Сæ тæмæны сты БАМ-ы районы хæдзæртты алыварс территориты хæрзарæзтадон куыстытæ.
Ам дæр куыстытæ райдыдта «Водоканал». Зæххы быны коммуникацитæ раивын æнæмæнг хъуыддаг у, уымæн æмæ æнæ уыдон бакæнгæйæ асфальт скæнæн нæй. «Уыцы иурæстæджы кусæм доны хæтæлтыл дæр. Уыдон дæр бирæ рæтты раст иу нæ уыдысты æмæ-иу арæх сæвзæрд проблемæтæ цæрджытæн. Раздæр уыцы фарстатæм фаг хъусдард нæ цыд æмæ-иу бахъуыд уынг фæстæмæ скъахын.
Кусджытæ иууылдæр бынæттон сты, кусынц æнæзæрдæхудтæй. Уыдис афтæ дæр æмæ-иу æрхонгæ кусджытæ зæххыбын коммуникациты арæзтады рæстæджы бахъыгдардтой газ æмæ рухсыты хæххытæ. Ныр мах зæхх куы фæкъахæм, уæд нæ уæлхъус фæлæууынц газ æмæ электрохызæджы кусджытæ æмæ уый бирæ-бæрцæй æнцондæр кæны куыст», – загъта нын ацы уынджы куыстыты æххæстгæнæг.
«Водоканал»-ы кусджытæ дæр куыд зæгъынц, афтæмæй сын «Комавтодор»-имæ хорз кусæгон ахастытæ ис. «Цы куыстытæ бакæнæм, уыдон гуырахстджын сты. Нæ куысты ма фембæлæм ахæм проблемæйыл дæр, æмæ-иу бирæ азты дæргъы, цæрджытæ, цæмæй уынгты дон ма бадтаид, уый тыххæй уынджы æркалд-той хуыр. Уый аххосæй бахъыгдард сты канализацион люкты æмбæрзтытæ, фезмæлыдысты сæ бынæттæй æмæ байдзаг сты хуыр æмæ бырæттæй. Мах дывæр куыст кæнæм ныр», – радзырдта Лалыты Сослан.
Уынджы арæзтады рæстæджы ма фæндагаразджытæ фембæлынц мæнæ ахæм прлоблемæйыл: бæлæстæй бирæты бахъæуы ралыг кæнын æмæ уый та цæрджыты нæ фæфæнды. Фæлæ канализацион хæтæлтæ раст æвæрд куынæ æрцæуой бæлæсты уидæгты аххосæй, уæд та фидæны уый расайдзæнис ног проблемæтæ. Уымæ гæсгæ аразджытæ курæг сты цæрджытæй, цæмæй сын сæ куыст æнæаиппæй, æнæзæрдæрхудтæй бакæнынæн цæлхдуртæ ма аразой.
Аразджыты ма хъыг дардтой кæртыты цы æнæзакъонæй арæзтæдтæ æмæ æфсæн гаражтæ уыдис, уыдон дæр. Рахицæн сын кодтой фæсфæд ран бынат æмæ сæ уым сæвæрдтой, бар сын радтой, фæстæдæр уым блокæй гаражтæ саразынæн. Уый тыххæй дæр-иу рауад хъаугъатæ, фæлæ ныр куы федтой цæрджытæ, уынг аив рауад, уæд сæ цинæн кæрон нал ис.
Уазæгты Марфа
