Ирон поэтессæ – фестивалы лауреат

Мæскуыйы «Колесо времени»-йы клубы уагъд æрцыд æвзонг поэтты æрвылазон Æппæтуæрæсейон фестиваль «Мцыри»-йы суперфинал. Ацы аз фестиваль уагъд æрцыд 18-æм хатт. Традицион æгъдауæй  финалон мадзæлттæ уагъд фæцæуынц Мæскуыйы  æртæ боны дæргъы. Æвзарæн турты фæстиуджытæм гæсгæ, кæцытæ уагъд фæцæуынц æнæхъæн азы дæргъы, финалмæ æвзæрст æрцыдысты 52 æвзонг поэты Уæрæсейы 31 регионæй. Ацы аз куырдиæтты иумиаг нымæц уыд 1500 адæймаджы. Интернеты онлайн трансляцимæ кастысты 6 мин адæймагæй фылдæр. Дзæуджыхъæуккаг 19-аздзыд поэтессæ Ходты Аминæ ссис фестивалы финалисткæ æмæ лауреат «Потенциал нации»-йы номинацийы. Æвзонг поэтессæйы æмдзæвгæтæ бавдыст æмæ мыхуыр æрцæудзысты мадзæлтты æмæ æмбæстагон поэзийы æппæтуæрæсейон форум  «Часовые памяти»-йы.

Банысан кæнын хъæуы уый дæр, æмæ Цæгат Ирыстонæй гом фестивалы хайад кæй истой æртæ æвзонг поэты. Уыдон уый размæ æнтыстджынæй рацыдысты цæгат-кавказаг æвзарæн тур. РЦИ-Аланийы мадзал уагъд æрцыд «Литературная газета»-йы бонты фæлгæтты. Тыхджындæр литератортимæ тох кодтой Ходты Аминæ, Айларты Зелимхан æмæ Гæджиты Хасан.

Фестивалы хайад райсын сæ бон уыд 27 азы онг кæуыл цæуы, ахæм хайадисджытæн.

Æвзонг поэтессæ, фестивалы финалист Ходты Аминæ банысан кодта: «Æз базонгæ дæн бирæ адæймæгтимæ æмæ сæ поэзиимæ, кæцы мыл ныууагъта стыр тæлмæнтæ. Алцыдæр уыд тынг хорз. Мæ зæрдæмæ тынг фæцыд, райстон фæлтæрддзинад».

Фысджыты цæдисы поэзийы секцийы къухдариуæггæнæг Баситы Залинæ загъта: «Æз поэзийы секцийы сæргъ лæууын дыккаг мæй. Кæй зæгъын æй хъæуы, мах кусæм æвзонг литератортимæ. Æрбацæуынц æмæ нæ базонгæ кæнынц сæ уацмыстимæ. Мах сыл ам бынаты æруынаффæ кæнæм. Афтæ ма фæхонæм æмæ фембæлæм культурæйы зынгæ архайджытимæ».