Уæрæсейы хуссар хайы нывгæнджыты æхсæнрегионалон симпозиум «Национальный колорит единой страны. Южная палитра»-йы хайадисджытæ æрцыдысты Хуссар Ирыстонмæ.  Уазджытыл Дзауы поселочы  фембæлдысты Дзауы районы администрацийы минæвæрттæ, сæ сæргъ Магкоты Уырызмæг, афтæмæй, ирон æгъдаумæ гæсгæ – æртæ уæлибых æмæ бæгæныйы дзаггарзимæ.

Уый фæстæ симпозиумы хайадисджытæ æрцыдысты республикæйы столицæ Цхинвалмæ æмæ сæ йæхимæ райста Президент Бибылты Анатоли. Делегацийы сконды уыдысты фонд «Арт-Кавказ»-ы сæрдар Николай Хлынцов, Уæрæсейы Федерацийы адæмон нывгæнæг, Уæрæсейы нывгæнджыты академийы академик Николай Боровской, Уæрæсейы Федерацийы сгуыхт нывгæнæг Петр Радимов, Республикæ Хуссар Ирыстоны адæмон нывгæнæг, Уæрæсейы нывгæнджыты академийы уæнг-корреспондент Козаты Ушанг. Фембæлды ма уыд РХИ-йы Культурæйы министр Зассеты Жаннæ.

Паддзахады сæргълæууæг бузныджы ныхæстæ загъта уазджытæн, Хуссар Ирыстонмæ се ‘рцыды тыххæй æмæ банысан кодта, зæгъгæ, хуызфыссынад, афтæ ма хуссарирыстойнаг нывгæнджыты куыстытæ кæддæриддæр кæй æвзæ-рын кодтой цымыдисдзинад æмæ уый та зæрдæйæн у æхсызгон.

«Стыр бузныг ардæм æрцæуыны фæдыл уæ инициативæйы тыххæй. Уырны мæ, симпозиумы куыст кæй ацæудзæн бæрзонд æмвæзадыл. Не ‘хсæн цы æнгом бастдзинæдтæ ис, уыдон дарддæр дæр рæздзысты. Фæнды мæ бузныг уын зæгъон уæ архайды, афтæ ма уыцы къахдзæфты тыххæй, кæцытæ сты нæ паддзахадты ‘хсæн  интеграцион мадзæлтты хай», – загъта Президент.

Йæ рады Николай Хлынцов радзырдта, Хуссар Ирыстоны нывгæнджытимæ кусынæн сæм цы плæнттæ ис, уыдоны тыххæй.

«Мах цæттæ стæм иумиаг мадзæлтты се ‘ппæты дæр хайад райсынмæ. Æмгуысткæнынады фæзуат егъау у, ис нæм къорд фæндоны», – загъта уый.

Ныхасы рæстæджы Николай Хлынцов æмæ Козаты Ушанг фæндон бахастой Хуссар Ирыстоны арт-резиденци байгом кæныны тыххæй.

«Арт-резиденци саразын Козаты Ушангы идея у æмæ йæ мах бирæ хæттыты ской кодтам. Сфæлдыстады Æхсæндунеон хæдзар саразын æрмæст хуссарирыстойнаг нывгæнджытæн нæ, фæлæ фæсарæйнаг нывгæнджытæн дæр пайда уыдзæн, фадат сын уыдзæн уым кусынæн», – загъта Николай Хлынцов æмæ ма банысан кодта, зæгъгæ, ацы фарстыл уынаффæ кодтой Зассеты Жаннæимæ.

Бибылты Анатоли рахæцыд ацы инициативæйы æвварс æмæ сын ныфс бавæрдта, цæт-тæ кæй у баххуыс сын кæ-нынмæ.

Фонд «Арт-Кавказ»-ы  сæрдар ма фæндон бахаста Хуссар Ирыстоны территорийыл архитектортæ æмæ  ландшафты дизайнерты симпозиум ауадзыны тыххæй.

«Уыцы симпозиумæн ауадзæн ис конкурсы хуызы. Æрхонын хъæуы ландшафты дизайнерты, скульпторты æмæ бынæттон профессионалты. Æрæджы æз фембæлдтæн Уæрæсейы Архитекторты цæдисы къухдариуæггæнæгимæ æмæ йын радзырдтон ацы фæндоны тыххæй. Уый сразы мæ ныхæстыл æмæ ныфс бавæрдта, профессионалтæ æмæ курдиатджын архитекторты æрхонынæн нын кæй баххуыс кæндзæн», – загъта уый.

Ландшафтон архитектурæи-мæ иумæ Николай Хлынцов фæндон бахаста, цæмæй Цхинвал æмæ республикæйы горæтарæзтад æмæ архитектурæйы райрæзты концепци арæзт æрцæуа, æмæ банысан кодта, зæгъгæ, цæттæ у ацы хъуыддаджы баххуыс кæнынмæ æмæ Мæскуы æмæ Дзæуджыхъæуæй специалистты æрхо-нынмæ.

