Дунейы зындгонд оперон зарæггæнæг Сланты Тимур дыууæ концерты ратдзæн Дзæуджыхъæуы. Йæ фыццаг концерт уыдзæн 28-æм сентябры. Цæгатирыстойнаг вокалистæн уыд фыццаг пресс-конференци. Фондз азы фæстæ йæ Райгуырæн бæстæмæ куы æрцыд, уæдæй. Æвзонг стъалы куыд дзуры, афтæмæй бæллы куыд гæнæн ис, афтæ фылдæр концерттæ раттынмæ Уæрæсейы æмæ йæ фидæн бæтты æрмæстдæр йæ бæстæимæ. Ныртæккæ Тимур ахуыр кæны Швейцарийы Базелы музыкалон академийы. Уый размæ та ахуыр кодта Гергиты Валерийы номыл Дзæуджыхъæуы аивæдты колледжы æмæ Мæскуыйы паддзахадон консерваторийы.
Сланты Тимур зардзæн ЦИПУ-йы концертон залы Суанты Кимы номыл национ эстрадон оркестримæ Кабойты Никъалайы сæргълæудæй. Æвзонг æххæстгæнæгæн уый уыдзæн ахæм ралæуды фыццаг фæлтæрддзинад. Зарæггæнæджы хъуыдымæ гæсгæ, йын ацы концерт гæнæн ис æмæ суа йæ дарддæры рæзты стимул.
Ноябры ма Сланты Тимур ноджы иу концерт ратдзæн Дзæуджыхъæуы Мариинаг театры филиалы сценæйыл. Æвзонг стъалы ралæууы дунеон хуыздæр оперон сценæтыл. Фæлæ уыцы иурæстæджы нæ рох кæны йæ уидæгтæ. Тимур куыд банысан кодта, афтæмæй йæ мадæлон ирон æвзагыл аныхас кæнынæн Швейцарийы спайда кæны алы фадатæй дæр.
Уымæй дарддæр ма Европæйы æнæнхъæлæджы раргом ис йæ ног курдиат – кулинарон. Тимур куыд загъта, афтæмæй йæ кулинарон сгуыхтдзинæдтæм сразæнгард кодта æнад хæринаг. Оперон зарæггæнæг сахуыр ис ирон уæливыхтæ фыцын æмæ сæ ацаходын кæны йæ алыварс уæвæг адæмы.
2024-09-17
