Советон Цæдисы хъайтар Хъоцыты Къос-тайы номыл Цхинвалы 2-æм астæуккаг скъола æрæджы ссис III-æм дунеон конкурс «Лучшая русская школа за рубежом»-ы дипломант. Уый тыххæй хъусын кæны нæ горæты цхинвайлаг «Русский дом» йæ телеграм-каналы.
Кадджын хорзæх Мæскуыйы цытджын церемонийы рæстæджы райста скъолайы директор Ольга Михаилиди. Мадзал цыдис æхсæнадæмон равдыст «Россия»-йы. Сфæлдыстадон ерысты фæстиуджытæм гæсгæ, 25 бæстæйы минæвæрттæ райстой хорзæхтæ. Ацы конкурс сорганизаци кодта Уæрæсейы ахуырады министрады дунеон æмгуыстады центр. Сæрмагондæй цытджын церемонийы айзæлдысты конкурсы уæлахиздзауты нæмттæ æмæ кæцы скъолатæй сты, уыдоны нæмттæ. Уæлахиздзаутæ сты: Таджикистан, Хъыргъыстан, Узбекистан, Монголи, Турк, Египет, Германи, Франц, Анголæ, Мьянмы, Вьетнам, Дани, Серби æмæ Казахстан. Сæрмагонд номинацийы та банысан кодтой Хуссар Ирыстон, Тайланд, Катар, Абхаз, Палестинæ, Инди, Бельги, Испани, Кипр, Приднестровье æмæ æндæр бæстæты уæлахиздзау ахуыргæнджыты нæмттæ æмæ куыстытæ.
«Ацы конкурс Европæ, Ази, Африкæ, Америкæ æмæ æндæр континентты ахуыргæнджытæн уыцы фадат радта, зæгъгæ, кæй сты иу стыр æмæ хæларадон æмæхсæнад, – банысан кодта Уæрæсейы Федерацийы Ахуырады министр Сергей Кравцов.
«Бирæрæстæгон проект «Подвиг и слава в памяти и сердцах поколений» конкурсы сæрмагонд номинацийы нымад æрцыд иууыл перспективондæрыл. Архайдтой дзы 800 амонæджы 54 бæстæйæ», – банысан кодтой уырыссаг организацийы.
Конкурсы фæстæ хуссарирыстойнаг скъолайы минæвæрттæ Ольга Михаилиди æмæ Наталия Вшивцева систы зонындзинæдты центр «Машук»-ы ахуырадон программæйы хайадисджытæ. Уыдон сæ коллегæтимæ дыккаг бон афæндараст уыдзысты Пятигорскмæ ахуырадон форуммæ.
Фæсарæйнаг скъолаты 70 специалисты уæрæсейаг программæтæ Федералон паддзахадон ахуырадон стандарттæм гæсгæ чи среализаци кодтой, уыдон байхъуыстой лекцитæм æмæ хайад райстой тренингты.
