Ирон культурæ, сæйраджыдæр та ирон фæн-дыры зæлтæ æхцон æмæ уарзон сты мæ зæрдæйæн. Ирон зарæг, фæндыры цагъд куы райхъуысы радио кæнæ телеуынынадæй, уæд æппæт хъуыддæгтæ дæр фæуадзын æмæ йæм байхъусын стыр цины æнкъарæнтимæ. Уæвджыйæдæр, куыд зæрдæхцон у ирон фæндыры цагъд, куыд зæрдæмæхъаргæ сты йæ аив æмæ диссаджы зæлтæ! Уыдон сцæрдхъом кæныныл æвæллайгæ фыдæбон бакодта зынгæ фæндырдзæгъдæг Гæздæнты Булат. Зæгъæн ис, æмæ Булат ацы дунемæ фæзынд ирон фæндыры бæрзонд æмвæзадмæ сисыны, йæ кад ын иууыл уæлдæр къæпхæнмæ схизын кæныны тыххæй. Фыдæлтæй баззайгæ диссаджы уадынгарз йæ фæрцы аккаг бынат бацахста ирон культурæйы царды.
Зæгъын хъæуы, райдианы фæндырæн йæ авналæнтæ къуындæгдæр уыдысты, уый тыххæй йæм хъуыд ног ивындзинæдтæ бахæссын. Уый æмбæрста номдзыд композитор æмæ дирижер Гæздæны фырт æмæ дзæвгар азты фæстæ æрцыд раст хатдзæгмæ. Йæ арæхстджын æмæ фæлтæрддзинады фæрцы ирон фæндырæн йæ авналæнтæ схызтысты бæрзонд æмвæзадмæ æмæ йыл ныр ис сæххæстгæнæн алы цагъд дæр. Гæздæнты Булат уыд алыварсон курдиаты хицау, уыд композитор, национ оркестры дирижер æмæ къухдариуæггæнæг, фольклор æмбырдгæнæг, дзæвгар цæгъдтыты автор, æвзонг фæлтæры иттæг хорз хъомылгæнæг, хорз хæлар æмæ йæ раттæг адæмы иузæрдион фырт.
Фæлæ уæддæр Булаты ном иууыл популярондæр у, ирон фæндырæн цы диссаджы лæггæдтæ фæкодта, уымæй. Афтæ куы зæгъæм, æмæ Гæздæны фырт а-дунемæ фæзынд ирон фæндыры цардæгас æмæ размæцыды тыххæй, уæд уыдзæн раст. Цæгъды ирон фæндыр, хъуысынц йе ‘хцон æмæ зæрдæмæхъаргæ рæсугъд зæлтæ æмæ адæймагæн хæссынц удæнцой æмæ хъæлдзæгдзинад. Уый зынгæ ирон музыкант Гæздæнты Булаты фæндыры диссаджы æмæ кæлæнтæгæнæг цагъд у.
О, цæгъды æвзонг фæндырдзæгъдæг дæр – Булаты раздæры ахуыргæнинаг, тырны йæ ахуыргæнæджы ном бæрзонд æмвæзадмæ сисыныл. Цард цæуы, фæлтæр фæлтæры ивы æмæ уыимæ бæрзонд исынц сæ ахуыргæнæджы амынд фæлтæрддзинад.
Ирон фæндырæй та райхъуыст алæмæттаг ирон цагъд. Хъуысы Гæздæнты Булаты диссаджы цагъд æмæ йæ ном æмæ кад фæндыримæ цæрдзæн æнустæм йæ раттæг адæмы зæрдæты!
ХУЫБИАТЫ Никъала
