Республикæ Хуссар Ирыстоныл 26 азы сæххæсты цытæн æфсæддон парад уагъд æрцыд нæ горæты Хетæгкаты Къостайы уынджы. Адæм æрæмбырд сты бæрæгбонвæлыстæй, стырæй, чысылæй.

Мадзалмæ æрбацыдысты Республикæ Хуссар Ирыстоны Президент Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, Хицауады бæрнон кусджытæ æмæ бæрæгбонмæ æрцæуæг уазджытæ: РЦИ-Аланийы делегаци Республикæйы Сæргълæууæг Битарты Вячеславы сæргълæудæй; Абхазæй – вице-премьер Аслан Кобахияйы сæргълæудæй, Уæрæсейы къухдариуæгады номæй Хуссар Ирыстоны Уæрæсейы Федерацийы Æххæстбарджын минæвар Къарджиаты Эльбрус, Науруйæ – Парламенты спикер Сайрил Бураман; Хæххон-Хъарабахæй – бæстæйы президенты уынаффæгæнæг Юри Айрапетяны сæргълæудæй; Луганскы Адæмон Республикæйæ – Тыхон структурæты комитеты сæрдар Витали Морозовы сæргълæудæй; Приднестроваг Молдаваг Республикæйы делегаци хицауады сæрдар Павел Прогудины сæргълæудæй; Хъæрæсе-Черкесийы Республикæйы делегаци вице-премьер Джанибек Суюновы сæргълæудæй; Воронежы областæй æхсæнадон проект «Взывает взорванный Цхинвал»-ы координатор Валентинæ Шумлянскаяйы сæргълæудæй; Мæхъæлы Республикæйы делегаци Адæмон æмбырды депутат Васили Светличныйы сæргълæудæй; Дагестаны Республикæйæ уазæг Мурат Шамилов æмæ æндæртæ.

Цытджын караул æрбахастой Республикæ Хуссар Ирыстоны Паддзахадон тырыса æмæ Гарзджын тыхты тырыса.

Хуссар Ирыстоны Хъахъхъæнынады ми-нистр Гассеты Ибрагим Уæлдæр Сæйрагкомандæгæнæг Президент Тыбылты Леонидæн доклад скодта, Æфсæддон дæлхæйттæ бæрæгбонон парады рацæуынмæ цæттæ кæй сты, уый фæдыл.

Æфсæддон дæлхæйттæ сæххæст кодтой Республикæ Хуссар Ирыстон æмæ Уæрæсейы Федерацийы Паддзахадон гимнтæ.

Республикæ Хуссар Ирыстоны Президент Тыбылты Леонид (йæ доклад мыхуыр æрцыд) арфæ ракодта, бæстæйы цы бæрæгбон нысан цæуы, уый тыххæй. Æрдзырдта нæ бæстæйы историйы ацы боны егъау нысаниуæгыл. Бузныг загъта, ацы райдзаст æмæ нысаниуæгджын бон немæ чи нысан кæны, уыцы æфсымæрон бæстæты делегацитæн.

Цæгат Ирыстоны паддзахады сæргълæууæг Битарты Вячеслав йæ раныхасы банысан кодта Ирыстон æмæ йæ адæмы ног историйы ацы боны нысаниуæгыл.

«Хуссар Ирыстоны Парламенты депутаттæ ацы ахсджиаг документ куы райстой, уæд уый ссис, егъау историон нысаниуæг кæмæн ис, ахæм цау. Уый сбæлвырд кодта хуссарирыстойнаг адæмы тырнынад, хæдуагæвæрд, сæрибардзинад æмæ райрæзты хисæрмагонд фæндаг. Уый уыд, бирæнымæц политикон къахдзæфтæй фыццаг не ‘фсымæртæн сæ рагон бæллицмæ – суверенон, хæдбар паддзахад саразынмæ. Уыцы уæззау рæстæджыты, Советон Цæдис куы пырх кодта, уæд политикон уынаффæ – Республикæ Хуссар Ирыстон расидын уыд иунæг раст уынаффæ», – банысан кодта ныхасгæнæг.

Уый фæстæ азты цаутæ, зæгъгæ, сбæлвырд кодтой, уыцы равзæрстæн альтернативæ кæй нæй, уый.

«Хуссар Ирыстоны адæм хорз зонынц, цы у хæстон агресси, геноцид, лигъдæттæ, экономикон æмæ информацион блокадæ. Ахæм уæззау фæлварæнты Хуссар Ирыстоны адæм равдыстой, æмбал кæмæн нæй, ахæм хъæбатырдзинад æмæ Фыдыбæстæйыл иузæрдиондзинад. Мæн фидарæй уырны, Хуссар Ирыстоны æмбæстæгтæ фидæны фæлтæр кæддæриддæр кæй хъуыды кæндзысты, аргъ кæндзысты, бæрзонд паддзахадон хатæнты, науæд тохы быдырты уарзон адæмы интерестæ чи хъахъхъæдта – чи ныхасæй, чи æхсæнгарзимæ æмæ, кæй зæгъын æй хъæуы, йæ цард чи рауæлдай кодта сæрибардзинад æмæ хæдбардзинады сæрыл, уыдоны. Махæй нæ ферох уыдзæн уыдоны сгуыхтдзинад. Хуыздæр мысынад уыдонæн уыдзæн Хуссар Ирыстоны æнтыстытæ æмæ дидинæфтыд», – банысан кодта Битарты Вячеслав.

Уæрæсейы Федерацийы Президент Владимир Путины арфæйы фыстæгимæ бæрæг-бонгæнджыты базонгæ кодта УФ-йы Æххæстбарджын минæвар Къарджиаты Эльбрус.

Абхазы вице-премьер, Мидхъуыддæгты министр Аслан Кобахия йæхи æмæ Абхазы къухдариуæгады, президент Рауль Хаджимбайы номæй зæрдиаг арфæ ракодта цытджын мадзалы.

Уый фæстæ æфсæддон маршæй трибунæйы рæзты парады цыдысты: Хуссар Ирыстоны Мидхъуыддæгты министрады дæлхæйттæ, Паддзахадон æдасдзинады комитеты Арæнгæрон службæйы, Уæлввæткон уавæрты министрады, УФ-йы Хъахъхъæнынады министрады 4-æм æфсæддон базæйы æмæ Хуссар Ирыстоны Уæрæсейы Федералон æдасдзина-ды службæйы Арæнгæрон управленийы службæгæнджытæ.

Æфсæддон дæлхæйтты фæстæ парады рацыдысты Ирыстоны фидæн  – сывæллæттæ: рæвдауæндæтты хъомылгæнинæгтæ, хореографион æмæ спортивон скъолаты ахуыргæнинæгтæ, скъолаты ахуыргæнинæгтæ æмæ Хуссар Ирыстоны Паддзахадон универ-ситеты студенттæ.

«Этот мир принадлежит нам!» – ахæм номимæ фæзуаты уагъд æрцыд сывæллæтты стыр бæрæгбон. Сывæллæтты рæвдауæндон «Золотой ключик»-ы хъомылгæнинаг Къæбулты Георги сæрибардзинады символ урс бæлон бæрæгбонон арфæтимæ бахаста Президент Тыбылты Леонидмæ.

Хореографи æмæ спортивон скъолаты ахуыргæнинæгтæ сæ æвзыгъддзинæдтæ æвдыстой трибунæйы раз.

Къæбулты М.

Comments are closed, but trackbacks and pingbacks are open.