РХИ-йы Хицауады Сæрдар Хъуылымбегты Доменти, йемæ Ахуырады министр Гасситы Натали афтæмæй инспекцион азылд сарæзтой Цхинвалы ахуырадон уагдæттыл.
Æрвылбонон ахуырадон процесс куыд цæуы, ахуыргæнинæгтæ куыд хæрынц, цахæм зындзинæдтыл æмбæлынц ахуыргæнджытæ? Уыдæтты æмæ бирæ æндæр фарстытыл дзырдта Хицауады Сæрдар иумиагахуырадон уагдæтты къухдариуæггæнджытимæ, къорд скъоламæ, афтæ ма Хъайтарты уынджы сывæллæтты арæзтцæуæг цæхæрадонмæ бацæугæйæ.
Фыццаг рады Хъуылымбегты Доменти цымыдис кодта, скъолаты ахуыргæнинæгты хæлц куыд организаци цæуы, уымæ: цæмæй конд у сæ æрвылбонон меню, цас балансгонд у, æмæ цас цæуы сывæллæтты зæрдæмæ?
Уымæй дарддæр ма Хицауады Сæрдар ахуыргæнджыты фарста, куыд цæуы къласæн æддейæ ахуырадон куыст, цахæм иумæйагскъолайон мадзæлттæ уагъд цæуынц, уыдæтты тыххæй.
6-æм астæуккаг скъолайы директор Людмила Александрова банысан кодта, зæгъгæ, скъолайы хæрæндонмæ цы продукттæ ласт цæуынц, уыдоны гъæд у рæстæмбис, фæлæ ис фиппаинæгтæ менюйы скондмæ. «Хорз уаид æмæ йæ фылдæр хай куы уаиккой халсæрттæ æмæ æхсыры продукттæ», – банысан кодта директор. Æмæ ма ноджыдæр загъта ахуыргæнинæгты хæлцы балансдзинады ахсджиагдзинады тыххæй. Йæ хъуыды ахæм уыдис 2-æм астæуккаг скъолайы директор Ольга Михайлидийæн дæр.
Практикон æгъдауæй хæлцы фæдыл фарстытæ скъуыддзаг æрцыдысты гимназ «Альбион»-ы, кæцы ныр 3-аг аз кусы ног бæстыхайы. Нырыккон ифтонггæрзтæй ифтонг уæвгæйæ, хæрæндонæн фадат ис, цæттæ кæна алыгъуызон хæринæгтæ уыцыиу рæстæджы.
Хъуылымбегты Доменти Гасситы Наталийæн бахæс кодта, цæмæй бакуса скъолаты къухдариуæггæнджыты фæндæттыл ахуыргæнинæгты хæлцы фæдыл æмæ ма банысан кодта, зæгъгæ, ацы фарстытыл уынаффæ цæудзæнис Хицауады æмвæзадыл дæр.
«Скъоладзауты хæлц у ахуырадон процессы ахсджиаг хай. Мах хъуамæ æруынаффæ кæнæм хæлцады финансон нормативтыл дæр, базонæм, уыдон цас бæрцæй дзуапп дæттынц абоны домæнтæн æмæ сæ уæвæг фадæтты фæлгæтты фæхуыздæр кæнæм», – банысан кодта Хицауады Сæрдар æмæ ма загъта, зæгъгæ, ахуырадон процесс у бирæварсон æмæ йæм кæсын хъæуы æппæт хæсты комплексимæ иумæ.
Зæрдыл лæууын кæнæм, абоны бонмæ скъоладзауы аходæн паддзахадæн кæй лæууы 20 сомы, комплексон сихор та – 47 сомы.
Азылды рæстæджы Хицауады Сæрдар йæхимæ банысан кодта, скъолаты къухдариуæггæнджытæ æмæ ахуыргæнджытæй цы фæндæттæ бацыдис, уыдоны, уыцы нымæцы скъолайы бæстыхæйтты цалцæг кæнын æмæ кабинетты ифтонггæрзтæй сифтонг кæнынмæ хауæг фæндæтты дæр.
Алы ахуырадон уагдонмæ дæр уыдис, цы фенын кодтаиккой æмæ цы радзырдтаиккой, уый. Алы ран дæр тырныдтой амоныны сæхи стиль ссарын, кæцы фæуæрæхдæр кæна скъолайон дисциплинæты фæлгæттæ æмæ фадат радтой сфæлдыстадон фæсивæд хъомыл кæнынæн.
«Махмæ ис иттæг хорз ахуыргæнджытæ, кадджын ахуырадон традицитæ, кæцытæ нæ фесæфтысты, æгæрыстæмæй, иууыл уæззаудæр рæстæджыты. Æмæ абон махæн ис, ахуырадон процесс куыд аразæм, ахуырады системæ куыд рæзын кæнæм, уый. Хицауад æмæ ахуыргæнджытæ хъуамæ æрбаиу уой, цæмæй ахуырадон уагдæттæй цæуой ахуыр-гонд, конкурентхъом æвзыгъд æрыгон адæймæгтæ æмæ мах, гæнæн уæвгæйæ, æппæт дæр сараздзыстæм, цæмæй скъолайæн баххуыс кæнæм сæ ахсджиаг мисси æххæст кæнынæн – æрыгон фæлтæр, республикæйы фидæны хъомыл кæнынæн», – банысан кодта Хъуылымбегты Доменти.
Азылды рæстæджы ма уый бацыд, капиталон æгъдауæй реконструкци чи цæуы, уыцы 20-æм сывæллæтты цæхæрадонмæ, кæцы ис Хъайтарты уынджы æмæ йын тынг ра-зианчындæуыд 2008 азы хæсты рæстæджы.
«Ахуырады системæйы ахсджиагдæр хæстæй иу у скъолайы агъоммæ кар сабиты сывæллæтты цæхæрадæтты бынæттæй сифтонг кæнын. Æмæ мæнæн æхсызгон у, æввахсдæр рæстæджы ацы бæстыхай кæй райдайдзæн архайын микрорайоны, кæцыйы тынг ахсджиагæй хъæуы ацы ахуырадон уагдон», – банысан кодта Хицауады Сæрдар.
Ивгъуыд аз Хицауад уынаффæ райста, цæмæй фæрæзтæ ссардæуа сывæллæтты цæхæрадоны капиталон цалцæг скæныны тыххæй æмæ уый æххæст æрцыд паддзахадон бюджеты фæрæзтæй.
Ныртæккæ ам фæуд кæнынц бæстонгæнæн куыстытæ æмæ марты мæйы сывæллæтты нырыккон цæхæрадон, кæцыйы уыдзæн 160 бынаты, райсдзæн йæ фыццаг хъомылгæнинæгты.
РХИ-йы Хицауады официалон сайт
Comments are closed, but trackbacks and pingbacks are open.