Иорданийы уагъд æрцыд, 18 азы онг кæуыл цæуы, уыцы спортсменты ‘хсæн дунейы чемпионат уæгъдибар хъæбысхæстæй. Ерысты æвзист призер ссис ирон богал Санахъоты Родион. Уымæн ахæм æнтыст йæ къухты бафтыд 92 кг уæзы категорийы.
Дзюдо
Армавиры уагъд цæуы XII-æм Спартакиадæйы фæлгæтты дзюдойæ ерыстæ. Уым сыгъзæрин майдантæ рамбылдтой Рæмонты Давид (55 кг) æмæ Калоты Зитæ (52 кг). Ерысты бронзæйон хорзæх та бафтыд Джыгкайты Артуры къухты (81 кг).
Банысан кæнын хъæуы уый дæр, æмæ ерысты æдæппæтæй хайад кæй исынц 700 дзюдоисты, уыдонæй 300 сты сылгоймæгтæ.
***
21-аздзыд дзюдоисткæ Зурайты Залинæ хуынд æрцыд Уæрæсейы æмбырдгонд командæйы скондмæ, цæмæй 13-15 сентябры хайад райса Загребы уагъдцæуæг Гран-прийы. Уый архайдзæн 63 кг уæзы категорийы. Ивгъуыд аз Залинæйæн бантыст бæстæйы чемпионат рамбулын.
Залинæйы фыццаг тренер у Хуссар Ирыстонæй рацæугæ Дзукъаты Инал. Дзукъайы фырт йæ рæстæджы дзæвгар азты фæкуыста Цхинвалы.
ХУРИТЫ Батрадз
