Куыд ивгъуыд азты, афтæ та ныр дæр Республикæ Хуссар Ирыстоны Фæсивæды политикæ æмæ спорты комитеты хъæппæрисæй хуссарирыстойнаг рæзгæ фæлтæрæн организацигонд æрцыд сæрдыгон фæсивæдон этнолагерь. Уый, сæйраджыдæр, уагъд цæуы паддзахадон комплексон программæ реализаци кæныны фæлгæтты, кæцы баст у рæзгæ фæлтæры удварнон-хæрзæгъдауон хъомыладимæ. Этнолагеры сæйраг нысан у фæсивæдæн се ‘ргом аздахын нæ рагфыдæлты историон æмæ культурон бынтимæ базонгæ кæнын. Лагеры хайад райсын сæ бон у 14 азæй 18 азы онг кæуыл цæуы, ахæм кары фæсивæдæн.
Фæсивæдон политикæ æмæ спорты комитет аскъуыддзаг кодтой, цæмæй этнолагерь байгом кæной 25-æм июлы Дзауы районы рæсугъддæр бынæттæй сæ иу – Наниты (Начърепайы) хъæуы. Сæ пресс-службæйы нын куыд фехъусын кодтой, уымæ гæсгæ лагеры фыццаг фæлтæрмæ сæ бон у райсын 60 адæймаджы бæрц.
Этнолагерь цæй тыххæй арæзт цæуы æмæ фæсивæды раз цы хæстæ лæууынц, уыдон тыххæй нын комитеты пресс-службæйы хистæр Авагимова Эллæ радзырдта, зæгъгæ, горæты фæсивæд сæ сæрдыгон рæстæг хъæлдзæг æмæ цымыдисонæй кæм арвитой, уый фадат сын кæй нæй уымæ гæсгæ радон хатт реализацигонд цæуы этнолагеры проект. «Этнолагеры программæ цымыдисон у, фыццаджыдæр, уымæй æмæ дзы фæсивæды æргом фылдæрбæрцæй кæй здахæм ирон адæмы истори, культурæ æмæ традицитæм. Уымæй дарддæр ма йæм бахастам ахуырадон, спортивон-туристон æмæ хиирхæфсæн программæ. Улæфджытæ бынаты практикон æгъдауæй зонгæ кæндзысты национ къæбицы сусæгдзинæдтимæ. Фæсивæд хъуамæ зоной нæ бæстæйы географи, хъæуты цард, нæ фыдæлты истори, культурæ æмæ афтæ дарддæр. Фæсивæдæн сæ улæфты рæстæджы фадат уыдзæнис, цæмæй туристон балцыты цæуой уыцы комы историон æмæ фенддагдæр бынæттæм», – банысан кодта уый.
Уый размæ азты дæр-иу Фæсивæдон политикæ æмæ спорты комитеты хъæппæрисæй фæсивæдæн этнолагертæ организацигонд цыдысты Дзауы скъола-интернаты базæйыл Хъеуселт, Ерман, Едыс, Эрцъо, Къоз æмæ æндæр хæххон хъæуты æмæ-иу сын кæддæриддæр бацæттæ кодтой цымыдисон программæтæ. Уæд-иу сæ программæйы уыд ирон национ хъæзтытæ, ирон хъазт, фат æмæ æрдынæй æхсын, кастысты-иу сын лекцитæ ирон литературæйы классикты цард æмæ сфæлдыстады тыххæй.
Ахсджиаг хъуыддаг у, цæмæй схъомыл кæнæм хорз, активон æмбæстæгты, кæцытæ бахъахъхъæной æмæ райтынг кæной нæ ирон адæмы культурæ æмæ традицитæ, æндæр адæмты æмæ культурæты æмрæнхъ цæуой размæ æмæ афтæмæй дунейæн зонгæ кæной Ирыстоны фарн, кад æмæ æгъдау.
Нæ уацх.
