Хуссар Ирыстоны Информаци æмæ мыхуыры комитеты уагъд æрцыд пресс-конференци РХИ-йы экономикон министр Кокойты Геннадиимæ. Пресс-конференци бацæуæн ныхасæй байгом кодта Информаци æмæ мыхуыры комитеты сæрдары хæдивæг Харебаты Майя.
Кокойты Геннади журналисттæн радзырдта нæ республикæйы экономикæйы рæзты перспективæты, инвестицион химæлвасдзинад фæбæрзонддæр кæныны фæндæгты, агросæудæджерады къабазы фидардæр кæныны тыххæй, афтæ ма æддагэкономикон бастдзинæдтæ рæзын кæныны тыххæй дæр.
Журналисттæ цы фарстытæм цымыдис кодтой, уыдонæй сæ иу уыд, æрæджы Луганскы Адæмон Республикæйы цы экономикон форум уыд, уым Хуссар Ирыстоны хайадист. Йæ куысты хайад иста Кокойты Геннади йæхæдæг дæр. Йæ ныхæстæм гæсгæ адæмон хæдзарады равдыстмæ сæ продукци рахастой сæдæ сæудæджерадон куыстуатæй фылдæр. Ацы республикæйæн ис зынгæ сæудæджерадон потенциал, кæцы здæхт у сæйрагдæр къабазмæ – дурæвзалы къахынмæ.
Министр куыд загъта, афтæмæй йын Луганскы Адæмон Республикæйы экономикон рæзты министры хæстæ æххæстгæнæг Елена Костенкоимæ цы фембæлдтытæ уыд, уыдоны рæстæджы къухты бафтыд дыууæ республикæйы экономикон блокты æмгуысткæнынады тыххæй иумæйаг документацийыл бакусын. Ныртæккæ нæ республикæйы Экономикон рæзты министрад кусы ахæм сразыдзинады проектыл.
Кокойты Геннади куыд банысан кодта, афтæмæй стыр цымыдис равзæрын кодтой Луганскы Адæмон Республикæйы Экономикон рæзты министрады фæндæттæ раззагон технологиты къабазы æмæ уыдон хъуамæ суой приоритетон Хуссар Ирыстонæн. Министр ма журналисттæн радзырдта, Хуссар Ирыстонæн йæ бон кæй у йæхимæ цымыдис равзæрын кæнын туристон-рекреацион къабазы. Афтæ ма Луганск у хуссарирыстойнаг нуазыны æмæ минералон доны потенциалон фæлхасгæнæг.
Министры ныхæстæм гæсгæ фармацевтикæйы къабазы къухтæ æрфыстæуыд мæскуыйаг компани гом акционерон æхсæнад «Иннотехнологи»-имæ, кæцыйы фæстиуæгæн, Хуссар Ирыстоны чи зайынц, уыцы хосгæнæн кæрдæджыты бындурыл уагъд цæудзысты хосгæнæн препараттæ.
«Райдианы куыстуат хосгæнæн препараттæ уадздзæнис хъæддаг зайæгойтæй, фæстæдæр та арæзт æрцæудзысты плантацитæ 8 гектары фæзуатыл, кæцы фадат ратдзæнис сæудæджерадон æгъдауæй сæ уадзынæн. Куыстуаты продукци, сæйраджыдæр, уæй цæудзæнис Уæрæсейы. Проектæн инвестицитæ рахицæн æрцæудзæн 100 милуан сомы бæрц æмæ хъуамæ реализаци æрцæуа 2019 азы марты мæймæ», – загъта уый.
