Ирон æвзаджы боны æмæ зынгæ ирон ахуыргонд Биазырты Алыксандры райгуырдыл 110 азы сæххæсты цытæн Хуссар Ирыстон-Паддзахад Аланийы Уанеты Захары номыл зонад-иртасæн институты 15 майы ауагъд æрцыдис зонадон конференци. Конференци байгом кодта æмæ боны фæтк æмæ регламенты тыххæй æрдзырдта, зонад-иртасæн институты директор Гаглойты Роберт. Уый фæстæ Биазырты Алыксандры райгуырды 110 азы сæххæсты сæраппонд доклад сарæзта филологон зонæдты кандидат Биазырты Аллæ. Уый банысан кодта, зæгъгæ, кæд Алыксандр сæйраджыдæр уыд фольклорист, уæддæр ирон æвзаджы  рæзт æмæ  размæцыды хъуыддаджы цы къахдзæфтæ сарæзта, уыдонæн ис стыр нысаниуæг. Йæ куыстытæй бирæ фæхъæздыгдæр ис ирон æвзаг æмæ нæ  литературæ.

Алыксандр къорд азты куыста куыд Цæгат Ирыстоны, афтæ Хуссар Ирыстоны скъолаты, зонад-иртасæн институты æмæ йын уый бирæ фæахъаз ахуыргæнæн чингуытæ рауадзыны хъуыддаджы. Алыксандр хорз бакуыста нæ литературæйы историйыл. Ирон дзыллæйад стыр кад скодтой Алыксандры æртæтомон аргъæуттæн.

Раныхасгæнæг ма банысан кодта, зæгъгæ, Алыксандр æрмæст хорз зонадон кусæг нæ уыд, фæлæ ма уыд хорз ирон æмбæстаг дæр. Кæд ын бирæтæ æппынæдзух æппæлыдысты йæ уæздандзинадæй, уæддæр раст чи нæ хъуыды кодта æмæ арæзта, уыдонæн æргомæй  æмбарын кодта сæ рæдыд.

Йæ ныхасы райдианы филологон зонæдты кандидат Дзиццойты Юри та банысан кодта, зæгъгæ, хорз хъуыды кæны Алыксандры. – Йæ ныхас мæм алы хатт дæр æвзæрын кодта стыр цымыдисдзинад æмæ-иу дзы фæхицæн уыдаин, уый-иу мæ фæндгæ дæр нал кодта. Афтæ лæгъз ныхас кодта, æмæ йæ дзырдты зын ссарæн уыд, чи нæ хъуыд, ахæм дзырд дæр. Алыксандр хорз ахуыргонд кæй уыд, уый ма бæрæг у уымæй дæр, æмæ йын йæ куыстытæн дæр стыр аргъ кодта Абайты Васо.

Биазырты Алыксандры тыххæй ма конференцийы сæ мысинæгтæ загътой зонадон кусджытæ Бигъуылаты Иринæ, Абайты Зарæ æмæ Плиты Гацыр.

Конференцийы «Нырыккон ирон æвза-джы райрæзты процесстæ»-йы фæдыл доклад сарæзта хистæр зонадон кусæг Битарты Зоя. Уый банысан кодта, зæгъгæ, æвзагмæ ивындзинæдтæ бахæссы рæстæг. Цæвиттонæн æрхаста цалдæр дæс азы размæ æмæ абоны чындзæхсæвгæнджыты ныхæстæ. Уыдон куыд фенын кодтой, уымæ гæсгæ, кæд чызджы æмæ лæппуйы бинонтæ арæзтой иу хъуыддаг, иу уыд сæ ныхас, уæддæр се ‘хсæн ис стыр хицæндзинад. Раздæры ныхасгæнджытæ æвдисынц уæздан æмæ æвзаджы сыгъ-дæгдзинад. Хъыгагæн, абон уыцы уæздан æмæ сыгъдæгдзинæдтæй не ‘взаг у ихсыд.

Зоя ма банысан кодта, зæгъгæ, Цæгат æмæ Хуссар Ирыстоны æгъдæутты æмæ æвзаджы хицæндзинæдтæ кæй ис, уый бирæбæрцæй у Гуырдзыстоны разамонджыты аххос. Уымæн æмæ «Хуссары æвзаг цалдæр хатты ивд кæй æрцыдис, уый мæ-гуырауæрдæм бандæвта не ‘мгуысткæ-нынад æмæ нæ ахастытыл. Раздæр ирон æвзаджы сæрыл чи тох кодта, уыдоны æхсгæ кодтой, фæстæдæр, гуырдзиаг скъолаты ныхмæ чи уыд, уыдон та – ахсгæ». Уый фæстæ Битарты Зоя ирон æвзаджы рæзт æмæ размæцыды тыххæй бахаста цалдæр фæндоны.

Ирон æвзаджы реляци æмæ деривяцийы миниуджыты тыххæй та конференцийы доклад сарæзта зонад-иртасæн институты хистæр зонадон кусæг Тыбылты Ингæ.

Гæззаты Иван

Comments are closed, but trackbacks and pingbacks are open.