1-æм августы Гаглойты Алан бабæрæг кодта, БАМ-ы районы Плиты Харитоны уынгыл бирæуæладзыгон хæдзæртты рæзты цы хæрзарæзтадон куыстытæ цæуы, уыдон. Йемæ ма уыдысты фæндæгты арæзтад æмæ автомобилон фæндæгты эксплуатацийы фæдыл комитеты сæрдар Гæбæраты Алан, горæты администрацийы сæргълæууæг Хуыгаты Ромео æмæ æндæр бæрнон адæймæгтæ.
Гаглойты Алан раондæй баззад, уæлдæр банысангонд уынджы арæзтадон куыстытæ куыд цæуынц, уымæй: «Æхсызгон мын у фæндагæй ист кæй æрцыд алыгъуызон мæнгагъуыстытæ æмæ æфсæн гаражтæ. Уый фæндаг ауæрæхдæр кодта, ныр уæм цыма райдзастдæр у. Бирæуæладзыгон хæдзæрттæ дæр кæрæдзимæ разындысты. Кæд иуæй-иуты нæ фæндыд се ‘фсæн гаражтæ исын, уæддæр адæм кæрæдзи бамбæрстой æмæ иу хъуыдымæ æрцыдысты. Ныр кусынæн уавæртæ ис æмæ фæндагаразджытæ сæ куыст бакæндзысты. Мæнмæ афтæ кæсы, ам куыстытæ кæронмæ куы фæуой, уæд уæ район уыдзæн иттæг аив. Мах бавналын фæндыд æндæр районты кæртытæм дæр. Цæрджытæн радтам рæстæг, цæмæй нын саразой куысты фадæттæ, фæлæ уыдон нырма дæр нæ аскъуыддзаг кодтой, сæ гаражтæ цы фæкæндзысты, уыцы фарст. Мах та нæ хъавæм æрдæгкуыстытæ кæнынмæ. Цы аразæм, уый нæ фæнды гъæдджынæй саразын, цæмæй та цыбыр рæстæгмæ асфальт къахинаг ма фæуа. Уымæ гæсгæ уæм сидын, кæрæдзи æмбарæм, нæ кæрæдзийæн цæлхдуртæ ма аразæм».
Гæбæраты Алан президенты базонгæ кодта, абоны онг фæндаджы арæзтады сæ къухы цы куыстытæ бакæнын бафтыд, уыдонимæ: «Кусджытæй алкæмæндæр йæхи хæстæ ис, иутæ техникæйыл кусынц, аннæтæ тротуартыл бордюртæ æвæрынц, уæзласæн машинæтæ ласынц хуыр æмæ дзы йедзаг кæнынц тротуарты ‘хсæнтæ.
Ам арæзт æрцæудзæн цъæхдарæнтæ, ныссадзыстæм алыгъуызон дидинджытæ.
Раздæр дзы цы бæлæстæ уыд, уыдон иуæй зæрæдтæ уыдысты, стæй сагъд уыдысты фæндаджы былтыл. Экскаватор фæндаджы уæлцъар куы иста, уæд сæ бындзæфхæдтæ бахъыгдард сты. Уымæ гæсгæ цæрджытимæ æрцыдыстæм иу хъуыдымæ; цæмæй куыст ма къуылымпы кæна, уый тыххæй бæлæстæн æнæракалгæ нæй. Ацы районы никуы уыд къæвда-æмбырдгæнæн къанаутæ, уымæ гæсгæ-иу мит куы тад, уæд дзы ахизæн нæ уыд фистæгæйцæуджытæн. Ныр уыцы проблемæ дæр аиуварс кæндзыстæм. Рухсы хæххытæ цы цæджындзтыл уыдысты, уыдон базæронд сты æмæ иуæрдæм фæкъул сты. Ныссагътам ног телцæджындзтæ æмæ сыл тагъд «Энергоресурс»-ы кусджытæ электрон хæххытæ аиваздзысты. Фæлæ иууыл тынгдæр мæ зæрдæ цæмæй рухс кæны, уый у, нæхи кусджытæ тротуарон плиткæтæ æмæ бордюртæ æвæрын кæй базыдтой. Ныр нал хъæудзæн æнхъæлмæ кæсын æрцæуæггаг специалисттæм. Хатт-иу уыдонмæ æнхъæлмæ кастыстæм мæйгæйтты. Нæхимæ цы специалистты бригадæ сырæзт, уый кусы цырд æмæ гъæдджынæй», – дзырдта Гæбæраты Алан.
Президент дæр хорзыл банымадта, бынæттон специалисттæ кæй кусынц, уый. Арæзтадон æрмæджытæй сæ Иры хъæуы арæзтадон завод кæй ифтонг кæны, хуыр æмæ змис ласын дæр дардæй кæй нæ хъæуы, уый дæр, куысты темптæ рæвдздæр кæны.
Президент ма йæ хъус аздæхта бирæуæладзыгон хæдзæртты астæу сывæллæтты хъазæн фæзмæ. Ам цы иугай хъазæнтæ ис, уыдонæн сæ фылдæр сты цалцæгкæнинаг. «Æвæстиатæй æркæсын хъæуы хъазæн фæзмæ. Цæмæй къæвда-боны фæстæ ныййарæг æдæрсгæ рауадза йæ сывæллон ардæм, уый фадат дзы нæй. Тагъд ацы кæрты кæстæр кары сывæллæттæн фæзындзæн ног комфортон уавæртæ хъазынæн». Гаглойты Алан конкретон амындтытæ радта йе ‘ххуысгæнæг Æлборты Алан æмæ горæты администрацийы сæргълæууæг Хуыгаты Ромеойæн.
УАЗÆГТЫ Марфа
