Фæлхасадон хъусдарды фæдыл комитет, цалынмæ ацы аз найæн сезон нæ райдыдта, уæдмæ горæты цадмæ бахизæнты сæвæрдта табличкæтæ, цыран фыст уыд фæдзæхстытæ, цад найынæн бæзгæ кæй нæу. «Нæ комитет цады донæн саразы химикон æмæ бактериалон анализтæ æмæ уыдонмæ гæсгæ, санитарон нормæтæн дзуапп нæ дæтты. Ис дзы тъæнгты низтæ цырынгæнæг бактеритæ. Уымæн æмæ цадмæ дон цæуы Леуахийы донæй æмæ, куыд зонæм, афтæмæй Леуахийы дон та у чъизи», – зæгъы Комитеты сæргълæууæг Коцты Маринæ.
Хъыгагæн æм, хæццæ кæнынц канализацийы дæттæ дæр, стæй ма йæ уæлæ арæзт æрцыд дурцъæлгæнæн. Ацы фарсты тыххæй горæты администрацийы сæргълæууæг Хуыгаты Ромео загъта: «Хицауадмæ бахастам фæндон, цæмæй арæзт æрцæуа доны ног хахх æмæ цад уымæй йедзаг кæной. Фæлæ – ма ис иу вариант – саразын хъæуы ног хæтæл Чысыл Леуахийæ. Уый та рацæудзæн Сацхенеты каналæй. Уыцы дон у бæрæг сыгъдæгдæр. Канализацион хæххытæ йæм никæцæй иугонд сты. Дурцъæлгæнæнтæ дæр уыцы здæхты арæзт нæй. Ивгъуыд аз мах Президенты бахæсмæ гæсгæ банымадтам уыцы куыстыты аргъ æмæ нын рауадысты 50 милуан сомы. Ахæм æхцатæ ныртæккæ бюджеты нæй. Проект Инвестпрограммæмæ бахæссын дæр нæ бон нæу. Уымæн æмæ Инвестицион программæмæ хаст цы объекттæ цæуы, уыдон хъуамæ уой, социалон нысаниуæг кæмæн ис, ахæмтæ. Фæлæ афтæ зæгъæм, ома, ацы фарстатæн аскъуыддзаггæнæн нæй, уый раст нæу. Мах агурдзыстæм фæрæзтæ æмæ куыддæр фæзыной, афтæ цады хæрзарæзтад кæронмæ бакæндзыстæм», – зæгъы уый.
Йæ ныхæстæм гæсгæ, цæмæй цад Сацхенеты канаклæй йедзаг цæуа, уый тыххæй проектмæ гæсгæ доны ног хæтæл цæудзæн ног хидæй Царзы районмæ. Кæмдæрты хæтæлтæ цæудзысты гом. Ныртæккæ цад цы донæй йедзаг цæуы, уыцы дон канд Дзауы комæй нæ цæуы чъизийæ. Ам, горæты цалдæр хисæрмагонд хæдзары канализацион хæххытæ дæр æм сты иу æмæ йæ сыгъдæгдзинад зæрдæхсаинаг у. Практикон æгъдауæй æнæэффективон у дон хлорæй сыгъдæг кæнын, уый не скъуыддзаг кæны чъизи доны проблемæ. Уый æрвылаз æрвылаз дæр бафæдзæхсынц Фæлхасадон хъусдарды фæдыл комитет æмæ горæты администраци дæр, фæлæ уæддæр бирæтæ сæхи цады анайынц. Ам ма райсомæй арæх фенæн ис кæсагахсджыты дæр. Чидæртæ та дзы фæнайынц сæ куыйты дæр.
Горæты администрацийы ма куыд зæгъынц, афтæмæй сын цæрджытæй чидæртæ бауайдзæф кæнынц, кæд, дам, дон найынæн нæ бæззы, уæд, дам, æй цæмæн байдзаг кодтат. Уыдонæн сæ дзуапп у ахæм: «Цад æрмæст сæрдыгон бонты хинайынæн нæу. Ацæргæ адæмæй йе ‘нæниздзинад мæгуырау кæмæн у, зæрдæйы низтæ кæй тыхсын кæнынц, дохтыртæ тезгъо кæнын кæмæн амонынц, уыдонæн у ахъазгæнæг. Сæрд уа, æви зымæг, ам æрвылхатт дæр фенæн ис сабиты, фæсивæды, кардзыд адæмы. Фæтезгъо кæнынц, физикон фæлтæрæнтæ фæаразынц, бирæтæ та лидзгæ фæкæнынц.
Горæты мэр ма куыд зæгъы, афтæмæй нырма кæд раджы у, цы ног проект сæм ис, ууыл дзурынæн, уæддæр хъæуы фарст аскъуыддзаг кæнын. Кæд нæхи тыхтæй нæ бон саразын нæу, уæд та хъæуы инвестор ссарын.
УАЗÆГТЫ Марфа
