Хуссар Ирыстоны ног историйы трагикон бонтæй сæ иу — Ереды трагедийæ мысинæгты уæззаудзинадæй ризы адæймаджы зæрдæ. Сабыр цæрджыты уæд, 1991 азы 18 марты рахизын кодтой автомашинæйæ Ереды хъæуы. Бæлццæттæ цыдысты Сатихъарæй горæт Цхинвалмæ. Тугдзых сырдтæ сылгоймæгтæ æмæ сывæллæтты рауагътой, фæлæ 12 нæлгоймаджы аластой æбæрæг ранмæ. Кæм ауæрстой сырдон фыдми кæныныл, æмæ… Æмæ сæ уый фæстæ фыднад æмæ уæнгтæцъæлтæй, удæгасæй баныгæдтой.

Уыцы трагедийæ рацыд 32 азы, фæлæ уæддæр махæй рох нæу. Нæ ферох уыдзысты, ирон адæмæн цæрæнбонты гуырдзыйы фыдхортæ цы фыдмитæ кодтой, уыдон.

Ереды трагедийы 12 лæппуйы трагикон хъысмæт рабæрæг æрмæстдæр 1993 азы фæззæджы. Уæдмæ сæ хиуæттæй алчидæр йæхицæн йæхимид лæвæрдта ныфсытæ — «чизоны æмæ ма сæрæгас сты…», фæлæ…

Рæстæг хъæдгæмттæ гасгæнæг нæу

Азтæ азты ивынц — зæгъынц, зæгъгæ, рæстæг хъæдгæмттæ гасгæнæг у — фæлæ уый зæгъæн нæй, ацы трагедийы амæттæгты хиуæттæм ахасты. Ереды трагедийы амæттæгтæй сæ иу, æвзонг лæппу — Дыгъуызты Иван нæма уыд бинонты хицау, нæ бавзæрста хъæбулы ад дæр. Гуырдзыйы тугмондаг сырдты фыдракæндæй афтæ фæрыст йæ ныййарæг мады æнкъараг зæрдæ, æмæ куы фехъуыста йæ хъæбулы хабар, уæд зæрдæдзæф фæци. Иваны хо Катя æмбæхста ныййарæг мадæй йæ æфсымæры хабар, чизоны æмæ сæрæгасæй разына, — зæгъгæ, уый ныфсæй… фæлæ нæй… Мады сусæгæй-иу йæхи йæ цæстысыгæй ныхсадта. Уый фæстæ мад нал ныллæууыд горæты, йæ фыртмæ йæ зæрдæ æхсайдта æмæ ацыд Сатихъармæ. Бæлццæттæласæн автобусыл куы сбадт, уæд базыдта хабар æмæ йыл уыцы хъуыддаг дæр уым æрцыд.

Афтæ алы трагедийы амæттагæн дæр ис йæхи трагикон истори. Уыдон сæ бинонтæн, хиуæттæн уыдысты стыр ныфс, фæлæ знаг нæ бацауæрста сабыр цардуарзаг ирон адæмыл æмæ йæ тугмондаг дзæмбы кæдæм æххæст, уым куынæг кодта ирон адæмы хуыздæр минæвæртты.

Мемориалон комплекс

Бæрæг куыд у, афтæмæй Ереды трагедийы амæттæгты ном сæнусон кæныны нысанæн сæ уæлмæрды байгом уыдзæн мемориалон комплекс. Йæ автортæ сты Хуссар Ирыстоны сгуыхт нывгæнджытæ Зассеты Сæрмæт æмæ Хуыбиаты Роберт.

Мемориалон комплексы астæу æвæрд æрцæудзæн Ереды трагедийы 12 амæттаджы номыл цырт. Цырт цы бынаты æвæрд æрцæудзæн, уый фæдыл уынаффæ кæндзысты трагедийы амæттæгты хиуæттимæ. Цырты хæдфæстæ та — кувæндон. Мемориалы сæйраг фигурæ æвдисы трагедийы уæззаудзинад — йæ къух даргъ кæны фæдисы дзæнгæрæгмæ. Æмæ афæдз иу хатт уыцы бон зæлдзæн фæдисы, додойы дзæнгæрæг, зæрдыл лæууын кæндзæн трагедийы æнæферохгæнгæ бон.

КЪÆБУЛТЫ Маринæ

Comments are closed, but trackbacks and pingbacks are open.