Президент Тыбылты Леонид фембæлд Хуссар Ирыстоны сæйраг горæты микрорайон «ЦАРЗ»-ы цæрджытимæ.

Фембæлды рæстæджы паддзахады сæргълæууæг æрæмбырдуæвджытæн радзырдта нысаниуæгджын политикон ивындзинæдты тыххæй, кæцытæ бахæццæ сты практикон æгъдауæй бæстæйы цардархайды алы фадыгмæ дæр. Фæлæ, йæ ныхæстæм гæсгæ, уый афтæ нæ нысан кæны, æмæ нæ къухы цы бафтыд, ууыл æрлæууын хъæуы.

«Уæ зæрдыл ма æрлæууын кæнут, мах ам спортивон зал куы гом кодтам, уæд æз банысан кодтон, 2017 азы кæй æрæвналдзыстæм микрорайоны сæйраг проблемæ практикон æгъдауæй аскъуыддзаг кæнынмæ. Уыцы проблемæ та у, ардæм цы уынгтæ цæуы, уыдон сасфальт кæнын. Уый гуырахстджын куыст у, фæлæ хъуамæ æххæст æрцæуа», – фехъусын кодта Президент.

Уый куыд банысан кодта, афтæмæй зонгæ у, микрорайон нуазыны донæй æмбæлон æгъдауæй ифтонг кæй нæу, уыимæ дæр, фæлæ зæгъгæ, ацы проблемæ скъуыддзаг æрцæудзæн, куыддæриддæр ацы уынгты цалцæг кæнын райдайой афтæ. Ома, уæд ивд æрцæудзысты инженерон коммуникацитæ æмæ уый фæстиуæгæн фæхуыздæр уыдзæн нуазыны доны гъæд дæр.

Уыимæ иумæ Тыбылты Леонид радзырдта Уæрæсейы Федерациимæ æмцæдисон ахастыты тыххæй, афтæ ма Уæрæсейы æххуысæй Хуссар Ирыстоны цард кæй хуыздæр кæны æмæ республикæйы цæрджыты царды æмвæзад кæй бæрзонддæр кæны, уый тыххæй дæр.

«Уыдон се ‘ппæт дæр сты, 2015 азы 18 марты Республикæ Хуссар Ирыстон æмæ Уæрæсейы Федерацийы ‘хсæн Æмцæдисад æмæ интеграцийы тыххæй бадзырдыл къухтæ фыст кæй æрцыд, уый фæстиуджытæ. Йæ реализацийыл дарддæр дæр куыст цæудзæн. Кæй зæгъын æй хъæуы, уый æвæрццагæй бандавдзæн нæ æмбæстæгты цардыл», – загъта уый.

Сæ рады микрорайон «ЦАРЗ»-ы цæрджытæ бузныджы ныхæстæ загътой паддзахады сæргълæууæгæн, республикæйы хорзæрдæм ивындзинæдтæ кæй æрцыд, уый тыххæй дæр æмæ æндидзынады æнтыстджын процессы тыххæй дæр, афтæ ма йын загътой, ныфс сæ кæй ис, æмæ тагъд рæстæджы уыдон дæр лæгъз æмæ сыгъдæг фæндæгтæ æмæ тротуарты циндзинад кæй банкъардзысты.

Дарддæр паддзахады сæргълæууæг дзуаппытæ радта, микрорайоны цæрджытæ йæм цы фарстатæ лæвæрдтой, уыдонæн. Цæрджыты цымыдис кодта Хуссар Ирыстоны референдумы фарст, афтæ ма банысангонд плебисциты фарст дæр. Ацы фарстатæн Президент радта лæмбынæг æмæ гуырахстджын дзуаппытæ.

«Мах бирæ консультацитæ æмæ æмбырдтæ ауагътам, бирæ фæуынаффæ кодтам, æмæ мæн фидарæй уырны, ацы историон цау нæ бæстæйæн фадат кæй ратдзæн, сæрыстыр кæмæй стæм, йæ уыцы историон ном – Паддзахад Алани раздахынæн. Уыимæ иумæ ма мæ банысан кæнын фæнды, уыцы-иу рæстæджы мах нæ къух кæй нæ исæм нæ паддзахады ныры ном – Республикæ Хуссар Ирыстоныл дæр, уымæн æмæ нæ нымад хæдбардзинадмæ дæргъвæтин фæндагыл уыцы номимæ рацыдыстæм», – загъта Тыбылты Леонид.

Республикæ Хуссар Ирыстоны Президенты официалон сайт

Comments are closed, but trackbacks and pingbacks are open.