Царды йæ бынат цы адæймаг ссары, йæ царды нысаниуæг чи бамбары, ахæм адæймаджы æз амондджыныл нымайын. Мæнмæ гæсгæ, амондджын у республикæйы Гарзджын тыхты æмæ хæстон архайдтыты ветеранты советы сæргълæууæг Тедеты Валери дæр, уымæн æмæ йæ рæстæджы бамбæрста, йæ царды нысан æфсæддон службæ кæй у æмæ йæ цардвæндаг дæр уыцы фендагыл акодта.
Валери ахуыргæнджыты хæдзары райгуырд, Цхинвалы пединститут дæр æнтыстджынæй каст фæцис, Фæлæ педагогы куыст йæ царды нысаныл нæ банымадта. Советон Æфсады службæйы фæстæ (службæ та кодта Сауденджызон флоты авианосец «Киев»-ыл) йæ райгуырæн Ирыстонмæ æрыздæхгæйæ, кусын райдыдта Уанеты Захары номыл зонад-иртасæн институты зонадон-методикон центры, фæлæ ацы куыстмæ дæр йæ зæрдæ нæ радта æмæ бацыд, уæды рæстæджы Цхинвалы уæвæг Советон Цæдисы æфсæддон хæйттæй сæ иу – инженерон-саперон хаймæ прапорщикæй. Æфсæддон хайы командакæнынад ын йе ‘нтыстджын службæмæ куы бакаст, уæд æй арвыстой Тбилисмæ æмæ уым адарддæр кодта йæ службæ.
Æвзыгъд службæгæнæджы миниуæг куы фæхатыд æфсæддон хайы командакæнынад, уæд æй равзæрстой æфсæддон советы уæнгæй. Уыд адъютант, фæскомцæдисы организацийы секретарь, ротæйы политикон хайы сæргълæууæджы хæдивæг, батальоны политикон хайы сæргълæууæджы хæдивæг. Дыууæ азы та Уджарайы баслужбæ кодта.
Валери алкæцы ран дæр уыд ныфсхаст, цæвиттойнаг. намысджынæй æххæст кодта йæ службæйон хæстæ, æмæ-иу йæ сæр кæм бахъуыд, уырдæм æй æрвыстой æфсæддон командакæнынад. Йæ интернационалон хæс æххæст кодта Афганистаны дæр æмæ моджахедтимæ тохты кæй фесгуыхт, уый тыххæй хорзæхджын æрцыд «За мужество» æмæ «За боевые заслуги»-йы ордентæй.
Афганистанæй æрыздæхгæйæ та йæ æфсæддон командакæнынад рарвыстой фæстæмæ Цхинвалы æфсæддон хаймæ политикон хайы командиры хæдивæгæй. Фæстæдæр куыста Дзауы æфсæддон къамисариаты сæргълæууæгæй. Фæлæ Советон Цæдис куы фехæлд, уæд ацыд Цæгат Ирыстонмæ æмæ службæмæ бацыд æфсæддон хаймæ, чысыл аслужбæ кæныны фæстæ йæ снысан кодтой горнизоны офицерты клубы сæргълæууæгæй.
Валери каст фæцис Ленины номыл æфсæддон академи, райста булкЪоны (полковникы) чин. Постсоветон бæстæтæй сæ иуы уыд æфсæддон уынаффæгæнæг. 1994 азы йæ арвыстой Хæххон Къарабахмæ фидауынгæнæг тыхты отряды командирæй, йæ дæлбар уыд иу минæй фылдæр æфсæддоны. Йæ бæрны хæстæ цæсгомджынæй кæй æххæст кодта, службæйы йын æнтыстытæ кæй уыд, уый тыххæй хорзæхджын æрцыд «Сырх Стъалы»-йы, «За боевые заслуги»-йы, «Боевого красного знамени»-йы ордентæй.
Хæххон Къарабахы службæйы рæстæджы йе ‘нæниздзинад кæй фæцудыдта, уый тыххæй бахауд рынчындонмæ æмæ уый фæстиуæгæн ацыд отставкæйы æмæ æрыздæхт йæ райгуырæн Хуссар Ирыстонмæ. Фæлæ стыр фæлтæрддзинады хицау æгуыстæй бирæ нæ баззад, республикæйы къухдариуæгад æй снысан кодта Знауыры районы милицийы управленийы хистæрæй. Хуссар Ирыстоны адæмимæ иумæ активон хайад иста гуырдзиаг агрессоры ныхмæ тохы.
