Йæ рæсугъд æрдз, йæ хосгæнæн бынæттæй хъæздыг у Хуссар Ирыстон. Уыдонæй сæ иу у Знауыры районы Нагутнийы хосгæнæн дæр æмæ дзы æрвылаз баулæфы дзæвгар æмбæстаджы. Уый сын се ‘нæниздзинад фæхуыздæр кæнынæн фæвæййы стыр ахъаз. Йæ хиæдтæ раджы фæбæрæг сты æмæ фыццаг улæфджытæ райста 1957 азы, йæ лæггады хай сын фæкодта суанг 1980 азы онг. Фæстæдæр бæрæг аххосæгтæм гæсгæ нал куыста 2002 азы онг. Фæлæ не ‘хсæн бирæ ис, адæмы тыхстдзинад йæ зæрдæмæ арф чи айсы, иумæйаг хъуыддаг срæвдз кæныныл чи батыхсы, ахæм æмбæстæгтæ. Уыдонæй сæ иу у Челæхсаты Владимир. Уый зæрдиагæй бацархайдта хосгæнæн бынат ногæй скусын кæныныл æмæ йын æнтысгæ дæр бакодта. 2003 азы «Нагутни» йæ дуæрттæ байгом кодта улæфджытæн æмæ уæдæй фæстæмæ рæдау фысым у, ардæм чи æрбацæуы, уыцы æмбæстæгтæн. Уыцы азæй фæстæмæ йæ директор у Челæхсайы фырт æмæ дзы кæддæриддæр разыйæ баззайынц улæфджытæ.
Ацы азы сезонмæ дæр цæттæгæнæн куыстытæм бавнæлдта майы мæйы. Фыццаг улæфджыты райстой июны мæйы райдианы æмæ дзы æнæхъæн сезон баулæфыд 170 адæймаджы. Уыдон та уыдысты канд нæ республикæйæ нæ, фæлæ ма Ленинград, Краснодары край, Цæцæны республикæ æмæ суанг Сахалинæй дæр. Ам йæ рæстæг чи арвыста, уыдонæн сæ зæрдæмæ афтæ тынг фæцыд, æмæ ныфс бавæрдтой, фидæны дæр та йæм кæй æрцæудзысты. Хосгæнæндоны раппæлинаг миниуджытæ бирæ кæй сты, уый бæрæг у уымæй дæр, æмæ йæм амæйразмæ Пятигорскæй кæй æцыдысты 3 лаборанты. Бафыдæбон дзы кодтой æнæхъæн бон, сарæзтой анализтæ, уый фæстæ та йын йæ донæй аластой сæхимæ æмæ 2 мæйы фæстæ æрæрвыстой, анализты хатдзæгтæ. Иудзырдæй, рахуыдтой йæ диссаджы дзæбæхгæнæн дон, ома, ис бирæ низтæн хосгæнæн чи у, ахæм дон.
Зæгъын хъæуы, уый дæр æмæ ацы аз бирæ æмбæстæгты кæй фæндыд баулæфын, фæлæ директоры ныхæстæм гæсгæ сæ куырдиат æххæст нал æрцыд бæрæг аххосæгтæм гæсгæ. Цæвиттон, Метъехæй суанг хосгæнæн бынатмæ ис 9 километры, фæлæ фæндаг у мæгуырау уавæры æмæ улæфæг бæлццæттæ бафæллайынц. Челæхсайы фырт куыд загъта, афтæмæй æмбæлон органтæ бынтон æнæхъусдард нæ ныууадзынц, 3 азы размæ фæндаг æрцыд цалцæг æмæ сын уæд бирæ фенцондæр цæуын. Ныр дæр æй ныфс ис, ацы уавæрыл дарддæр дæр кæй бакусдзысты. Уæд та улæфджытæн фенцондæр уыдзысты сæ ацæуæнтæ.
ХУЫБИАТЫ Никъала
