаг, абхазаг æмæ уæрæсейаг хайадисджытæ ноджыдæр хъусдард аздæхтой Хуссар Ирыстон æмæ Абхазы ныхмæ æфсæддон тыхæй пайда кæй нал æрцæудзæн, уыцы ахсджиаг документыл бакусынмæ.

Хуссарирыстойнаг делегаци куыд банысан кодта, афтæмæй сæ документæй ныфс ис Гуырдзыстоны ‘рдыгæй Хуссар Ирыстоны æдасдзинады фидар гарантитæ ифтонг кæнынæй. Уымæй дарддæр ма тыхстдзинад равдыстой Гуырдзыстоны территорийыл НАТО-йы уæвынад кæй парахат кæны æмæ Гуырдзыстоны æфсæддон потенциал дарддæр кæй хъомысджын кæны, уый фæдыл. Уый, гæнæн ис, æмæ Гуырдзыстоны разамынады сразæнгард кæна æнæраст къахдзæфтæ саразынмæ.

Уымæ гæсгæ фембæлды хуссарирыстойнаг хайадисджытæ банысан кодтой, НАТО-йы контингенты хайадистæй æфсæддон ахуыртæ Хуссар Ирыстоны арæнтæм æввахс уагъд кæй цæуынц, уыдон регионы стабилондзинад æмæ æдасдзинадæн кæй сты тæссагдзинад хæссæг.

Пресс-службæйæ куыд хъусын кæнынц, уымæ гæсгæ дискусситы рæстæджы банысан кодтой, дыууæ бæстæты арæнтæм хæстæг уагъд чи фæцæуы, уыцы Инциденттæ ма æруадзын æмæ сæм хъусдард здахыны фæдыл механизмты эффективондзинад æмæ нысанмæздæхт куыст. Банысан кæнын хъæуы уый, æмæ ацы механизмты куыст архайы Женевæйы дискусситы фæлгæтты æмæ у гуырдзиаг-хуссарирыстойнаг арæнты районы стабилондзинад æмæ æдасдзинад ифтонг кæныны фактор. Мæханизмты фæлгæтты «тæвд хахх»-ы руаджы эффективонæй бæстон цæуынц бирæ æнæаргъæвгæ фарстатæ.

Æххæстбарджын минæварады аппаратæй куыд хъусын кæнынц, уымæ гæсгæ дыккаг кусæгон къорды уынаффæ цыд гуманитарон фарстатыл. Æдасдзинад æмæ гуманитарон ахсджиаг уавæры фæдыл уынаффæ цыд, Республикæ Хуссар Ирыстоны æмбæстæгтæй Гуырдзыстоны территорийыл æбæрæгæй чи фесæфт æмæ гуырдзиаг тыхон структурæтæ кæй адавтой, уыдон ссарыныл.

Стыр хъусдард здæхт æрцыд Хъазбеджы районæй – Тырсыгомæй рацæугæ ирæтты бартæ Гуырдзыстон гуымир æгъдауæй кæй халы. Цалдæр азы уыдонæн сæ райгуырæн хъæубæстæм бацæуынæн фадат нæй.

Лигъдæтты проблемæйы фæдыл уынаффæ цæудзæн, Гуырдзыстон барæй фарст политизаци кæныныл куынæуал фæлвара, уæд.

Нæ уацх.