ДЗЮДО
Эстонийы уагъд цæуы 21 азы онг кæуыл цæуы, уыцы спортсменты ‘хсæн Европæйы чемпионат дзюдойæ. Ерысты æвзист призер ссис Коцойты Аслан. 90 кг уæзы категорийы архайгæйæ, уый финалмæ цæугæйæ æнцонтæй рамбылдта цалдæр фембæлды. Фæлæ хъыгагæн, финалы фембылд сербаг спортсменæн.
Банысан кæнын хъæуы уый дæр, æмæ Аслан кæй у Олимпион хъæзтыты чемпион Коцойты Зелимы кæстæр æфсымæр. Дыууæ дæр хъахъхъæнынц Азербайджаны спортивон кад.
***
21 азы онг кæуыл цæуы, уыцы спортсменты ‘хсæн ма уагъд цыд Европæйы чемпионат уæгъдибар хъæбысхæстæй. Уым 97 кг уæзы категорийы æвзист призер ссис Карсанты Хетæг. Уый дæр хъахъхъæны Азербайджаны спортивон кад.
ФУТБОЛ
Футболæй Уæрæсейы Фыццаг дивизионы уыдысты 9-æм туры хъæзтытæ. Дзæуджыхъæуы «Алани» 1:1 хыгъдæй ахъазыд «Сочи»-имæ. Хъазты 7-æм минутыл хыгъд байгом кодтой «Сочи»-йы футболисттæ. Алайнæгтæн хыгъд сæмхуызон кæнын бантыст 29-æм минутыл. Расгуыхт алайнæгты хъазæг Нури Абдоков.
Фембæлды фæстаг минуттыл ма алайнæгты размæбырсæг лæгæй-лæгмæ рахызт ныхмæлæууæг командæйы кулдуаргæсимæ, фæлæ йæ цæфы фæстæ пурти атахт кулдуæртты цурты.
Ацы хъазты фæстæ «Алани» æрæмбырд кодта 9 очкойы æмæ турнирон таблицæйы ахсы 14-æм бынат.
УÆГЪДИБАР ХЪÆБЫСХÆСТ
Красноярскы кæронмæ бахæццæ æртæ хатты Олимпион чемпион Бувайсар Сайтиевы призтæ рамбулыны сæраппонд дунеон турнир уæгъдибар хъæбысхæстæй. 92 кг уæзы категорийы сыгъзæрин майдан рамбылдта Габуты Сослан. Финалы уый тыхджындæр разынд Воронежы областы минæвар Егор Сенинæй.
Ерысты ирон спортсментæй бронзæйон призер та ссис Хуыгаты Аслан (71 кг).
ХУРИТЫ Батрадз