Уый фæстæ бацыд фидауынгæнæг тыхтæм, уыд уыцы тыхты оперативон управленийы сæргълæууæг. Уый фæстæ та службæ кодта РХИ-йы Хъахъхъæнынады министрады.
Уæрæсейы Федерацийы æмæ Республикæ Хуссар Ирыстоны бирæ паддзахадон хорзæхты кавалер Тедейы фырт ныртæккæ у РХИ-йы Гарзджын тыхты æмæ хæстон архайдтыты ветеранты советы сæргълæууæг. Ацы æхсæнадон организаци дæр 2020 азы йæхи хъæппæрисæй сырæзт.
Ветеранты Советы сæргълæууæгæй йæ куы равзæрстой, уæдæй фæстæмæ йæ æвæллайгæ куысты руаджы ветерантæм хуыздæр хъусдард ис. Ветерантæй алкæимæ дæр зонгæ у, алкæмæян дæр зоны сæ цардуагон уавæртæ, се ‘нæниздзинады уавæр.
Цæмæй ветеран йæхи иунæг ма хата, йæ коллектив æй кæй нæ рох кæны, цæмæй уый æнкъара, уый тыххæй Тедеты Валери йæ хæсыл нымайы алы ветераны дæр бынаты бабæрæг кæнын, йæ царды уавæртæ йын сахуыр кæнын, æмæ куы бахъæуа, уæд ын æмбæлон æххуыс бакæнын.
Тедейы фырт йæ хæсыл нымайы Гарзджын тыхты æмæ хæстон архайдтыты ветеранты баиу кæнын, ас адæймæгтæ æмæ хæстон архайдтыты хайадисджытæн æххуыс кæнын, ахуырадон уагдæтты æмæ районты Культурæйы хæдзæртты Æхсардзинады къуымтæ саразын, патриотон хъомылады тыххæй фæсивæдимæ кусын, бынæттон организацитимæ регуляронæй æмбæлын. Стыр хъусдард здахы, хæстон архайдтыты хайад чи иста, уыдонмæ æмæ сæ бинонтæм, сæрмагонд æфсæддон операцийы хайадисгæйæ ирæттæй чи фæмард, уыдон бинонтæм, номхыгъд сын аразы, хыгъды сæ æвæры. Кусы хуссарирыстойнаг хæстонты историйы къуым бакæныныл дæр. Æппæт уыдæтты тыххæй информаци сæрмагондæй йæхæдæг æмбырд кæны.
Æвæццæгæн, исчи бацымыдис кæндзæн, ахæм хъуыддæгтæ аразын, æххуыстæ кæнын ацы хуыцауысконд адæймаг цы фæрæзтæй аразы, уымæй дæр йæхæдæг ацы куыст æнæ мыздæй куы кæны, уæд.
Мæнмæ гæсгæ, адæймаг хорз хъуыддаг аразын куы сфæнд кæна, уæд йæ сæххæст кæнынæн фæрæзтæ дæр ссардзæн.
Куы базонгæ вæййынц Валерийы хæрзиуæгон æмæ хæрзаудæн куыстимæ, уæд ын разыны æххуысгæнджытæ дæр. Æрæджы Валерийы инициативæйæ, не ‘мзæххон, раздæры зындгонд спортсмен, спорты мастер, ныртæккæ РЦИ-Аланийы Парламенты депутат, фракци «Патриоты России»-йы уæнг Тедеты Дзамболат баххуыс кодта РХИ-йы Гарзджын тыхты æмæ хæстон архайдтыты ветерантæн фæйнæ 5 мин сомæй.
Тедеты Валерийы хъæппæрисæй йæ дæлбар организацийæн сразыдзинæдтæ ис горæт Дзæуджыхъæуы, Абхазы, Кæсæг-Балхъарты республикæты ветеранты советтимæ æмæ Уæрæсейы Федерацийы хъазæхъхъæгты цæдисы Сæйраг комитетимæ. Тедейы фырт ма у Хуссар Ирыстоны Уæрæсейы хъазахъхъæгты федерацийы æххæстбарджын минæвар дæр.
Валери сæрмагонд æфсæддон операцийы зонæйы дыууæ хатты гуманитарон миссиимæ кæй уыд, уый тыххæй хорзæхджын æрцыд «За Донбасс»-ы майданæй.
Тедейы – фырт æдзухæй кусы æфсæддон службæйы престиж бæрзонд кæныныл, архайы, цæмæй æхсæнад кад кæной пъагонджын адæймæгтæн.
ОСИАТЫ Индирæ
