Стыр хъыгагæн, электронон сигареттæ уæй кæнынц нæ базарадон объектты. Пайда дзы кæнынц канд студент фæсивæд нæ, фæлæ ма хистæр кары скъоладзаутæ дæр. Ацы хабар катайдзинад æвзæрын кæны ныййарджытæм, скъолаты ахуыргæнджытæм, барадхъахъхъæнæг органтæм.
Ацы бонты Цхинвалы районы мидхъуыддæгты хайады Æнахъомты хъуыддæгты фæдыл фæткдаруаты кусджытæ, районы прокуратурæ, фæсивæд æмæ спорты хайады минæвæрттæ профилактикон беседæтæ ауагътой Дменисы астæуккаг скъолайы хистæркъласонтимæ.
Æнахъомты хъуыддæгты фæдыл хайады хистæр Тедеты Линæ æмæ хистæр инспектор Хъуылымбегты Линæ скъоладзаутæн радзырдтой электронон сигаретты зианхæссæг миниуджытыл.
«Электронон сигареттæ скъолаты тынг парахат сты. Суанг ма йæм чызджытæ дæр райдыдтой сæхи æппарын. Афтæ æнхъæлынц, ома, традицион сигареттæй æнæниздзинадæн æдасдæр у. Æцæгæй та уый мидæг тæссаг химикон буарадтæ фылдæр ис. Электронон сигаретты аэрозоль ис, æмæ уый мæгуырауæрдæм æндавы адæймаджы организмыл. Афтæ ма ацы химикон буарад æрæмбырд вæййы цæстыты сетчаткæйы æмæ уый та тасдзинад хæссы цæстытæн. Уымæй дарддæр ма электронон сигареты цы ароматизатор ис, уый у тæссаг химикон буарад, кæцы рæуджыты уынгæг кæны æмæ адæймаг хуыфын райдайы, улæфт ын кæй нал фаг кæны, уымæн. Электронон сигареттæ лабораторон иртасæнтæ куыд амонынц, афтæмæй æндавынц ДНК-йыл дæр. Ис ма ахæм хъуыды дæр, ома, электронон сигареттæ адæймагмæ цайдагъдзинад не ‘взæрын кæнынц, фæлæ уый раст нæу. Тамако дымыныл æмæ электронон сигареттыл куы фæцайдагъ уат, уæд зын вæййы сæ ныууадзын. Хъæуы удвидардзинад равдисын.
Иутæн уый сæ бон свæййы, аннæтæн та – нæ. Йæ мидæг ын цы ароматизатор æфтауынц, уый у химæлвасæг», – дзырдта Тедеты Линæ.
Хъуылымбегты Линæ та æрдзырдта, æнахъомтæн æдас кæй нæу транспортыл скъæрын:
«Транспортон фæрæзтæ æнæ бæлвырдгæнæн документæй чи скъæра, уыдон карзæй ивар цæудзысты. Административон бæрндзинадмæ æркæндзысты ныййарджыты дæр. Транспорт та йæхæдæг ист æрцæудзæн», – дзырдта инспектор.
УАЗÆГТЫ Марфа
