Президент Гаглойты Алан фембæлд Сывæллæтты сфæлдыстады галуаны хореографион ансамбль «Фидæн»-ы хъомылгæнинæгтимæ, РХИ-йы адæмон артисткæ, Хъæрæсе-Черкессийы республикæйы сгуыхт артисткæ Хуыгаты Олесяйы сæргълæудæй.
Фембæлды ма хайад райстой нæ республикæйы ахуырад æмæ зонады министр Лолаты Аслан, Сывæллæтты сфæлдыстады галуаны ахуыргæнæг Дзигойты Маринæ, музыкант Багаты Алан æмæ æндæртæ.
Июны мæйы хореографион ансамбль ссис 1-аг къæпхæны лауреат Санкт-Петербурджы уагъдцæуæг фестиваль-конкурс «Времена года. Петербург»-ы. Ацы сфæлдыстадон къордæн республикæйæн æдтæмæ уый уыд сæ фыццаг балц, цыран сын фадат фæцис сæхи стыр сценæйыл равдисынæн.
Паддзахады сæргълæууæг фыццаджыдæр бузныджы ныхæстæ загъта коллективы хъомылгæнджытæн, аккаг кæстæртæ кæй схъомыл кодтой, уый тыххæй.
«Ансамблы ном «Фидæн», зæгъгæ, æцæгæйдæр фидауы коллективыл. Сымахæй кæнгæ у нæ фидæн. Мах не ‘ппæт дæр цин кæнæм уе ‘нтыстытыл æмæ уæ алкæмæй дæр сæрыстыр стæм. Мæ зæрдæ уын зæгъы сфæлдыстадон æнтыстытæ æмæ размæцыд. Зæрдиаг арфæ уын кæнын ноджыдæр фестивалы уæ уæлахизы тыххæй», – банысан кодта Президент.
Ахуырад æмæ зонады министр Лолаты Аслан Президентæн фехъусын кодта, ацы аз ноябры мæйы Санкт-Петербурджы кæй уыдзæн фестиваль-конкурсы суперфинал, цыран хайад райсдзæн хуссарирыстойнаг ансамбль дæр.
«Нæ кæстæр фæлтæр, æцæгæйдæр, раппæлинаг сты. Æрмæст концерттæ æмæ фестивалты нæ райсынц хайад. Сывæллæтты сфæлдыстады галуаны цы мадзæлттæ уагъд æрцæуынц, уым кæддæриддæр хайад райсынц ансамблы хъомылгæнинæгтæ. Кæд сæхæдæг нырма кæстæртæ сты, уæддæр сæ аив æмæ хъæлдзæг номыртæй бахъæлдзæг кæнынц куыд хистæрты, афтæ сывæллæтты зæрдæтæ дæр», – загъта Лолаты Аслан.
Ансамблы аивадон къухдариуæггæнæг Хуыгаты Олеся паддзахады сæргълæууæгæн радзырдта ансамблы сырæзт, сывæллæтты фыццаг ралæуд æмæ сæ æнтыстыты тыххæй. Уый фæстæ бузныджы ныхæстæ загъта Гаглойты Аланæн йе ‘ххуысы тыххæй.
«Сывæллæттæ кæд стыр сценæмæ фыццаг хатт рахызтысты, уæддæр сæхи равдыстой аккагæй. Ансамбль «Фидæн» фестиваль-конкурсы ралæууыд æртæ хореографион номыримæ – «Хонгæ», «Чызджыты кафт» æмæ рагон ирон кафт «Чепена». Сæ зæрдæмæ тынг фæцыдысты æмæ нын дзырдтой бузныджы ныхæстæ, нæ музыкæ, национ хæзна æмæ уæлæдарæс абоны онг аккагæй кæй бахъахъхъæдтам, уый тыххæй», – банысан кодта Хуыгаты Олеся.
Кады грамотæтæй уæлдай ма хуссарирыстойнаг коллектив райста бузныджы фыстæг дæр «За сохранение национального признания».
Уымæй уæлдай ма Хуссар Ирыстоны Президентæн сфæлдыстадон баиугæнд «Салют талантов»-ы номæй лæвæрд æрцыд бузныджы фыстæг ирон хъæздыг культурæ бахъахъхъæныны æмæ рæзын кæныны тыххæй. Фыстæджы дзырдæуы: «Республикæ Хуссар Ирыстон сæрмагонд бынат ахсы Кавказы бирæнацион культурæйы, æмæ мах сæрыстыр стæм, ацы уникалон бынтæ базонгæ уæвыны фадат нын кæй ис, уымæй».
Гаглойты Алан ансамблы хъомылгæнинæгтæм бахатыд, цæмæй макуы рох кæной сæ фыдæлты традицитæ æмæ культурæ.
«Нæ республикæйы æмæ уæлдайдæр та æндæр бæстæты цыфæнды кубоктæ, Кады грамотæтæ æмæ уæлахизимæ куы æрыздæхат, уæддæр уæ фæстæ, фыццаджыдæр, баззайдзæн уæ ном, уе ‘гъдау æмæ культурæ. Уымæ гæсгæ уæ курæг дæн, цæмæй кæмфæнды уат, уæ ирон фарн, мадæлон æвзаг, хистæртæн кад кæнын макуы фæцудын кæнат. Махæн та нæ бон цы у, уымæй уын æххуыс кæндзыстæм æмæ кæддæриддæр уыдзыстæм уæ фарсмæ», – банысан кодта Президент Гаглойты Алан.
Хореографион ансамбль «Фидæн»-ы хъомылгæнинæгтæ паддзахады сæргълæууæгæн радзырдтой сæ тæлмæнтæ, стæй фестиваль-конкурсы архайды тыххæй.
Ансамбль нырма у хæрзæрыгон, арæзт æрцыд 2023 азы февралы мæйы.
Санкт-Петербургмæ ансамбль «Фидæн» ацыд сфæлдыстадон баиугæнд «Салют талантов»-ы фæхуындмæ гæсгæ.
КОКАЙТЫ Заринæ
