6-æм августы Информаци æмæ мыхуыры паддзахадон комитеты пресс-центры Хуссар Ирыстоны фæсарæйнаг хъуыддæгты министр Джиоты Æхсар фембæлд журналисттимæ æмæ радзырдта, 15 июлы Никарагуайы президент Даниэль Ортегайы фæхуындмæ гæсгæ хуссарирыстойнаг делегаци йæ сæргълæудæй хайад кæй райста Сандинистон революцийы 45 азы цытæн бæрæгбонон мадзæлтты.
Банысан кодта Уæрæсейы Федерацийы фæстæ Хуссар Ирыстоны паддзахадон хæдбардзинад Никарагуа кæй банымадта.
«Хуссар Ирыстон никуы ферох кæндзæн Никарагуайы ныфсджын æмæ хæрзиуæгон къахдзæф æмæ цæрæнбонтæм баззайдзæн республикæйы историйы», – загъта Джиоты Æхсар.
Министр радзырдта, Манагуайы сæ куыд зæрдиагæй райстой, уый тыххæй дæр.
«Никарагуайы сæйраг горæт Манагуайы нæ тынг зæрдиагæй райстой. Даниэль Ортега нæ йæхимæ райста. Уый тынг цымыдис кодта Хуссар Ирыстоны уавæрмæ, ныхас кодтам дыууæ бæстæйы дарддæры æмгуысткæнынады перспективæтыл. Уый фæстæ нын йæ цардæмбалимæ зæрдиаг фæндиæгтæ рарвыстой Хуссар Ирыстоны адæммæ æмæ Президентмæ», – банысан кодта Джиоты Æхсар.
«Фембæлд нын уыд Никарагуайы фæсарæйнаг хъуыддæгты министр Денис Монкаду Колиндресимæ дæр. Ивгъуыд аз уый æрцыд Цхинвалмæ, Уæрæсейы Федерацийы æрдыгæй Республикæ Хуссар Ирыстоны хæдбардзинад банымадыл 15 азы сæххæсты бæрæгбонон мадзæлтты хайад райсыны тыххæй. Уыд нын конструктивон диалог, банысан кодтам, дарддæр цæуыл кусдзыстæм, уыдон», – загъта дипломат.
Министр дарддæр радзырдта Инвестицитæ, базарад æмæ æхсæнадæмон æмгуыстады фæдыл Никарагуайы президенты уынаффæгæнæг Лауреано Ортега Мурильоимæ фембæлды тыххæй.
«Лауреано Ортега Мурильо нын лæм-бынæг радзырдта Никарагуайы экономикон уавæры тыххæй, инвестициты руа-джы сæ экспорты потенциалы, бизнесы куысты уавæрты тыххæй. Куыд банысан кодта, афтæмæй цæттæ сты махимæ ахастытæ райрæзын кæнынмæ, экономикæ æмæ æндæр фадгуыты æмгуыст кæнынмæ», – радзырдта Джиоты Æхсар.
Министр бузныг уыд Никарагуайы Уæрæсейы Федерацийы минæварадæй, зæрдиагæй сæ кæй райстой æмæ сæм стыр хъусдард кæй дардтой, уый тыххæй.
Министр дарддæр дзуаппытæ радта журналистты фарстатæн.
Джиойы фырт дзырдта Никарагуаимæ бастдзинæдты фæдыл. Банысан кодта, зæгъгæ, РХИ-йы Фæсарæйнаг хъуыддæгты министрад цæттæ у, Никарагуаимæ бастдзинæдтæ саразын цы организациты, ведомствотæ æмæ хицæн адæймæгты фæнды, уыдонæн баххуыс кæнынмæ.
Йæ ныхæстæм гæсгæ, дыууæ бæстæйæн дæр сæ бон у алы здæхтыты, уыцы нымæцы парламентты ‘хсæн дæр æм-куысткæнынад райрæзын кæнын.
Гæнæн ис, Хуссар Ирыстон æмæ Никарагуайы информацион агентадтæ дæр æнгом æмгуыстад кæной. Мæнмæ гæсгæ, Хуссар Ирыстоны тыххæй цас фылдæр зоной Латинаг Америкæйы, уыйас хуыздæр у.
