Æрæджы амалиуæггæнæг, дипломат, историйы дæсны, журналист, меценат, Республикæ Хуссар Ирыстоны минæвар Сербаг Республикæйы Уалыты Гелæ Абрекы фырт нын Мæскуыйæ фехъусын кодта, зæгъгæ, йæм Босни Герцеговинæ æмæ Сербаг республикæйæ бæрнон æмæ цытджын делегаци фæуазæг ис Ирыстонимæ культурон бастдзинæдтæ фидаргæнæн фæндонимæ.
Делегацийы сконды уыдысты: Босни æмæ Герцеговинæйы паддзахадон æдасдзинады министр Ненад Нешич æмæ культурæйы министр Никола Селакович: Сербаг аргъуаны епископ Мæскуыйы сербаг чырыстон миссийы сæргълæууæг Стефан (паспортмæ гæсгæ у Драган Шарич); Белграды Сыгъдæг Саввайы аргъуаны (æппæт дунейы стырдæр чырыстон аргъуан у – ред.) разамонæг сауджын Ненад Еванович; «Сербигаз»-ы президент Душан Баятович.
Хетæгкаты Къостайы юбилейон азы уазджытæ æрцыдысты ахæм инициативæимæ: сербаг æмæ ирон адæмы бастдзинæдтæ сфидар кæныны сæраппонд, цæй æмæ ирон литературæ æмæ нывкæнынады бындурæвæрæг, чырыстон динылхæст Къостайæн Белграды сæвæрæм бюст, Иво Андричæн – сербаг фыссæг, Нобелы номыл премийы лауреатæн та бюст сæвæрæм Дзæуджыхъæуы.
Сæрмагондæй ам зæгъын хъæуы уый дæр æмæ ацы инициативæ Сербаг чырыстон аргъуанæй кæй рацыд.
Сербаг аргъуаны Сыгъдæг Синод Уалыты Гелæйы схорзæхджын кодта Сыгъдæг Саввæйы 1 къæпхæны орденæй. Уый у Сербаг чырыстон аргъуаны æппæты стырдæр хорзæх. Аргъуаны уæлдæр иерархтæ æмæ стыр политиктæн лæвæрд æрцыд. Зæгъæм, Сыгъдæг Саввайы 1 къæпхæны орденæй хорзæхгонд æрцыдысты Владимир Путин æмæ Дмитри Медведев, Мæскуыйаг æмæ æппæт Уæрæсейы патриарх Алексий II æмæ йæ фæстæ чи слæууыд Уырысы аргъуаны сæргъ, уыцы патриарх Кирилл…
Джусойты И.
Къамы: Уалыты Альберт, Никола Селакович, Уалыты Гелæ, Душан Баятович
