Республикон рынчындоны эндоскопион хайады диагностикон гæнæнтæ уæрæхдæр кæнынц, ног ифтонггæрзтæ практикæйы биноныг кæнгæйæ. Ныртæккæ цалцæг цы хатæнтæ цæуынц, уым æвæрд цы ног аппараттæ æрцæудзысты, уыдоны нымæцы сты бæрзонд-гъæдджын эндоскоптæ (япойнаг рауагъд), гастроскоптæ, колоноскоптæ, бронхоскоптæ.

Республикон рынчындоны сæйраг дохтыр Кокойты Маирбег куыд банысан кодта, уымæ гæсгæ хайад байгом уыдзæн æввахсдæр бонты. Хайад куыд цæттæ цæуы, уый бабæрæг кодта къамис, кæцыйы скондмæ бацыдысты социалон фарстыты фæдыл РХИ-йы Президенты уынаффæгæнæг Сиукъаты Родион, Æнæниздзинад хъахъхъæныны министры хæдивæг Плиты Агуындæ æмæ Хуссар Ирыстоны æнæниздзинады фæдыл уынаффæгæ-нæг, профессор Игорь Галь.

Игорь Галь куыд радзырдта, уымæ гæсгæ æввахсдæр бонты Цхинвалмæ æрцæудзæн эндоскопийы фæдыл уæрæсейаг специалист нырыккон стандарттæм гæсгæ хайады куысты дарддæры рæзты тыххæй.

«Мах фæнд кæнæм нырыккон, размæдзыд эндоскопион службæ саразын, кæцыйы гæнæнтæ ницæмæй къаддæр уыдзысты уæрæсейаг æмæ æндæр фæсарæйнаг раззагон клиникæтæй», — банысан кодта уый.

Эндоскопион службæйы сæйраг специалист суыдзæн æвзонг специалист — дохтыр Козаты Заринæ, кæцы каст фæцис уæрæсейаг хуыздæр медицинон институттæй сæ иу. Абон уый активонæй архайы организацион фарстытыл. «Ифтонггæрзты тыххæй нын нæ фаг кæнынц usb-камерæтæ. Уыдон хъæуы самал кæын. Уый фиксаци кæны æмæ нывы равдисы компьютеры мониторыл. Дарддæр æппæт фыстыты гæнæн ис спайда кæнын быцæуы уавæрты равзарынæн, клиникон æмæ ахуырадон нысæнттæн», — радзырдта уый.

Игорь Галь бамбарын кодта, зæгъгæ ма рынчындоны план цæуы конференц-зал сифтонг кæнын дæр, цыран арæзт æрцæудзысты уавæртæ вазыгджын диагностикон цауты рæстæджы цæстуынгæйæ æркæсынмæ. Нырыккон информацион фæрæзтæй пайда кæнгæйæ, гæнæн уыдзæн вазыгджын диагностикон цауты рæстæджы бæстон анализ саразынæн, æндæр клиникæты, сæ коллегæтимæ кæрæдзийæн сæ фæлтæрддзинад амонгæйæ, нырыккон æмвæзадал клиникон конференцитæ уадзын.

Галь ма банысан кодта гъæдджын диагностикæйæн эндоскопион иртасæнты бæрзонд нысаниуæджы тыххæй.  «Хайад фæуæрæхдæр кæнынимæ диагностикон æмæ хосгæнæн гæнæнтæ уы-дзысты бæрзонд æмвæзадыл. Уый ахъаз кæндзæн уымæн, æмæ мах нал хъæудзæн диагностикон æххуысы тыххæй республикæйæн æддейæ медицинон уагдæт-тæм хатын», — банысан кодта уый.

Æвзонг специалист Козаты Заринæ ныридæгæн аразы хайады куысты план æмæ æрæвналдзæн конкретон мадзæлттæ среализаци кæнынмæ.

Comments are closed, but trackbacks and pingbacks are open.