Ахæм аз нæ уыдис, æмæ æз газет «Хурзæрин» ма рафыссон. 35 азы фæкуыстон ахуыргæнæгæй, хъуыды ма йæ кæнын, куысты-иу кæрæдзийы дзыхæй куыд скъæфтам, газеты радон номыры мыхуыры цы рацыд, уыдоны хабæрттæ. Хорз уацтæ иу куыд цингæнгæйæ кастыстæм æмæ нæ уыцы хорз хабæрттæ куыд разæнгард кодтой ноджы стырдæр фæллойадон æнтыстдзинæдтæм.
Пенсийы рацыдтæн, ныр мæ цот дæр сыстыр сты æмæ мын фылдæр рæстæг фæзынд газет кæсынæн. Бауырнæд уæ «Хурзæрин»-ы радон номырмæ фенхъæлмæ кæсын, сывæллон йæ мадмæ куыд æнхъæлмæ кæсы, афтæ. Цы бонты нæ рацæуы, уыцы бонты райсын раздæры номыртæ æмæ сæ ногæй бакæсын — æвæрд мын сты кæрæй-кæронмæ.
Тынг алыгъуызон цымыдисаг æрмæджытæ дзы вæййы, куыд хистæр кары адæмæн, афтæ фæсивæд æмæ скъоладзаутæн дæр. Уæдæ республикæйы цы цаутæ æрцыд, куыд рæзы уыдæтты тыххæй, зæгъай, сæрмагонд æфсæддон операцийы хабæрттæ, фæсарæйнаг дывæрсыг политикæйы фæзилæнтæ, уæрæсейаг политикæ æмæ афтæ дарддæр.
Сæ фыдæбон бирæ у газеты редакцийы кусджытæн æмæ сын мах, газеткæсджытæ, хъуамæ аккаг аргъ кæнæм. Сæ архайд ирон дзырд, ирон фарны тыххæй у, æмæ мах дæр сæ фарсмæ хъуамæ балæууæм. Кæд сын нæ бон æппын ницæмæй у баххуыс кæнын, уæддæр нæ хæс у газет «Хурзæрин»-ы фæцудын ма бауадзын. Уадз æмæ алы ирон хæдзары дæр уа газет. Фыссут æй, кæсут æй уæхæдæг дæр æмæ йæ уарзын кæнут уæ кæстæртæн дæр.
Зæгъынц, зæгъгæ, ивгъуыд азимæ абаргæйæ газеты тираж нæ фæфылдæр. Уый дæр мын тынг хъыг у. Йæ рафыссыны рæстæг куы æрхæццæ вæййы, уæд дын искæй дзурын цæмæн хъæуы?
Газеты алы хатт дæр вæййы хъусынгæнинаг æмæ кæд дæхицæн дæ бон цæуын нæу, уæд постхæссæгæн зæгъ æмæ дын æй рафысдзæн. Мæ сыхæгтæй бирæтæ фæзæгъынц, фæнды, зæгъ, мæ газет рафыссын, фæлæ дам цыбыркъух дæн. Æхсæз мæйы иу хатт газетæн уыцы къапеччытæ куы рахицæн кæнай, уæд уымæй мæгуырдæр нæ фæуыдзынæ? Нæ зонын, чи куыд хъуыды кæны, фæлæ мæнæн цалынмæ мæ хъуыдыкæнынад кусы, уды мидæг дæн, уæдмæ мын газет «Хурзæрин» æнæ фысгæ нæй.
Ацы аз нæ республикæйы радон хатт бæлвырд цæуынц Хетæгкаты Къостайы премийы лауреттæ.
Сбæрæг сты литературæ æмæ аивады къабæзты Хетæгкаты Къостайы номыл паддзахадон преми райсыны кандидаттæ. Æдæппæт 5 номинацийы уыдзæн 5 уæлахиздзауы.
Уыдон сты, се сфæлдыстад нырыккон ирон культурæ, литературæ æмæ публицистикæйы чи кусы, уыцы архайджытæ – ахуыргæндтæ æмæ дзыллон информацийы, ома, публицистикæйы фадыджы бындурыл арæзт кæмæн у, ахæм поэттæ, фысджытæ, нывгæнджытæ. Уыцы нымæцы ис газет «Хурзæрин» дæр. Къамисы уæнгтæ бæстонæй æркæсдзысты алкæй куыстытæм дæр. Зæгъдзысты сæ хъуыдытæ, байхъусдзысты сæ кæрæдзимæ. Уый фæстæ октябры мæйы сусæг хъæлæсæппæрсты фæстæ сбæрæг кæндзысты Хетæгкаты Къостайы премийы лауреатты нæмттæ.
Газет «Хурзæрин» ныр 100 азы цы рухстауæн куыст кæны, уымæ къамисы уæнгтæ хъуамæ фылдæр хъусдард аздахой. Кæй зæгъын æй хæуы, публицистикæйы фадыджы ацы преми æмбæлы газетмæ. Ирон дзырд бахъахъхъæныныл зæрдиагæй «Хурзæрин»-ы архайдæн æмбал нæй. Йæ куыстыт хуыздæр æвдисæн — йæ 100 азон æвæллайгæ куыст.
Ирон культурæ, æгъдау æмæ аивад зынаргъ кæмæн у, уый аргъ кæнын зоны газеты куыстæн. Кæй зæгъын æй хъæуы, къамис йæхæдæг аскъуыддзаг кæндзæн, чи суа Къостайы премийы лауреат, фæлæ æз, куыд хуымæтæг газеткæсæг, афтæ æнæрхъæцæй æнхъæлмæ кæсын «Хурзæрин» -ы уæлахизмæ.
Æнувыд газеткæсæг
Джиоты Клавдия,
г. Цхинвалы цæрæг
