Хуссарирыстойнаг боксер Гæбæраты Алим ахызт 13-14-аздзыд боксерты ‘хсæн Европæйы чемпионаты финалмæ. Ерыстæ уагъд цæуынц Босни æмæ Герцеговинайы горæт Баня-Лукайы. Алим архайы 90 кг уæзы категорийы. Тренер Коцты Вадимы хъомылгæнинаг æрдæгфиналы фæуæлахиз Румыны минæвар Роберт Гералиуйыл.
Ерысты 40 кг уæзы категорийы ма финалмæ ахызт иннæ ирон боксер Цебойты Аврам. Уый æрдæгфиналы тыхджындæр уыд Польшæйы минæвар Доминик Адамскийæ.
Хъыгагæн, чызджыты ‘хсæн ерысты æрдæгфиналы фембылд Кучиты Заринæ. Уый 48 кг уæзы категорийы ссис бронзæйон призер.
Уæгъдибар хъæбысхæст
Ирыстоны хъæбысхæсты скъолайы хъомылгæнинæгтæ Тунджай Вердиев (55 кг), Хъесаты Алдат (80 кг) æмæ Санахъоты Радион (92 кг) Уæрæсейы æмбырдгонд командæйы сконды хайад райсдзысты, 18 азы онг кæуыл цæуы, уыцы богалты ‘хсæн дунеон чемпионаты уæгъдибар хъæбысхæстæй. Уый тыххæй фехъусын кодта УФ-йы æмбырдгонд командæйы тренер Къалаты Ислам. Ныртæккæ спортсментæ сæхи цæттæ кæнынц спортивон базæ «Парамоново»-йы. Бæстæйы æмбырдгондимæ ма цæттæгæнæн сбортæ цæуынц Дзаттиаты Альберт, Санахъоты Алан æмæ Пухаты Роланд.
ХУРИТЫ Батрадз
