Уынаффæ цыд традицион фарстатыл

Фæскавказы æдасдзинад æмæ стабилондзинады фæдыл дунеон дискусситы радон 61 раунд уагъд æрцыд Женевæйы ацы аз 25-26 июны. Куыд зонæм, уымæ гæсгæ уыдон уагъд цæуынц 2008 азы 12 август æмæ 8 сентябры Медведев-Саркозийы сразыдзинадмæ гæсгæ. Традицимæ гæсгæ фембæлды хайад райстой Республикæ Хуссар Ирыстон æмæ Абхазы Республикæты, Гуырдзыстон, Уæрæсейы Федераци минæвæрттæ æмæ Евроцæдис, ИНО æмæ ЕÆÆО-йы æмсæрдæрттæ.

Хуссарирыстойнаг делегацийы сæргъ уыд РХИ-йы Президенты Паддзахадон уынаффæгæнæг Коцты Константин.

Паддзахадон арæнтæ æмæ

механизмты куыст

Дунеон дискусситы хайадисджытæ банысан кодтой, разы кæй сты Женевæйы дискусситы форматы куыст адарддæр кæныныл. Æдасдзинады планы Хуссар Ирыстон æмæ Гуырдзыстоны ‘хсæн паддзахадон арæнтыл уавæрæн аргъ æрцыд, куыд бæрæг стабилон, афтæ.

Дискусситы рæстæджы æвæрццаг аргъ æрцыд Инциденттæ ма æруадзын æмæ сæм хъусдард здахыны фæдыл механизмты архайдæн, уымæн æмæ уыдон сты хуссарирыстойнаг-гуырдзиаг арæнты районы æдасдзинад æмæ стабилондзинад ифтонг кæныны ахсджиаг фактор. Нысан ма æрцыд, Механизмты фæлгæтты цы «тæвд хаххы» бастдзинад архайы, уый ахадæн куыст.

Хуссарирыстойнаг æмæ уæрæсейаг минæвæрттæ ногæй æрсидтысты гуырдзиаг фарсмæ, цæмæй æрæвналой Республикæ Хуссар Ирыстон æмæ Гуырдзыстоны æхсæн паддзахадон арæнты делимитаци æмæ уый фæстæ демаркацийы иумиаг куыстмæ. Уыцы куыст конд куы æрцæуа, уæд уымæй фæкъаддæр уыдзысты арæнгæрон инциденттæ æмæ æрбиноныг уыдзæн стабилон уавæр.

Дискусситы рæстæджы хуссарирыстойнаг, абхазаг æмæ уæрæсейаг хайадисджытæ ноджыдæр фехъусын кодтой, зæгъгæ, Гуырдзыстоны ‘рдыгæй æдасдзинад эффективонæй ифтонг кæнын домы,  Хуссар Ирыстон æмæ Абхазы ныхмæ тыхæй пайда кæй нал æрцæудзæн, уыцы юридикон бæрнджын документыл къух æрфыссын.

Гуманитарон фарстатæ

Женевæйы дискусситы лæмбынæг ныхас цыд гуманитарон фарстатыл. Сæйраг хъусдард здæхт æрцыд, Хуссар Ирыстонæй æбæрæгæй сæфт цы æмбæстæгтæ сты, уыдон хъысмæт сбæрæг кæныны ахсджиаг фарстмæ. Хуссарирыстойнаг делегаци фехъусын кодта, æнæмæнгæй кæй хъæуы æбæрæгæй сæфт æмбæстæгты хъысмæт рабæрæг кæныны фæдыл куыст фæактивон кæнын. Æрсидтысты гуырдзиаг фарсмæ, ацы проблемон фарст бæстон кæныны тыххæй практикон æмæ нысанмæздæхт къахдзæфтæ саразынмæ.

Лигъдæтты проблемæтæ

Серьезон хъусдард ма здæхт æрцыд, Хъазбегы районы, ома, Тырсыгомæй рацæуæг ирæтты бартæ Гуырдзыстоны ‘рдыгæй гуымир æгъдауæй дарддæр хæлд кæй цæуынц, уымæ – дæргъвæтин азты дæргъы уыдонæн нæ дæттынц сæ райгуырæн бынæттæм бацæуыны фадат.

ИНО-йы Генералон Ассамблей æнæ Хуссар Ирыстон æмæ Абхазы хайадистæй лигъдæтты проблемæты фæдыл радон политизацигонд резолюци кæй райста, уый тыххæй хуссарирыстойнаг æмæ абхазаг хайадисджытæ Гуырдзыстоны инициативæйы тыххæй банысан кодтой иумиаг хъусынгæнинаджы деструктивон характер. Уый иппæрд кæны, лигъдæтты æмæ æбарвæндонæй сæ цæрæн бынæттæ чи ныууагъта, уыдон алыварсон проблемæты фæдыл уынаффæ кæныны мидис.

Хуссарирыстойнаг делегацийы минæвæрттæ ма куыд хъусын кæнынц, уымæ гæсгæ сæ хъуыдытæ раразмæ кодтой къорд гуманитарон фарстаты фæдыл.

Женевæйы дунеон дискусситы радон фембæлд ауадзын нысан æрцыд ацы азы кæрон.