Президент Гаглойты Алан хайад райста Дзауы районы Котантойы хъæуы Стыр Фыдыбæстæйон хæсты хъайтартæн цырт байгом кæныны церемонийы.
Мысæн мадзалы ма хайад райстой Дзауы районы администрацийы сæргълæууæг Тыбылты Вандæ, республикæйы тыхон ведомствоты разамонджытæ æмæ æхсæнады минæвæрттæ.
Йæ раныхасы Президент раарфæ кодта Биазырты мыггаджы минæвæрттæн хъайтарты мысынад бахъахъхъæныны хъæппæрисы тыххæй. Уый хъуамæ цæвиттйонаг суа фæсивæдæн.
«Йæ истори чи нæ зоны æмæ йын кад чи нæ кæны, уыцы адæмæн фидæн нæй. Абон Котантойы хъæуы цæрджытæ сæ цæвиттонæй кæстæр фæлтæрæн равдыстой, сæ фыдæлты мысынадæн кад кæнын куыд ахсджиаг у æмæ уыдон цы сарæзтой махæн, уый рох кæнын нæ хъæуы. Уый фæрцы мах размæ цæудзыстæм», – загъта Гаглойты Алан.
Дзауы районы администрацийы сæргълæууæг Тыбылты Вандæ раарфæ кодта мысæн монумент сæвæрын кæй фæрцы бантыст, уыдонæн.
«Котантойы хъæуæй Стыр Фыдыбæстæйон хæсты рæстæджы Райгуырæн бæстæ бахъахъхъæнынмæ ацыдысты 88 адæймаджы. Уыдонæй 49 адæймаджы фæстæмæ нал æрæздæхтысты сæ хæдзæрттæм. Æмæ ацы цыртæй сæ фæстагæттæ кад кæнынц се сгуыхтдзинадæн», – банысан кодта уый.
Мадзалы кæрон йæ хайадисджытæ веноктæ æмæ дидинджытæ сæвæрдтой цырты раз.
