Сæрд ис йæ тæмæны æмæ скъоладзаутæ хъæлдзæгæй æрвитынц сæ сæрибар рæстæг. 13-æм июлы Дзауы астæуккаг скъола-интернаты базæйыл байгом ис сывæллæттæн спортивон-хосгæнæн лагерь «Фарн», кæцыйæн бацæттæгонд æрцыд сæрмагонд программæ.
Республикæ Хуссар Ирыстоны Ахуырад æмæ зонады министрады кусæг æмæ лагеры организатор Буджиты Зæринæ нын куыд радзырдта, уымæ гæсгæ лагеры улæфынц 45 сывæллоны. Бынаты сын ис æмбæлон уавæртæ æмæ цух ницæмæй æййафынц.
«Мах аскъуыддзаг кодтам, цæмæй лагер байгом уа нæ республикæйы рæсугъддæр районтæй сæ иуы – Дзауы районы. Ам Советон дуджы дæр куыстой сæрдыгон улæфæн лагертæ æмæ-иу сывæллæттæ сатæг уæлдæфмæ æрвыстой хъæлдзæгæй сæ рæстæг. Мах развæлгъау улæфджытæн бацæттæ кодтам хатæнтæ æмæ сын сарæзтам сæ рæстæг æрвитынæн хорз уавæртæ. Сывæллæттæн хæрын кæнынц бон цыппар хатты.
«Мах фыццаг рады райстам иуæндæсæй цыппæрдæс азы онг кæуыл цæуы, ахæм ахуыргæнинæгты, уыдон сты нæ республикæйы горæт æмæ районты скъоладзаутæ. Лагерь «Фарн»-мæ айстам æххуысхъуаг æмæ бирæсывæллонджын бинонты сывæллæтты», – загъта министрады кусæг.
Зæринæ ма нын куыд загъта, уымæ гæсгæ министрад лагермæ фæхуыдта Донбассæй Цхинвалы рæстæгмæ чи цæрынц, уыцы бинонты сывæллæтты дæр, фæлæ уыдонæй лагеры улæфынц æрмæстдæр дыууæйæ.
Скъола-интернаты улæфджыты программæ у цымыдисон, ис дзы би-рæ хиирхæфсæн мадзæлттæ. Райсомæй сывæллæттæн сæ раздзогтæ ауадзынц физкультурæ, аходæн бахæрынц. Уый фæстæ къордтæ фæисынц хайад алыгъуызон конкурсты æмæ хиирхæфсæн мадзæлтты. Алы изæр та сын вæййы дискотекæтæ.
Улæфджытæй сæ иу Илонæ дæр иннæтау тынг цин кæны лагермæ йæ кæй айстой, уый тыххæй æмæ ныр бæллы, цæмæй лагеры ссара ног æмбæлттæ æмæ иумæ хъæлдзæгæй ар-витой сæ улæфты рæстæг.
ЦХУЫРБАТЫ Лизæ
ХИПУ-йы журналистикæйы факультеты
3-æм курсы студенткæ