«Тынг хорз хъуыды у Хуссар Ирыстонмæ зынгдгонд архитектортæ æмæ ландшафты дизайнертæ æрхонын, цæмæй, ирон колорит бахынцгæйæ,  банысан кæной, республикæйы архитектурæйы райрæзт уыдонмæ куыд кæсы, уый. Дарддæр та равзарой бæрæг здæхт, цæмæй горæтæй æрмæст «фæндаг, асфальт æмæ квадратон хæдзар» ма аразой, фæлæ равдисой горæт Цхинвалы индивидуалондзинад», – загъта Президент.

Уый банысан кодта, зæгъгæ,  афон у практикон фæзуатмæ рахизынæн æмæ архайын райдайынæн. Уый сын загъта ныфсы ныхæстæ, æппæтæй дæр сæ фарс кæй рахæцдзæн, уый тыххæй.

Уæрæсейы Нывкæнынады академийы академик Николай Боровской дæр йæ рады банысан кодта, зæгъгæ, йæ хæсыл нымайы хуссарирыстойнаг нывгæнджыты фæхонын, цæмæй периферийы ма баззайой, уый тыххæй.

Уыимæ иумæ ма уый фæндон бахаста, цæмæй Хуссар Ирыстоны сывæллæттæ хуынд цæуой алыгъуызон сфæлдыстадон конкурстæм.

Фембæлды кæрон уазджыты æрдыгæй Республикæ Хуссар Ирыстоны Президентæн лæвæрд æрцыд сызгъæрин майдан «Союз художников России». Президент та сын балæвар кодта æвзист монетæтæ Республикæ Хуссар Ирыстоны аргъуанты нывтимæ.

Президентимæ фембæлды фæстæ уазджытæ ацыдысты Тугъанты Махарбеджы номыл Цхинвалы нывгæнæн ахуыргæнæндонмæ, цыран сыл æртæ уæливых æмæ дзаггарзимæ фембæлдысты ахуыргæнæндоны къухдариуæгад. Уазджытæ федтой ахуыргæнæндоны студентты  дипломон куыстытæ  æмæ сын скодтой стыр аргъ.

Уыимæ иумæ ма симпозиумы хайадисджытæн ауагъдæуыд тымбыл фынг, цыран уазджытæ æрæмбырдуæвджытæн радзырдтой сæ тæлмæнтæ æмæ сæ фæндиæгтæ.

Николай Боровской бузныг загъта фысымтæн æмæ ныфс бавæрдта, кæй баххуыс кæн-дзæн хуссарирыстойнаг студенттæн, цæмæй суой Мæскуыйы институтты студенттæ.

Мадзалы кæрон уазджытæн лæвæрд æрцыд зæрдылдарæн лæвæрттæ.

Дарддæр уазджытæ ацыдысты Цхинвалы Анахарсисы номыл республикон библиотекæмæ, цыран сæ хайадистæй уагъд æрцыд форум «Эксперимент æмæ традицитæ», зæгъгæ. Хайад ма дзы райстой Хуссар Ирыстоны æвзонг нывгæнджытæ дæр.

Форумы куысты хайад райстой 30 адæймаджы бæрц уæрæсейаг æмæ æхсæнадæмон сфæлдыстадон цæдисты уæнгтæ æмæ ассоциацитæ Адыгейæ, Дагъыстанæй, Краснодары крайæ, Хъырымæй, Ростовы областæй, Ставрополы крайæ, Цæцæны Республикæйæ, Цæгат Ирыстонæй. Форумы куысты хайад райстой  РХИ-йы Культурæйы министр Зассеты Жаннæ, РХИ-йы Нывгæнджыты цæдисы сæрдар Цхуырбаты Тамерлан æмæ æндæртæ.

Зассеты Жаннæ раарфæ кодта симпозиумы хайадисджытæн æмæ банысан кодта, зæгъгæ,  аивад æрбаввахс æмæ æрбаиу кæны адæмы.

«Ахæм фембæлдтыты фæрцы æвзонг нывгæнджытæ исынц фæлтæрддзинад æмæ базонынц бирæ ногдзинæдтæ», – загъта министр.

Фонд «Арт-Кавказ»-ы сæрдар Николай Хлынцов куыд банысан кодта, афтæмæй  уый цæттæ у, симпозиумы фæстиуджыты тыххæй Дзæуджыхъæуы цы равдыст уыдзæн, уый Цхинвалмæ æрласынмæ.

Уæрæсе æмæ Цæгат Ирыстоны сгуыхт нывгæнæг Козаты Ушангы ныхæстæм гæсгæ, аивадон симпозиум феххуыс уы-дзæн æвзонг нывгæнджытæн сæ зонындзинæдтæ рауæрæх кæныны.

«Хуссар Ирыстоны бирæ курдиатджын адæймæгтæ ис æмæ цæмæй размæ цæуой, уый тыххæй сын хъæуы æххуыс кæнын», – загъта Козаты Ушанг.

Симпозиумы хайадисджытæ фæуазæг сты æвзонг нывгæнæг Æлборты Викторияйы куыстыты равдыстмæ.

Comments are closed, but trackbacks and pingbacks are open.