Мыхуыры рацыд Цæгат Ирыстоны зонадон æмæ æхсæнадон-политикон журнал «Вестник Владикавказского научного центра Российской академии наук»-ы радон, цыппæрæм номыр.
Æдзухон рубрикæ «Къласикон ассоциацитæ»-йы филологон зонæдты доктор Хуыгаты И.С. йæ очерк «Непотопляемая утопия»-йы æвдисы Октябры революцийы æмæ социализмы къласон тохы хæрзæгъдауон æмæ этикон мидис, ацы хатт проблемæ æмных кæны Александр Грины радзырд «Кирпич и музыка»-йы мидисимæ. Йæ сæйраг хъайтар у, ахуырдзинад кæмæ нæй, ахæм пролетари. Цы йæ бацырын кодта ныхмæлæууæн архайдмæ? Уымæн агуры дзуапп.
Филологон зонæдты кандидат Сатцаты Э. Б. йæ уац «Проблема выделения именных частей речи в осетинском языке»-йы дзырд цæуы ирайнаг æвзаджы мифологийы ныхасы хæйтты проблемæйыл. Уый у ахсджиаг, фæлæ фаг иртæст не ‘рцыд. Ирон æвзаджы практиконæй ахуыр кæнгæйæ, авторы хъуыдымæ гæсгæ æмбæлы ныхасы хæйттæм ногæй æркæсын æмæ сын анализ скæнын.
Тыбылты Алыксандры номыл Хуссар Ирыстоны паддзахадон университеты доцент, Уанеты Захары номыл Хуссар Ирыстоны зонад-иртасæн институты хистæр зонадон кусæг, филологон зонæдты кандидат Дзугаты Къоста йæ уац «Южная Осетия и Большой террор в Советской Грузии»-йы æвдисы 1937-1938 азты Хуссар Ирыстоны репресситы спецификæ, анализ кæны, уый тыххæй цы бæрæггæнæнтæ ис, уыдо-нæн, хатдзæгтæ аразы, Хуссар Ирыстоны националон змæлд ныннымæг кæныны тыххæй гуырдзиаг хицауиуæгад цы Стыр террорæй спайда кодта, уымæн.
Куыд æрвыл хатт, афтæ ныр дæр цымыдисон у Тауаситы Р. А.-йы уац «Деградация ледника Хъæрæугом. Динамика отступания ледника». Авторы хатдзæгтæ сты ахсджиаг æмæ пайдайаг. Уацы æвдыст æрцыд Кавказы иууыл стырдæр æртæ цъитийæ сæ иу – Хъæрæугомы цъити къаддæр кæныны динамикæ. Чы-сыл цъитиджын рæстæджы максималон дугæй 2017 азы онг цъити фæстæмæ алæууыд 3042 метры, йæ астæуккаг тагъдад у афæдз 18,55 метры. 1989 азы фыццаг лæсæн куы æрцыд, уæд цъити фæстæмæ алæууыд 455 метры.
Будайты А. А. та йæ уац «Оценка уровня социально-экономического развития субъектов СКФО методом эталонов»-ы равдыста, эталонмæ гæсгæ арæзт субъектты социалон-экономикон æмвæзадæн куыд аргъ цæуы, уый. Раразмæгонд æрцыд математикон модуль, йæ сырæзты алгоритм, уымæй дарддæр ма æр-хаста, Цæгат Кавказы федералон зылды субъектты рæзты æмвæзады аргъы сæраппонд куыд пайда цæуы, уый дæр.
Уац «Состояние и проблемы развития инновационной сферы Республики Северная Осетия-Алания»-йы Олисаты Л. Г. æмæ Дзакоты З. Л анализ аразынц Республикæ Цæгат Ирыстон-Аланийы инновацион фадыджы уавæрæн. Уыимæ иумæ ма æргом æрцыд республикæйы социалон-экономикон уавæры бæрæггæнæнты уавæр, æргом æрцыдысты проблемæтæ, нысан æрцыдысты сæ аиуварс кæныны фадæттæ.
Хъæууонхæдзарадон зонæдты кандидаттæ Дойаты Л. Ю., Лихненко С. В. æмæ Зæнджиаты В. Т. æрзайын кодтой картофы ног сорттæ – «Щербининский» æмæ «Волжанин», æфтиагджын кæй сты, уый æмбарын кæнынц «Эффективность выращивания сортов картофеля «Волжанин» и «Щербининский»-ы.
Рубрикæ «В помощь учителю»-йы бын æвæрд æрцыд Еремина А. Ф. æмæ Селиверстова Г. П.-йы æрмæг «Лабораторный эксперимент по физике в школе», цыран рекомендацитæ лæвæрд цæуы физикæйы ахуыргæнджытæн физикæйæ лабораторон æмæ практикон куыстытæ уадзынмæ ахуыргæнинæгты бацæттæ кæныны методикæйы фæдыл.
Рубрикæ «Памяти ученого»-йы бын та мыхуыр æрцыд Хуыгаты И. С.-йы уац «О научном творчестве Марины Людвиговны Чибировой (1970-2017)». Йæ уацы автор ра-дзырдта Ирыстоны зындгонд æмæ адæмæн хæлар адæймаг Цыбырты Маринæйы тыххæй, кæцы уыд зынгæ паддзахадон æмæ æхсæна-дон архайæг, курдиатджын ахуыргонд-филолог, кæцыйы зонадон куыстытæ хицæн кæнынц сæ хæдхуыз æмæ се стилæй æмæ ирон литературæзонынады ахсы зынгæ бынат.
Журналы мыхуыр æрцыд профессор Чеджемты С. Р. рецензи «Городская власть дореволюционного Владикавказа: история и теория» Цæлиты А. М.-йы чиныг «Владикавказские институты власти и их деятельность в пореформенный период»-ы тыххæй.
Рубрикæ «Научная жизнь»-ы бын лæмбынæгæй æвдыст æрцыдысты Зонады VII-æм Æппæтуæрæсейаг фестивалы Дзæуджыхъæуы регионалон фæзуаты мадзæлттæ, афтæ ма дзы мыхуыр æрцыд Дзæуджыхъæуы зонадон центры мыхуырон рауагъдадыл традицион афæлгæст.
Профессор Къусраты Анатолийы уац «Об основных направлениях модернизации Юго-Осетинского государственного университета им. А.А. Тибилова» мыхуыр æрцыд Хуссар Ирыстоны паддзахадон университетыл 85 азы сæххæсты цытæн арфæимæ.
Журналы номыр куы сцæттæ, уæд райхъуыст зынгæ ирон ахуыргонд, историон зонæдты доктор, профессор, Республикæ Хуссар Ирыстоны зонады сгуыхт архайæг, археологийы фадыджы зынгæ специалист Тъехты Баграты фæзианы тыххæй фыдуац. Уый фæстиуæгæн журналы мыхуыр æрцыдысты мæсæллæйы ныхæстæ.
Comments are closed, but trackbacks and pingbacks are open.