Æрвылаз дæр 25-æм марты нæ республикæйы нысан цæуы Культурæйы кусæджы бон.
Культурæйы кусæджы бон банысан кодтой Знауыры районы Культурæйы хæдзары дæр. Цытджын мадзал байгом кодта Культурæйы хæдзары директор Кокойты Светæ. Уый арфæ ракодта культурæйы фадыджы æппæт кусджытæн сæ профессионалон бæрæгбоны сæраппонд.
Мадзалы активон хайад райстой районы Культурæйы хæдзары сфæлдыстадон коллективтæ, музыкалон скъола, афтæ ма хъæууон клубтæ æмæ библиотекæты кусджытæ. Бæрæгбонон концертон программæйы æххæст цыдысты зарджытæ, адæмон кæфтытæ, кастысты æмдзæвгæтæ. Гъаристауы хъæууон библиотекæйы сæргълæууæг, хисæрмагонд зарджыты автор Сиукъаты Анзор дæр сæххæст кодта цалдæр зарæджы.
Мадзалы культурæйы фадыджы кусджытæн арфæйы ныхæстæ загъта Знауыры районы администрацийы культурæйы хайады хистæры хæстæ æххæстгæнæг Тъотъоты Фелинæ дæр. «Тынг хорз у, нæ сывæллæттæн фадат кæй ис алыгъуызон кружокты хайад исынæн, уымæн æмæ афтæмæй уыдонæн раргом вæййы сæ курдиат», – загъта уый.
Тъотъоты Фелинæ культурæйы фадыджы иу къорд ку-сæджы схорзæхджын кодта Кады грамотæтæ æмæ зæрдылдарæн лæвæрттæй.
ГАТЫГКОТЫ Эка
Comments are closed, but trackbacks and pingbacks are open.