Дарддæр министр æрдзырдта, республикæйы экономикæйы раз цы проблемæтæ лæууынц, уыдоны тыххæй. Уыдон фылдæр хауынц хъæууон хæ-дзарад æмæ сæудæджерадон куыстуæттæм. Банысан кодта, зæгъгæ, экономикæ ис уæззау уавæры, хъæууон хæдзарады продуктивондзинад ис ныллæг æмвæзадыл. Сæудæджерадон куыстуæттæ экономикон æгъдауæй эффективон не сты. Йæ хъуыдымæ гæсгæ сæйраг хæс у, цæмæй сæудæджерадон куыстуæттæ зиан нæ, фæлæ уой пайда æмæ æфтиæгтæ хæссой паддзахадон бюджетмæ дæр. Уыимæ ма æгуыстдзинады æмвæзад дæр бæрзонддæр кæй у, уый æхсæнады æвзæрын кæны социалон æндыгъддзинад. Æркой кодта, лимиттæм гæсгæ Уæрæсейы уæлдæр ахуыргæнæндæтты ахуыр чи фæвæййынц, уыцы рауагъдонты кой дæр, зæгъгæ, уыдонæй æрмæстдæр иугæйттæ æрыздæхынц фæстæмæ, иннæтæ тырнынц Уæрæсейы баззайынмæ.
Хъæууон хæдзарады къабазы фæдыл дзургæйæ, Кокойты Геннади банысан кодта, зæгъгæ, Хуссар Ирыстоны иу килограмм дæр дзул фых нæ цæуы бынаты æркæнгæ мæнæуæй, кæд уыцы фадæттæ ис, уæддæр. Æмæ цæвиттонæн æрхаста Ленингоры районы Орчъосаны хъæуы фермер Дриаты Гамлеты. Уый мæнæу цы 100 гектары фæзуатыл байтыдта, уыдонæй алы гектарæй дæр райста 47 центнеры мæнæу, ома, æдæппæт 500 тоннæйы бæрц æмæ æрцыд ахæм хатдзæгмæ, зæгъгæ, ахæм тыллæгæрзадимæ 4-5 мин гектары куы байтауæм мæнæу, уæд уый фагæй фылдæр у республикæйæн.
Министры ныхæстæм гæсгæ республикæйы разамынад Экономикон рæзты министрады раз æрæвæрдта хæс, цæмæй паддзахадон бюджетмæ фæфыл-дæр уой хисæрмагонд æфтиæгтæ. Кæд ивгъуыд азы уыдон уыдысты 883 милуан сомы, уæд ацы аз та уыцы нымæц хъуамæ схиза 1 миллиард соммæ. Ацы хæс сæххæст кæнынæн, куыд зæгъы, афтæмæй ис дыууæ амалы. Фыццаг у организацион оптимизаци, бухгалтерон æмæ æндæр финансон хыгъддæттынады фæтк æрæвæрын. Йæ хъуыдымæ гæсгæ, бирæ фæрæзтæ сты «æмбæхст» схемæты æмæ сæ хъæуы аууонæй ракæнын, уæд бюджетмæ æфтиæгтæ фæфылдæр уыдзысты.Министр банысан кодта, зæгъгæ, Бибылты Анатолийы разамынады рæстæджы “Бæгъиат”-ы суары заводы æфтиæгтæ фæфылдæр сты авд хатты. Кæд ивгъуыд азы æхсæз мæймæ йæ æфтиæгтæ уыдысты 200 мин сомы, уæд ацы азы уыцы рæстæгмæ та уыдысты 1 милуан 330 мин сомы. Паддзахадон унитарон куыстуат «Югоснефтепродукт» дæр бирæ азты фæстæ райдыдта исын æфтиæгтæ.
Дыккаг амал та, Кокойты Геннадимæ гæсгæ, сты инвестицитæ. Уыдон республикæмæ æрбакæнгæйæ фæфылдæр уыдзæн рауадзгæ продукцийы иумæйаг гуырахст, фæзындзысты кусæгон бынæттæ.
Йæ хъуыдымæ гæсгæ махмæ мæгуырау уавæртæ нæй барадон къабазы, ис нæм фæллойадон потенциал, уыдонимæ сыгъдæг экологи дæр æмæ банысан кодта, министрады кæй кусынц æмхъуыдыгæнджытæ, кæцытæ хорз æмбарынц сæ хæстæ æмæ сæ разы цы проблемæтæ лæууынц, уыдоны æмæ, зæгъгæ, зонынц сæ аскъуыддзаг кæныны фæндæгтæ.
Бестауты Валя
Comments are closed, but trackbacks and pingbacks are open.