Ӕрӕджы та милицийы экономикон фыдракӕндтӕ ма ӕруадзыны фӕдыл управленийы кусджытӕ радон хатт басгӕрстой нӕ горӕты дуканитӕ ӕмӕ та дзы иуы ссардтой энергетикон нозтытӕ уӕййаг. Дуканийы хицауыл бакодтой административон суагъӕ ӕмӕ йӕ тӕрхондон рӕхджы фӕивар кӕндзӕн. Контрафактон товар сконфискаци кодтой, фӕлӕ проблемӕ иуварс не рцыд.
Хуссар Ирыстоны территорийыл энергетикон нозтытӕ уӕй кӕнын нӕ уадзынц 2012 азӕй фӕстӕмӕ. Фӕткхалдджытӕ ивар цыдысты ӕмӕ ма-иу сын сӕ товар дӕр байстой. РХИ-йы парламент райста сӕрмагонд закъон ацы зианхӕссӕг нозтыты тыххӕй, фӕлӕ уыцы закъоны уыд хъӕндзинӕдтӕ. Фыццаджыдӕр, ӕфхӕрд нӕ цыдысты, зианхӕссӕг нозтытӕ ардӕм чи ласта, уыдон. Уымӕ гӕсгӕ сӕ сӕрибарӕй ластой ӕмӕ-иу дзы дуканигӕстӕ хӕрзцъус ӕрӕвӕрдой сӕ дуканиты. Рейдон мадзӕлтты рӕстӕджы-иу дзы милицийы кусджытӕ бамбӕлдысты цалдӕргай банкӕтыл, кӕд ӕмӕ йӕ зыдтой дзӕвгар сӕм дзы кӕй ис, уӕддӕр. Ома дзы адӕймагмӕ хӕдзары цасфӕнды дӕр куы ссардтаиккой, уӕд сӕ сӕ бон байсын нӕ уыд. Хӕдзары ахӕм товар дарынын тыххӕй бӕрндзинад хӕссын закъоны фыст нӕ уыд. Стӕй ма сӕ искуыдӕм куы ластаис автомашинӕйыл, уӕддӕр дын сӕ ничи байстаид – закъоны уыцы нормӕ дӕр хаст нӕ уыд.
Ацы аз 17 сентябры нӕ Парламенты ӕркастысты ногӕй ацы закъонмӕ ӕмӕ йӕм ивындзинӕдтӕ бахастой. Ныр дӕ энергетикон нозтытӕ ласгӕйӕ куы ӕрцахсой, кӕнӕ та дӕм хæдзары ӕвӕрдӕй куы разыной, уӕд дӕ ног райсгӕ закъонмӕ гӕсгӕ бафхӕрдзысты. Уымӕй уӕлдай ма йӕм бахастой ахӕм нормӕ дӕр, кӕцымӕ гӕсгӕ цалдӕр хатты кӕй ӕрцахсой энергетикон нозтытимӕ, уыдон кӕй цӕудзысты карздӕр ӕфхӕрд.
Энергетикон нозтытӕ кӕд хуымӕтӕг адӕймаг ласа кӕнӕ сӕ араза, уӕд ног закъонмӕ гӕсгӕ ивар ӕрцӕудзӕн 3-5 мин сомы. Кӕд ӕмӕ амалиуӕггӕнӕг разына фӕткхалӕг, уӕд та йӕ фӕивар кӕндзысты 10-20 мин сомы.
Энергетикон нозтытӕ хуымӕтӕг адӕймаг куы уӕй кӕна, уӕд та йæ ивар кæндзысты 1,5-2 мин сомы. Амалиуӕггӕнӕг куы разына, уӕд та – 3-4 мин сомы.
ДЖИОТЫ Алыксандр
