Зынгæ фæфылдæр хъалонтæй æфтиæгты бæрц

Республикæ Хуссар Ирыстоны Президент Бибылты Анатоли, РХИ-йы Хицауады Сæрдар Пухаты Эрик, афтæ ма РХИ-йы Хицауады Сæрдары хæдивæг, Экономикон рæзты министр Бекъойты Геннади хайад райстой Хъалонтæ æмæ фиддонты фæдыл комитеты коллегийы, кæцы баст уыд 2018 азы куыстæн хæтдзæгтæ саразын æмæ 2019 азы фыццаградон фарстытимæ.

Хъалонтæ æмæ фиддонты фæдыл комитеты сæрдар Къадзты Владимир куыд банысан кодта, афтæмæй 2018 азы РХИ-йы паддзахадон бю-джетмæ фæрæзтæ ахынцыны план æххæст æрцыд 103, 7 процентæй.

2017 азмæ  абаргæйæ, хъалонты æфтиæгтæ фæфылдæр сты 102 615, 2 мин сомы.

Иууыл егъаудæр хъалонфидджытыл уый банымадта арæнгонд бæрндзинады æхсæнад «Газпром Трансгаз Ставрополь»-ы хицæнгонд дæлхай – Цхинвалы цалцæггæнæн-эксплуатацион пункт, æхгæд акционерон æхсæнад «Остелеком», Паддзахадон унитарон куыстуат «Энергоресурс-Хуссар Ирыстоны», Хæрзарæзтады управлени, Паддзахадон унитарон куыстуат «Югоснефтепродукт», Паддзахадон унитарон куыстуат «Дорэкспострой», гом акционерон æхсæнад «БТК-4», арæнгонд бæрндзинады æхсæнад «СТМ-ЮГ».

Къадзты Владимир ма банысан кодта, зæгъгæ, æфтиæгты бæрæггæнæнтæ, сæйраджыдæр, фæбæрзонддæр сты административон мадзæлттæ фæхуыздæр кæныны фæрцы.

Йæ хъыгъдлæвæрды хъалонты службæйы сæргълæууæг дзырдта проблемон фарстытыл дæр. Зæгъæм, хъалонты органты раз ивгъуыд азы хыгъд радтой æрмæстдæр юридикон цæсгæмтты 35, 6 проценты.

Бибылты Анатоли банысан кодта, ацы уавæр кæй хъæуы рараст кæнын иумæйаг тыхтæй Мидхъуыддæгты министрады, Паддзахадон æдасдзинады комитет æмæ прокуратурæйы æмбæлон органтимæ.

«Хъæуы рабæрæг кæнын ахæм хъалонфидджыты, аууоны экономикæ легалон фæндагмæ ракæнын, пенсион фондмæ хъалонтæ цы куыстуæттæ нæ фидынц, уыдоныл бандавыны механизмтæ агурын», – загъта республикæйы сæргълæууæг.

Афтæ ма ныхас цыд хъалонты æнæфыст хайы фарстытыл. Хыгъдон доклады куыд банысанчындæуыд, афтæмæй 2019 азы январы мæйы хъалонты æмæ фиддонты фæдыл иумæйаг хæс уыд 701 292, 6 сомы.

Президент банысан кодта, зæгъгæ, хъалонты æнæфыст хай æрцагурыны проблемæмæ хъæуы æркæсын æмæ Пухаты Эрикæн бахæс кодта ацы фарстмæ йæ хъус æрдара.

«Курæг дæн, цæмæй ацы фарстыл бакуыстæуа, ахæм хуызы æмæ æхцайы фæрæзтæ æцæгæй æрбаздæхой,  пенитæ æвæрын проблемæ скъуыддзаг кæнынæн ницы дæтты», – банысан кодта Президент.

Коллегийæн хатцæгтæ аразгæйæ, Президент банысан кодта, хъалонисджытæ æнтыстджынæй кæй скъуыддзаг кæнынц сæ сæйраг фарст –  РХИ-йы бюджет æххæст кæнынц, æмæ бузныджы ныхæстæ загъта сæ куыстмæ цæсгомджын, принципиалон ахасты тыххæй.

«Хъалонты службæйæн æнтысы азæй-азмæ фиддонты гуырахст фылдæр кæнын. 2017 азы, президенты бынатмæ мæ бацыды фыццаг азы, паддзахадон бюджетмæ афæдзы дæргъы хъалонты æфтиаг уыд 745 милуан сомы. 2018 азы кæрон хъалонты фæдыл æфтиаг фæфылдæр ис 1 миллиард 40 милуан сомы онг, бюджетмæ иумæйаг æфтиаг у 1 миллиард 300 милуан сомы. Æмæ сæйраг нысаниуæг ацы хъуыддаджы уæ куыстæн ис. Фæлæ хъуыддаг ууыл нæ фæуд кæны, ис дарддæр дæр хуыздæр кусæн», – банысан кодта Бибылты Анатоли.