Æрæджы хуссарирыстойнаг ахуырдзау фæсивæдæй цалдæрæй «Россотрудничество»-йы программæ «Здравствуй, Россия!»-йы фæлгæтты ацыдысты Псковы областмæ. Уый тыххæй нын фехъусын кодтой Хуссар Ирыстоны Уырыссаг хæдзары минæвæрттæ.
Ахуыргæнинæгтæ цалдæр боны дæргъы зонгæ кæнынц Псковы областы истори æмæ культурон бынтимæ, бæстæйы фенддаг бынæттимæ, хайад исынц алыгъуызон культурон мадзæлтты, ахуырадон мастер-къласты æмæ тренингты, кæцытæ ахъаз сты рæзгæ сывæллæтты хъомыладæн.
«Хуссарирыстойнаг сывæллæттæ бацæудзысты æмæ фендзысты Псковы Кремл, цымыдисон музей «Два капитана», кæцы арæзт æрцыд зындгонд фыссæг Вениамин Каверины сфæлдыстады сæраппонд. Уымæй дарддæр ма сывæллæтты абалц кæндзысты горæт Островмæ, поселок Пушкины хæхтæ, Святогорскы моладзандонмæ æмæ æндæр ахæм фендтаг бынæттæм. Хуссарирыстойнаг сывæллæттæ хайад райсдзысты цымыдисон хъазт-квест «По следам героических псковичей», зæгъгæ, ахæм темæйыл. Уый фæстæ сæ организатортæ базонгæ кæндзысты ЮНЕСКО-йы æппæтдунеон бынты объекттимæ, дарддæр сын рæстæг уыдзæн, цæмæй сæхи аирхæфсой рæсугъд æмæ уæрæх парк «Волшебная гора»-йы. Иудзырдæй, сывæллæттæн цалдæр бонмæ цы программæ бацæттæ кодтой, уый у хъæздыг æмæ цымыдисон», – банысан кодтой «Россотрудничество»-йы минæварады.
Экскурситæй дарддæр ма æппæт хайадисджытæн уыдзæн мастер-къластæ æмдзæвгæ куыд ныфыссын хъæуы, уый тыххæй. Программæйы фæлгæтты ахуырдзау фæсивæдæн лекцитæ бакæсдзысты Псковы областы культурæ æмæ литературæйы тыххæй. Псковы областыл 80 азы сæххæсты цытæн сывæллæттæн фадат уыдзæнис алыгъуызон хиирхæфсæн мадзæлтты хайад райсын, уыцы нымæцы стъолы хъæзтыты изæры. Æрыгон туристты ма фæхондзысты юбилейон концертмæ дæр.
Куыд зонæм, афтæмæй нæ республикæйы Уырыссаг хæдзары хъæппæрисæй афæдзы дæргъы уагъд цыдысты æндæр æмæ æндæр конкурстæ, кæцыты хайад истой хуссарирыстойнаг ахуыргæнинæгтæй бирæтæ.
КОЦТЫ Еленæ
