Хуссарирыстойнаг богал Пухаты Роланд бронзæйон призер ссис 18 азы онг кæуыл цæуы, уыцы спортсменты ‘хсæн Европæйы чемпионаты. Тренер Коцты Тамерланы хъомылгæнинаг æртыккаг бынат бацахсыны сæраппонд тохы 11:6 хыгъдæй фæуæлахиз Украинæйы минæвар Юрий Пигульскийыл. Роландæн ахæм æнтыст йæ къухы бафтыд 92 кг уæзы категорийы.
Ерысты ма ирон богалтæй расгуыхт Хъесаты Алдат. Уый фыццаг бынат бацахста 80 кг уæзы категорийы. Уый финалы рамбылдта Гуырдзыстоны минæвар Николоз Майсурадзейы – 7:4.
БОКС
Ирон боксер Итониаты Самирæ ссис 15-16-аздзыд спортсменты ‘хсæн Европæйы чемпионкæ. Ерыстæ уагъд цыдысты Босни æмæ Герцеговинайы столицæ Сараевойы. Самирæ 80 кг уæзы категорийы архайгæйæ, финалы фæуæлахиз Литвайы минæвар Эвелина Лесикыл æмæ ссис ерысты сыгъзæрин майданы хицау.
НОМАРÆН ТУРНИР
Дагъыстаны уагъд æрцыд Советон Цæдисы спорты сгуыхт дæсны Али Алиевы номарæн дунеон турнир уæгъдибар хъæбысхæстæй. Ерысты хайад райстой ирон богалтæ дæр. 61 кг уæзы категорийы фыццаг бынат бацахста Тауитты Чермен. Уый финалы 5:5 хыгъдæй фæуæлахиз Пермы спортивон кад хъахъхъæнæг Амед Зубайровыл. Ирон сопртсментæй ма сыгъзæрин майданы хицау ссис Грецийы тырысайы бын архайæг Хосонты Азæмæт. Уый 125 кг уæзы категорийы финалы 4:0 хыгъдæй рамбылдта дагъыстайнаг Сайд-Хасан Ахматовы.
Ерысты æвзист призертæ та систы Сербийы спортивон кад хъахъхъæнæг Тускъаты Азæмæт (57 кг) æмæ Хъарданты Магомет (74 кг).
Бронзæйон призер та ссис Найфонты Алан (86 кг).
ХУРИТЫ Батрадз
