Рæхджы Хетæгкаты Къостайы номыл Хуссар Ирыстоны паддзахадон драмон театр абалц кæндзæн Национ театрты æппæтуæрæсейаг фестиваль «Федерация»-мæ, кæцы ацæудзæнис Цæцæны Республикæйы столицæ Грознæйы. Уым нæ театр равдисдзæн Хуыгаты Георы пьесæмæ гæсгæ æвæрд спектакль «Сау нымæт». Уый тыххæй нын фехъусын кодтой театры пресс-службæйы.
Спектакль «Сау нымæт» нырма равдисдзысты нæ театры сценæйыл 6-æм сентябры. Грознæмæ та афæндараст уыдзысты фæстæдæр æмæ йæ равдисдзысты 10-æм сентябры. Спектаклы чи хъазы, уыцы актерты сконд чысыл фæивта. Халоны ролтæ Гаглойты Эдуарды бæсты сæххæст кæндзæн Къозонты Давид.
«Спектакль «Сау нымæт» ма Цæцæны Республикæйы æвдыст æрцыд ивгъуыд аз «Хуссар Ирыстоны культурæйы бонтæ»-йы фæлгæтты æмæ адæмы зæрдæмæ тынг фæцыд», – банысан кодтой пресс-службæйы.
Фестивалы фæлгæтты артисттæн организацигонд цæудзысты сфæлдыстадон фембæлдтытæ, мастер-къластæ, дискусситæ æмæ æндæр ахæмтæ.
Национ театрты æппæтуæрæсейаг фестиваль сорганизаци кодтой Уæрæсейы Федерацийы Культурæйы министрад, Цæцæны Республикæйы хицауад æмæ Театралон архайджыты цæдис.
Фестивалы хайад райсдзысты 13 театры бæрц Уæрæсейы æндæр æмæ æндæр регионтæй.
ЦХУЫРБАТЫ Ларисæ
