Æрæджы Ростовы областы Неклиновы районы уагъд æрцыд Леонид Северы номыл поэзи æмæ поэтикон тæлмæцты æхсæнадæмон фæсивæдон фестиваль-конкурс «Берега дружбы-2024», зæгъгæ. Литературон форумы хайад райстой Уæрæсейы Федерацийы 54 регионæй, Æввахс фæсарæнты 10 бæстæйы æмæ Дард фæсарæнты 6 бæстæйы автортæ, тæлмацгæнджытæ. Проект æнтыстджынæй реализаци цæуы 2012 азæй фæстæмæ.
Фестиваль байгом æрцыд рæсугъд традици – Хæлардзинады цырагъ ссудзыны церемонийæ. Ссыгъта йæ фестивалы жюрийы сæрдар Дворцов.
Фестиваль-конкурсы хайад райста цхинвайлаг æвзонг чызг, паддзахадон телерадиокомпани «Ир»-ы радиойы кусæг Гасситы Аннæ. Йæ ныхæстæм гæсгæ, уый ныр ацы конкурсы хайад райста цыппæрæм хатт.
2021 азы фестивалы бацахста 2-аг бынат. Уыцы аз æй айстой Фысджыты æмæ аивады архайджыты æхсæнадæмон цæдисмæ. 2022 азы конкурсы ацыд 1-аг бынатыл. Ивгъуыд, 2023 азы дæр бацахста 1-аг бынат æмæ хорзæхджын æрцыд 1-аг къæпхæны лауреаты дипломæй, мадæлон æвзаджы рæзты тыххæй жюрийы сæрмагонд дипломæй æмæ «Расул Гамзатовы райгуырдыл 100 азы сæххæсты» майданæй.
Гасситы чызг ацы аз та рамбылдта Гран-При. Афтæ ма хорзæхджын æрцыд жюрийы сæрмагонд дипломæй «Мадæлон æвзаджы сфæлдыстадон рæзты» номинацийы. Фестиваль-конкурсы хатдзæгтæм гæсгæ, жюри срекомендаци кодта, Республикæ Хуссар Ирыстоны æмбæстаг Гасситы Аннæйы Уæрæсейы Фысджыты цæдисмæ райсыны тыххæй. Афтæ ма йæ фæхуыдтой Химкиты Литературон форумы сфæлдыстадон программæмæ дæр.
Райдианы уый конкурсмæ арвыста йæ авторон тексттæ. Дыккаг этапы йæхи бафæлвæрдта тексттæ тæлмац кæнынæй – æрбарвыстой йæм, французаг æвзагыл чи фыссы, тунисаг ахæм авторы æмдзæвгæтæ. Афтæ ма Молдовайæ дыууæ авторы (уырыссаг æвзагыл) æмæ белорусаг авторы æмдзæвгæтæ. Аннæ сæ ратæлмац кодта уырыссаг æмæ ирон æвзæгтæм.
Фестиваль адарддæр æвзонг автортæн поэтикон тæлмацты æппæтуæрæсейон гом скъолайæ. Конкурсы финалы та уыд байхъуыстытæ. Йæ хайадисджытæй алчидæр бакаст иу авторон æмæ иу тæлмац текст.
Афтæ ма йын фестивалы кæрон радтой сертификаттæ тæлмацты Æппæтуæрæсейон гом скъолайы хайад райсыны тыххæй. Уырдæм фæхуыдтой финалистты. Ацы аз дзы уыд дыууæ здæхты – славяйнаг æвзæгтæ, æмæ французаг, немыцаг æмæ англисаг æвзæгтæ.
Гасситы Аннæ каст фæцис нæ горæты 9-æм астæуккаг скъола. Уый фæстæ та – ХИПУ-йы дыууæ факультеты – фæсарæйнаг æвзæгты æмæ ирон филологийы факультеттæ. Зоны англисаг æмæ немыцаг æвзæгтæ, ахуыр кæны французаг æвзаг дæр.
Фестиваль-конкурс организаци æрцыд УФ-йы президенты гранты фæрцы.
Гасситы Аннæйы ныхæстæм гæсгæ мадзалы хайадисджытæн экскурситæ сорганизаци кодтой Таганрогы фенддаг бынæттæм, уыцы нымæцы Антон Чеховы номыл централон библиотекæмæ, Уыдысты Стыр Фыдыбæстæйон хæсты Адæмон æфсæддон-историон музейон комплекс «Самбекские высоты»-йы дæр. Бацыдысты Таганрогы «Балка смерти»-мæ, цыран фашисттæ амардтой мингай адæймæгты.
Фестиваль-конкурс «Берега Дружбы»-йы финалон боны хатдзæгтæ арæзт æрцыдысты йæ куыстæн. Йæ хайадисджытæн лæвæрд æрцыдысты хорзæхтæ æмæ сæ поэтикон тæлмацты бирæфарсон æмбырдгæндтæ. Афтæ ма сын уыд мастер-къластæ, литературон ахуыртæ. Ахуыргæнджытæ æвзонг автортæн амыдтой сфæлдыстадон сусæгдзинæдтæ. Уыцы бон Æхсæнадæмон фестиваль-конкурс цытджын æгъдауæй æхгæд æрцыд. Йæ хайадисджытæн æвдыст æрцыд концерт. Æрдæгæхсæвæй ахызт, фæлæ ма уæддæр хъуыстысты конкурсы хайадисджыты авторон зарджыты зæлтæ.
Конкурс-фестиваль хæссы, цардæй æнæрæстæджы чи ахицæн, уый – Уæрæсейы æмæ цæдисон паддзахад Белорусийы Фысджыты цæдисы уæнг Леонид Северы ном. Йæ хъуыддаг ын дарддæр кæны йæ цардæмбал Ирина Север Хуссар федералон университеты (г.Ростов) æмæ бирæ æндæр организаторты æппæтварсон æххуысæй. Уыдоны фæрцы раргом æрцыдысты ног цымыдисон автортæ-тæлмацгæнджытæ æмæ рухс федтой тæлмацгонд аивадон уацмысты эксклюзивон бирæфарсон æмбырдгæндтæ.
Абон фестиваль æрбаиу кодта фактон æгъдауæй æппæт планетæйы адæмты, сæ хуыздæр сфæлдыстадон минæвæртты. Фестиваль байгом кæныны церемонийы ссардтой культурон-ахуырадон проект «Берега дружбы»-йы бындурæвæрæг æмæ къухдариуæггæнæг Леонид Северы ном. Ацы аз ыл сæххæст уыдаид 65 азы.
Арфæ кæнæм Гасситы Аннæйæн ахæм æнтысты тыххæй.
ДЖИОТЫ Екатеринæ
