Июлы мæйы Цхинвалы Сывæллæтты сфæлдыстады галуаны базæйыл организацигонд æрцыд сæрдыгон улæфæн лагерь «Фидæн» æмæ уым цы фыццаг фæлтæр улæфыд, уыдонæн сæ хъæлдзæг улæфты рæстæг фæцис ивгъуыд къуырийы кæрон. Улæфты фæстаг бон сывæллæттæ банысан кодтой цымыдисон программæйæ, æнæнхъæлæджы ма сæм фæуазæг нæ бæстæйы сæргълæууæг Гаглойты Алан дæр. Æрыгон улæфджытæ ацы фембæлд æмæ улæфты рæстæг сæ зæрдыл дардзысты цæрæнбонтæм.
Лагеры кусджытæ уый фæстæ сæхи цæттæ кодтой дыккаг фæлтæр райсынмæ, хæрзæфснайд бакодтой галуаны хатæнтæ æмæ та знон ногæй зæрдиагæй æмбæлдысты сæ радон улæфджыты къордыл. Куыд фыццаг хатт, афтæ ныр дæр «Фидæн»-ы улæфынц 80 сывæллоны бæрц. Уыдон сты Цхинвалы скъолаты ахуырдзау фæсивæдæй.
«Сæрдыгон лагерь йæ куыст кæндзæн 23-æм августмæ. Æдæппæтæй махмæ баулæфдзæн æртæ фæлтæр сывæллæттæ, ома 230 ахуыргæнинаджы. Ардæм райстой, 7-14 азы кæуыл цæуы, ахæм кары сывæллæтты. Цы программæ сын бацæттæ кодтам, уымæй пайда кæндзыстæм алкæцы улæфджыты фæлтæримæ дæр. Нæ программæ та у цымыдисон национ фæдыздæхтимæ», – банысан кодта Харебаты Сюзаннæ.
Сæрдыгон лагеры цæмæй сывæллæттæ улæфты бонтæ зæрдиагæй баулæфой, хъæлдзæг рæстæг арвитой æмæ уыцы рæстæг сын æнæферохкæнинагæй сæ мысынады баззайа, уый тыххæй сын раздæр Сывæллæтты сфæлдыстадон галуан бацæттæ кодтой сæрмагонд программæ. Улæфджытæм æнхъæлмæ кæсынц æндæр æмæ æндæр интеллектуалон хъæзтытæ, конкурстæ, экскурситæ, спортивон ерыстæ, мастер-къластæ, хиирхæфсæн музыкалон мадзæлттæ. Уымæй дарддæр ма æнæмæнг хъуамæ æххæст кæной лагеры дисциплинæ. Уый тыххæй лагеры кусджытæ æмгуыстад кæнынц нæ горæты æрыгон техникты æмæ æрыгон натуралистты станцæты коллективтимæ.
«Фидæн»-ы сывæллæттæ сæхи хатынц æцæг улæфджытæй, иууыл тынгдæр та цин кæнынц, ног хæлæрттæ сын кæй фæзындзæн, ууыл.
ЦХУЫРБАТЫ Лариса
