Фыдыбæстæ хъахъхъæнæджы боны цытæн уагъд æрцыд Цхинвалы районы гом турнир стъолы тенни-сæй. Ерыстæ уагъд æрцыдысты Цхинвалы скъола-интернаты. Уырдæм хуынд æрцыдысты æрмæст Цхинвалы районы æвзонг спортсментæ нæ, фæлæ ма республикæйы иннæ районты минæвæрттæ дæр.
«Сфæнд кодтам нæ турнирмæ республикæйы иннæ районты дæр фæхонын. Уыдонæн уыцы хъуыддаг уыд æхсызгон. Ахуырдзаутæ æвдисынц уæлахизмæ стыр тырнындзинад», – загъта Цхинвалы районы администрацийы спорты хайады сæргълæууæг Бестауты Къæдзæх.
Чемпионаты хайад райстой республикæйы районтæ иууылдæр. Ерысты фыццаг хатт хайад райста Ленингоры районы командæ. Районы спортивон кад хъахъхъæдтой Хуриты Гивийы номыл Цъинагары астæуккаг скъолайы ахуырдзаутæ. «Нæ командæйы сконды хъазынц нæ районы иууыл тыхджындæр теннисисттæ. Æвдисынц хорз цæттæдзинад. Иу хъазт дæр нæ фæхæрд сты», – банысан кодта Цъинагары скъолайы физикон культурæйы ахуыргæнæг Бестауты Эмзар.
Чемпионаты уагæвæрдмæ гæсгæ лæппутæ сæ цæттæдзинад фæлвæрдтой командон ерысты. Чызджытæ та – индивидуалон ерысты.
Лæппуты ‘хсæн аккаг ныхмæлæууæг нæ разынд Цъинагары астæуккаг скъолайы командæйæн, дыккаг бынат дæр бацахста ацы скъолайы дыккаг командæ æмæ æртыккаг бынатыл та ацыдысты Къостайыхъæуы скъолайы ахуырдзаутæ.
Чызджыты ‘хсæн фæуæлахиз цъинагайраг Джиголаты Аннæ, дыккаг ссис Дменисы хъæуы минæвар Джиголаты Аланæ æмæ æртыккаг бынат та бацахста Дменисы командæйы иннæ уæнг Лика Динарашвили. Ерысты уæлахиздзаутæ æмæ призертæ хорзæхджын æрцыдысты майдантæ, кады грамотæтæ æмæ зæрдылдарæн лæвæрттæй.
ХУРИТЫ Батрадз
Comments are closed, but trackbacks and pingbacks are open.