Министр куыд банысан кодта, афтæмæй Хуссар Ирыстон фæнд кæны йæ минæварадтæ Никарагуа æмæ Венесуэлæйы бакæнын æмæ æмбæлон уавæртæ сæ къухы куы бафта, уæд сæ фæнд æххæст дæр скæндзысты.
«Æнцон куы уыдаид Никарагуа æмæ Венесуэлæйы РХИ-йы минæварадтæ бакæнын, уæд сæ дæс азы размæ бакодтаиккам, фæлæ уыцы хъуыддагæн объективон аххосæгтæ ис, фыццаджы фыццаг – финансты хъуагдзинад. Ацы фарст кæддæриддæр нæ хъуыдыйы ис æмæ тырнæм йæ сæххæст кæнынмæ. Æмбæлон уавæртæ æмæ нæм фæрæзтæ куы фæзына, уæд нæ бон бауыдзæн сæ реализаци», – банысан кодта министр æмæ ма йæ ныхасмæ бафтыдта, зæгъгæ, Хуссар Ирыстонæн Венесуэлæ æмæ Никарагуайы минæварадтæ куы уа, уæд нæ республикæйæн йæ бон уыдзæн, æрмæст уыцы бæстæтимæ алыгъуызон бастдзинæдтæ саразын нæ, фæлæ ма йæ хъус дардзæн Латинаг Америкæйы уавæрмæ дæр.
Джиойы фырты ныхæстæм гæсгæ, Уæрæсейы Федераци æмæ Гуырдзыстоны ‘хсæн дипломатон ахастытæ куы сырæзой, уæд уый ницы зиан æрхæсдзæн Хуссар Ирыстонæн.
«Уæрæсе алы хатт дæр фидарæй фæзæгъы, ома, Гуырдзыстонимæ цыфæндыгъуызон ахастытæ дæр Хуссар Ирыстоны интересты нæ дæлдзиныг кæндзысты. Уæрæсейаг коллегæтæ нæ нымайынц хæдбар паддзахадыл, æмæ нæ уый тыххæй ныфс ис, Хуссар Ирыстоны интерестæ нæ бахынцгæйæ, уыдон кæй ницы аскъуыддзаг кæндзысты. Уый тыххæй бирæ хæттыты дзырдта уæрæсейаг фарс æмæ махæн дæр уый у нæ ориентир. Уæрæсе махæн кæддæриддæр уыдзæн сабырдзинад æмæ æдасдзинады гарант, æмæ республикæ дарддæр дæр уыимæ йæ ахастытæ фидар кæндзæн», – бахахх кодта дипломат.
Дарддæр министр банысан кодта, зæгъгæ, РХИ-йы Фæсарæйнаг хъуыддæгты министрад дарддæр дæр кусы, цæмæй æндæр бæстæтæ дæр банымайой Республикæ Хуссар Ирыстоны паддзахадон хæдбардзинад.
Йæ ныхæстæм гæсгæ, уыцы здæхты куыст цæуы. Республикæйы хæдбардзинад банымайыны фарст фæсвæд æвæрд нæу, уый кæддæриддæр вæййы министрады боны фæткы æмæ йыл куыст цæуы.
«Республикæ Хуссар Ирыстоны хæдбардзинад цæмæй æндæр бæстæтæ дæр банымайой, уый тыххæй Фæсарæйнаг хъуыддæгты министрад кусдзæн, цалынмæ министрад уæвынад кæна, уæдмæ», – загъта Джиоты Æхсар.
ОСИАТЫ Индирæ
Ацы æрмæджытæ дæр бакæс:
МЕДОЙТЫ Димитр: «Сирийы Хуссар Ирыстоны хæдбардзинады банымад у ахсджиаг политикон цау»
Уæрæсеимæ ахастытæ дарддæр дæр рæздзысты æмæ фидардæр кæндзысты
Медойты Димитр: «Министрад фæсарæнты цы куыст кæны, уый у æвæлгæт, фæлæ ахадгæ»
Наниты Игорь: «Нæ архайдæн саргъгæнæн ис, æхсæнад ныл цас æууæнды, уымæ гæсгæ»
Дыууæ бæстæйы президентты ныфсдæттæг фембæлд
